ബൈബിൾ വായനയ്ക്കു മുൻപ് അറിഞ്ഞിരിക്കേണ്ട അഞ്ച് പ്രധാന പ്രാർഥനകൾ

​ദൈവവചനം വായിക്കുന്നത് കേവലം ഒരു പുസ്തകം വായിക്കുന്നത് പോലെയല്ല. അത് നമ്മുടെ ആത്മാവിനെ ജീവിപ്പിക്കേണ്ട ഒന്നാണ്.

​1. തിരിച്ചറിവിനായി പ്രാർഥിക്കുക

​ബൈബിൾ ഒരു ആത്മീയ ഗ്രന്ഥമാണ്. ബുദ്ധിശക്തി കൊണ്ട് മാത്രം അത് പൂർണ്ണമായി ഗ്രഹിക്കാൻ കഴിയില്ല. ‘എന്റെ കണ്ണ് തുറക്കണമേ; നിന്റെ പ്രമാണങ്ങളിലെ അദ്ഭുതങ്ങളെ ഞാൻ കാണട്ടെ’ എന്ന് സങ്കീർത്തകൻ പ്രാർഥിച്ചതുപോലെ വചനത്തിന്റെ ആഴങ്ങളിലെ സത്യങ്ങൾ മനസ്സിലാക്കാൻ ദൈവത്തിന്റെ സഹായം ചോദിക്കുക.

​2. ജ്ഞാനത്തിനായി പ്രാർഥിക്കുക

​വായിക്കുന്ന കാര്യങ്ങൾ എങ്ങനെ ജീവിതത്തിൽ പ്രായോഗികമായി പകർത്തണം എന്നതാണ് ജ്ഞാനം. ‘നിങ്ങളിൽ ഒരുവന്നു ജ്ഞാനം കുറവാകുന്നു എങ്കിൽ ദൈവത്തോടു യാചിക്കട്ടെ; അപ്പോൾ അവന് ലഭിക്കും’. വായിക്കുന്ന വചനം ശരിയായ രീതിയിൽ ഉപയോഗിക്കാൻ ദൈവത്തോട് ജ്ഞാനം ആവശ്യപ്പെടുക.

​3. താല്പര്യത്തിനായി പ്രാർഥിക്കുക

​പലപ്പോഴും ബൈബിൾ വായിക്കാൻ നമുക്ക് മടിയുണ്ടാകാം. വചനത്തോട് ഒരു ആഗ്രഹം തോന്നുന്നില്ലെങ്കിൽ അത് തുറന്നു പറയുക. ‘കർത്താവേ നിന്റെ വചനത്തോടുള്ള എന്റെ താല്പര്യം വർധിപ്പിക്കണമേ’ എന്ന് പ്രാർഥിക്കുന്നത് ബൈബിൾ വായനയെ കൂടുതൽ അർഥവത്താക്കും.

​4. സന്തോഷത്തിനായി പ്രാർഥിക്കുക

​ബൈബിൾ വായന ഒരു ഭാരമായിട്ടല്ല മറിച്ച് സന്തോഷമായി മാറണം. ദൈവത്തിന്റെ വചനത്തിൽ സന്തോഷം കണ്ടെത്തുന്നവൻ ഭാഗ്യവാൻ എന്ന് സങ്കീർത്തനം പറയുന്നു. വചനം വായിക്കുമ്പോൾ അതിൽ നിന്നും സമാധാനവും സന്തോഷവും ലഭിക്കാൻ പ്രാർഥിക്കുക.

​5. മാറ്റത്തിനായി പ്രാർഥിക്കുക

​നമ്മുടെ അറിവ് വർധിപ്പിക്കാൻ മാത്രമല്ല നമ്മുടെ സ്വഭാവം മാറാനാണ് നാം ബൈബിൾ വായിക്കുന്നത്. ‘സത്യത്താൽ അവരെ വിശുദ്ധീകരിക്കണമേ; നിന്റെ വചനം സത്യം ആകുന്നു ‘ എന്ന് യേശു പ്രാർഥിച്ചതുപോലെ വചനം നമ്മെ മാറ്റുന്നതിനായി ഉള്ളിലെ പാപങ്ങളെ തിരിച്ചറിയാൻ സഹായിക്കുന്നതിനായി പ്രാർഥിക്കുക.

​നാം ബൈബിൾ തുറക്കുന്നതിന് മുൻപ് ഹൃദയവും മനസ്സും ദൈവത്തിന് മുൻപാകെ തുറന്നുവച്ചാൽ വചനം നമ്മുടെ ജീവിതത്തിൽ വലിയ മാറ്റങ്ങൾ കൊണ്ടുവരും.