“വേദനകൾക്കിടയിലും നാം പ്രത്യാശ കൈവിടരുത്”: ഉക്രൈനിലെ വത്തിക്കാൻ സ്ഥാനപതി

ഉക്രൈൻ അധിനിവേശത്തിന്റെ നാലാം വാർഷികത്തിൽ, യുദ്ധം വിതയ്ക്കുന്ന കഠിനമായ വേദനകൾക്കിടയിലും പ്രത്യാശ കൈവിടരുതെന്ന് ഉക്രൈനിലെ വത്തിക്കാൻ സ്ഥാനപതി ആർച്ച്ബിഷപ്പ് വിസ്‌വാൾദാസ് കുൽബോക്കാസ്. കഴിഞ്ഞ നാലുവർഷമായി ഉക്രൈനിലെ ജനങ്ങൾ അനുഭവിക്കുന്നത് വിവരണാതീതമായ കഷ്ടപ്പാടുകളാണെന്ന് അദ്ദേഹം ചൂണ്ടിക്കാട്ടി.

നിരന്തരമായ ബോംബാക്രമണങ്ങളും തകർന്നടിഞ്ഞ വീടുകളും പ്രിയപ്പെട്ടവരുടെ വേർപാടും ജനങ്ങളെ മാനസികമായും ശാരീരികമായും തളർത്തുന്നു. എങ്കിലും, ദൈവത്തിലുള്ള വിശ്വാസവും പരസ്പരമുള്ള സ്നേഹവുമാണ് അവരെ മുന്നോട്ടുനയിക്കുന്നതെന്ന് അദ്ദേഹം പറഞ്ഞു. യുദ്ധം നാശം വിതയ്ക്കുമ്പോഴും സഭ ജനങ്ങളോടൊപ്പം നിൽക്കുന്നു. ഓരോ പ്രാർഥനയും ഓരോ സഹായഹസ്തവും പ്രത്യാശയുടെ പ്രകാശമാണെന്നും അദ്ദേഹം ഓർമ്മിപ്പിച്ചു.

സമാധാനം എന്നത് വെറുമൊരു ഉടമ്പടിയല്ല, മറിച്ച് അത് ദൈവത്തിൽ നിന്ന് ലഭിക്കേണ്ട ദാനമാണ്. ലോകമെമ്പാടുമുള്ള വിശ്വാസികളുടെ പ്രാർഥനകൾ ഉക്രൈനിലെ ജനങ്ങൾക്ക് വലിയ ആശ്വാസം നൽകുന്നുണ്ടെന്ന് അദ്ദേഹം നന്ദിയോടെ സ്മരിച്ചു. മാർപാപ്പ ഉക്രൈനിലെ സ്ഥിതിഗതികൾ നിരന്തരം നിരീക്ഷിക്കുന്നുണ്ടെന്നും അദ്ദേഹത്തിന്റെ പ്രാർഥനകളും മാനുഷികസഹായങ്ങളും രാജ്യത്തോടൊപ്പമുണ്ടെന്നും വത്തിക്കാൻ സ്ഥാനപതി വ്യക്തമാക്കി.