അമ്പലപ്പുഴയിൽ ജി സുധാകരനെ പിന്തുണയ്ക്കാൻ യുഡിഎഫ്, പോരാട്ടം നേരിട്ട് സിപിഎമ്മുമായി

ആലപ്പുഴ: സംസ്ഥാന രാഷ്ട്രീയത്തെ ഉറ്റുനോക്കുന്ന അമ്പലപ്പുഴ മണ്ഡലത്തിൽ സിപിഎമ്മിനെ ഞെട്ടിച്ച് യുഡിഎഫിന്റെ നിർണ്ണായക നീക്കം. പാർട്ടിയുമായി ഇടഞ്ഞ് സ്വതന്ത്രനായി മത്സരിക്കാൻ തീരുമാനിച്ച മുൻമന്ത്രിയും മുതിർന്ന സിപിഎം നേതാവുമായിരുന്ന ജി. സുധാകരന് യുഡിഎഫ് പിന്തുണ പ്രഖ്യാപിച്ചു. ഇതോടെ അമ്പലപ്പുഴയിലെ പോരാട്ടം നേരിട്ട് ജി. സുധാകരനും ഇടതുമുന്നണിയും തമ്മിലായി മാറി.

കഴിഞ്ഞ കുറച്ചു ദിവസങ്ങളായി കോൺഗ്രസ് നേതൃത്വവും ജി. സുധാകരനും തമ്മിൽ രഹസ്യമായും പരസ്യമായും നടത്തിയ ചർച്ചകൾക്കൊടുവിലാണ് പിന്തുണ നൽകാൻ ധാരണയായത്. സുധാകരനെതിരെ സ്വന്തം സ്ഥാനാർത്ഥിയെ നിർത്താതെ അദ്ദേഹത്തിന് പുറത്തുനിന്ന് പിന്തുണ നൽകാനാണ് യുഡിഎഫ് തീരുമാനം. യുഡിഎഫ് മുന്നോട്ടുവെച്ച ഈ സഹകരണം സ്വീകരിക്കാൻ സുധാകരനും തയ്യാറായതോടെ അമ്പലപ്പുഴയിൽ എൽഡിഎഫ് വോട്ടുകൾ ഭിന്നിപ്പിക്കാമെന്ന കണക്കുകൂട്ടലിലാണ് കോൺഗ്രസ്.

ജി. സുധാകരന്റെ നീക്കത്തോടെ മണ്ഡലത്തിൽ കടുത്ത പ്രതിരോധത്തിലായിരിക്കുകയാണ് സിപിഎം നേതൃത്വം. സുധാകരനെതിരെ വഞ്ചനാക്കുറ്റം ആരോപിച്ചും രാഷ്ട്രീയ വിമർശനങ്ങൾ ഉന്നയിച്ചും സിപിഎം പ്രചാരണം ശക്തമാക്കിയിട്ടുണ്ട്. എന്നാൽ മണ്ഡലത്തിൽ സുധാകരനുള്ള വ്യക്തിപരമായ സ്വാധീനവും യുഡിഎഫിന്റെ വോട്ടുകളും ഒന്നിക്കുന്നത് പാർട്ടിയെ വലിയ രീതിയിൽ ആശങ്കപ്പെടുത്തുന്നുണ്ട്.

ദശകങ്ങളായി ഇടതുപക്ഷത്തോടൊപ്പം നിൽക്കുന്ന അമ്പലപ്പുഴയിൽ സുധാകരനെ മുൻനിർത്തി വിള്ളൽ വീഴ്ത്താമെന്ന യുഡിഎഫ് തന്ത്രം വിജയിച്ചാൽ അത് സംസ്ഥാന രാഷ്ട്രീയത്തിലെ തന്നെ ഏറ്റവും വലിയ അട്ടിമറിയായി മാറും. വരും ദിവസങ്ങളിൽ മണ്ഡലത്തിലെ പോരാട്ടം കൂടുതൽ വാശിയേറിയതാകുമെന്നുറപ്പായി.