തൈറോയ്ഡ് - പാരാതൈറോയ്ഡ് ദ്വിദിന സമ്മേളനം ബിലീവേഴ്സ് ആശുപത്രിയിൽ നടന്നു

തിരുവല്ല: ലോക തൈറോയ്ഡ് ദിനത്തിന് മുന്നോടിയായി തൈറോയ്ഡ്, പാരാതൈറോയ്ഡ് ഗ്രന്ഥികളെക്കുറിച്ചുള്ള ഗവേഷണത്തിലെയും ചികിത്സയിലെയും ഏറ്റവും പുതിയ അറിവുകൾ പങ്കുവെക്കുക എന്ന ലക്ഷ്യത്തോടെ സംഘടിപ്പിച്ച 'കേറ്റ്സ് 2026 തൈറോയ്ഡ് ആൻഡ് പാരാതൈറോയ്ഡ് കോൺക്ലേവ്' ബിലീവേഴ്സ് ചർച്ച് മെഡിക്കൽ കോളേജ് ആശുപത്രിയിൽ നടന്നു.

ബിലീവേഴ്സ് ആശുപത്രി ബ്രെസ്റ്റ് ആന്റ് എൻഡോക്രൈൻ സർജറി വിഭാഗത്തിന്റെ ആഭിമുഖ്യത്തിൽ കേരള അസോസിയേഷൻ ഓഫ് തൈറോയ്ഡ് ആൻഡ് എൻഡോക്രൈൻ സർജൻസ് (കേറ്റ്സ്) ന്റെ സഹകരണത്തോടെയാണ് രണ്ട് ദിവസത്തെ ഈ കോൺക്ലേവ് സംഘടിപ്പിച്ചത്. 'എവിഡൻസ് മുതൽ എക്സലൻസ് വരെ' എന്നതായിരുന്നു ഈ വർഷത്തെ കോൺക്ലേവിന്റെ പ്രമേയം. കോൺക്ലേവിന്റെ ഭാഗമായി നടന്ന പ്രീ-കോൺഫറൻസ് വർക്ക് ഷോപ്പിൽ തൈറോയ്ഡ് സർജറിയിലെ ഏറ്റവും പുതിയ സാങ്കേതികവിദ്യകളുടെ പരിശീലനം നൽകി.

തുടർന്ന് നടന്ന ശാസ്ത്ര സെഷൻ ബിലീവേഴ്സ് ആശുപത്രി അസോ. ഡയറക്ടർ ഡോ.ജോൺ വല്യത്ത് ഉദ്ഘാടനം ചെയ്തു. കേറ്റ്സ് പ്രസിഡന്റ് ഡോ രഞ്ജിത്ത് സുകുമാർ അധ്യക്ഷത വഹിച്ചു. ബിലീവേഴ്സ് ആശുപത്രി മെഡിക്കൽ സൂപ്രണ്ട് ഡോ. ഏബേൽ കെ സാമുവൽ, ബ്രെസ്റ്റ് ആന്റ് എൻഡോക്രൈൻ സർജറി വിഭാഗം കൺസൾട്ടന്റുമാരായ ഡോ അനീഷ് സുഗുണൻ, ഡോ മനോ സാക്ക് മാത്യൂസ്, ഡോ അരുണിമാ പൗലോസ്, രാജ്യത്തെ വിവിധ ആശുപത്രികളിലെ എൻഡോക്രൈൻ സർജന്മാരായ പ്രൊഫ ഡോ. എം.ജെ.പോൾ,  ഡോ പ്രദീപ് പി വി, ഡോ കെ എസ് തലവൈ സുന്ദർ റാം, ഡോ. സഞ്ജയ്കുമാർ യാദവ് എന്നിവർ ഉദ്ഘാടനച്ചടങ്ങിൽ സന്നിഹിതരായിരുന്നു.  

എൻഡോക്രൈൻ സർജറി, എൻഡോക്രൈനോളജി, ന്യൂക്ലിയർ മെഡിസിൻ, പതോളജി, റേഡിയോളജി, അനസ്തേഷ്യോളജി, മെഡിക്കൽ ഓങ്കോളജി വിഭാഗങ്ങളിലെ പ്രമുഖ ഡോക്ടർമാർ വിവിധ വിഷയങ്ങൾ സംസാരിച്ചു. പ്രയോഗിക പരിശീലനം അടക്കം നടത്തിയ ദ്വിദിന സമ്മേളനത്തിൽ രാജ്യത്തിന്റെ വിവിധ ഭാഗങ്ങളിൽ നിന്നുള്ള എൻഡോക്രൈൻ സർജന്മാർ പങ്കെടുത്തു.