ലെയോ പാപ്പയുടെ സന്ദർശനത്തോട് അനുബന്ധിച്ച് പ്രത്യേക സ്റ്റാമ്പുകൾ പുറത്തിറക്കി സ്പെയിൻ

ജൂൺ ആറു മുതൽ 12 വരെ നടക്കുന്ന ലെയോ പതിനാലാമൻ മാർപാപ്പയുടെ സ്പെയിൻ സന്ദർശനത്തിന്റെ സ്മരണയ്ക്കായി, സ്പാനിഷ് ഫിലാറ്റലിക് കമ്പനിയായ കൊറിയോസ്, സ്റ്റാമ്പുകളുടെയും പോസ്റ്റ്കാർഡുകളുടെയും ഒരു ശേഖരം പുറത്തിറക്കി. പാപ്പയുടെ സന്ദർശനത്തിന്റെ ഔദ്യോഗിക ലോഗോയെ അടിസ്ഥാനമാക്കിയാണ് ഈ സ്റ്റാമ്പ് ശേഖരണം തയ്യാറാക്കിയിരിക്കുന്നത്.

ഒരു തുറന്ന വൃത്തത്തിന്റെ രൂപത്തിലുള്ള ഈ സ്റ്റാമ്പിന്റെ രൂപകൽപ്പന, സമൂഹം, കണ്ടുമുട്ടൽ, കൂട്ടുത്തരവാദിത്വം, പരസ്പര പിന്തുണ, ഐക്യത്തിലെ വൈവിധ്യം, തുറന്ന മനസ്സ്, സംഭാഷണം, മിഷനറി പ്രവർത്തനങ്ങൾ എന്നിവ ഉൾപ്പെടുന്നതാണെന്ന് സ്‌പെയിനിൽ നിന്നുള്ള ഒരു പ്രസ്താവനയിൽ വിശദീകരിക്കുന്നു. ‘നിങ്ങളുടെ കണ്ണുകൾ ഉയർത്തുക’ എന്ന മുദ്രാവാക്യവും സ്റ്റാമ്പുകളിലും പോസ്റ്റ്കാർഡുകളിലും ഉൾപ്പെടുത്തിയിട്ടുണ്ട്.

ദൈനംദിന ആശങ്കകൾക്കപ്പുറം ദൈവത്തിന്റെ സാന്നിധ്യം കണ്ടെത്താനും, ചിന്തിക്കാനും, സ്വയം പുറത്തുകടന്ന് മറ്റുള്ളവരെ കണ്ടുമുട്ടാൻ തയ്യാറാകാനും, അങ്ങനെ സാമൂഹിക ഘടനയെ നശിപ്പിക്കുന്ന വ്യക്തിത്വ പ്രവണതകളെയും ധ്രുവീകരണത്തെയും തകർക്കാനുമുള്ള ഒരു ക്ഷണം ഈ സ്റ്റാമ്പിൽ ഉൾക്കൊള്ളുന്നു.