റഷ്യൻ അധിനിവേശത്തിലുള്ള കിഴക്കൻ യുക്രൈനിലെ വിദ്യാർത്ഥി ഹോസ്റ്റലിന് നേരെ യുക്രൈൻ മാരകമായ ആക്രമണം നടത്തിയെന്ന് റഷ്യൻ പ്രസിഡന്റ് വ്ലാഡിമിർ പുടിൻ. ആക്രമണത്തിന് കടുത്ത രീതിയിൽ തിരിച്ചടി നൽകുമെന്നും പുടിൻ മുന്നറിയിപ്പ് നൽകി. ലുഹാൻസ്ക് മേഖലയിലെ സ്റ്റാരോബിൽസ്ക് (Starobilsk) നഗരത്തിൽ രാത്രിയിലുണ്ടായ ഡ്രോൺ ആക്രമണത്തിൽ ആറ് പേർ കൊല്ലപ്പെടുകയും 39 പേർക്ക് പരിക്കേൽക്കുകയും ചെയ്തതായി പുടിൻ വ്യക്തമാക്കി. 15 ഓളം പേരെ കാണാതായിട്ടുമുണ്ട്.

യാതൊരുവിധ സൈനിക സാന്നിധ്യവുമില്ലാത്ത സിവിലിയൻമാർ താമസിക്കുന്ന വിദ്യാർത്ഥി ഹോസ്റ്റലിന് നേരെ യുക്രൈൻ മനഃപൂർവ്വം ആക്രമണം നടത്തുകയായിരുന്നു എന്ന് പുടിൻ പറഞ്ഞു. 16 ഡ്രോണുകൾ ഉപയോഗിച്ച് മൂന്ന് ഘട്ടങ്ങളായാണ് യുക്രൈൻ ഈ ആക്രമണം നടത്തിയത്. റഷ്യയുടെ വ്യോമപ്രതിരോധ സംവിധാനങ്ങളുടെ തകരാറ് മൂലമല്ല ദുരന്തമുണ്ടായതെന്നും അദ്ദേഹം ക്രെംലിനിൽ പറഞ്ഞു. ഇതിന് എങ്ങനെ തിരിച്ചടി നൽകുമെന്നും പുടിൻ അറിയിച്ചു.

റഷ്യയുടെ ആരോപണങ്ങൾ യുക്രൈൻ സൈന്യം തള്ളി. സ്റ്റാരോബിൽസ്കിലുള്ള റഷ്യയുടെ പ്രമുഖ ഡ്രോൺ സൈനിക യൂണിറ്റായ ‘റൂബിക്കണിന്റെ’ (Rubicon drone military unit) ആസ്ഥാനമാണ് തങ്ങൾ ലക്ഷ്യമിട്ടതെന്ന് യുക്രൈൻ വ്യക്തമാക്കി. ഈ യൂണിറ്റിലെ സൈനികരാണ് യുക്രൈനിലെ സിവിലിയൻമാർക്ക് നേരെ നിരന്തരം ആക്രമണം നടത്തുന്നത്. തങ്ങൾ അന്താരാഷ്ട്ര മാനുഷിക നിയമങ്ങൾ പാലിച്ചുകൊണ്ട് സൈനിക കേന്ദ്രങ്ങളെ മാത്രമാണ് ലക്ഷ്യമിടുന്നതെന്നും യുക്രൈൻ കൂട്ടിച്ചേർത്തു. എന്നാൽ തങ്ങൾ തകർത്തത് റഷ്യ പറയുന്ന അതേ കെട്ടിടമാണോ എന്ന് യുക്രൈൻ വ്യക്തമാക്കിയിട്ടില്ല.