കേന്ദ്രത്തിന് റിസർവ് ബാങ്കിന്റെ കൈത്താങ്ങ്, 3 ലക്ഷം കോടിയുടെ റെക്കോർഡ് ലാഭവിഹിതം കൈമാറിയേക്കും

ന്യൂഡൽഹി: ആഗോള സാമ്പത്തിക അനിശ്ചിതത്വങ്ങൾക്കും ഇന്ധനവില വർദ്ധനവിനും ഇടയിൽ കേന്ദ്ര സർക്കാരിന് വലിയൊരു സാമ്പത്തിക താങ്ങാകാൻ റിസർവ് ബാങ്ക് (RBI). തങ്ങളുടെ ലാഭവിഹിതമായി (Dividend) ഇത്തവണ ചരിത്രത്തിലെ ഏറ്റവും ഉയർന്ന റെക്കോർഡ് തുക ആർ.ബി.ഐ കേന്ദ്ര സർക്കാരിന് കൈമാറിയേക്കുമെന്ന് ബ്ലൂംബെർഗ് റിപ്പോർട്ട് ചെയ്യുന്നു. സാമ്പത്തിക വിദഗ്ധരുടെ വിലയിരുത്തൽ അനുസരിച്ച് ഏകദേശം 3 ലക്ഷം കോടി രൂപയോളമായിരിക്കും ഇത്തവണ റിസർവ് ബാങ്ക് കേന്ദ്ര ഖജനാവിലേക്ക് നൽകുക.

കഴിഞ്ഞ വർഷം നൽകിയ റെക്കോർഡ് തുകയായ 2.7 ലക്ഷം കോടി രൂപയേക്കാൾ വളരെ കൂടുതലാണിത്. ലാഭവിഹിതം കൈമാറുന്നതിന് ഔദ്യോഗിക അംഗീകാരം നൽകാനായി ആർ.ബി.ഐ ബോർഡ് വരുന്ന വെള്ളിയാഴ്ച പ്രത്യേക യോഗം ചേരും. കൃത്യമായ തുക ഇതുവരെ പ്രഖ്യാപിച്ചിട്ടില്ലെങ്കിലും, ഈ വിഹിതം 3.4 ലക്ഷം കോടി രൂപ വരെയാകാൻ സാധ്യതയുണ്ടെന്നാണ് ധനകാര്യ മേഖലയിൽ നിന്നുള്ള സൂചനകൾ.

വിദേശനാണ്യ ശേഖരത്തിലെ നിക്ഷേപങ്ങൾ, ബോണ്ടുകൾ, കറൻസി മാനേജ്മെന്റ് തുടങ്ങിയ നിരവധി മാർഗ്ഗങ്ങളിലൂടെയാണ് റിസർവ് ബാങ്ക് വരുമാനം കണ്ടെത്തുന്നത്. 2026 സാമ്പത്തിക വർഷം ആർ.ബി.ഐയെ സംബന്ധിച്ച് സാമ്പത്തികമായി വലിയ നേട്ടങ്ങളുടെ വർഷമായിരുന്നു എന്നാണ് വിദഗ്ധർ ചൂണ്ടിക്കാട്ടുന്നത്. വിദേശനാണ്യ വ്യാപാരത്തിൽ നിന്നുള്ള ലാഭം, ആഗോളതലത്തിൽ നിലനിൽക്കുന്ന ഉയർന്ന പലിശനിരക്കുകൾ, സ്വർണ്ണവിലയിലുണ്ടായ അഭൂതപൂർവ്വമായ കുതിപ്പ് എന്നിവയെല്ലാം റിസർവ് ബാങ്കിന്റെ വരുമാനം ഗണ്യമായി വർദ്ധിപ്പിച്ചു.

റിസർവ് ബാങ്കിന് തങ്ങളുടെ സ്വന്തം ആവശ്യങ്ങൾക്കും കരുതൽ ധനത്തിനുംവേണ്ടതിലും കൂടുതൽ വരുമാനം ലഭിക്കുമ്പോൾ, ആ അധിക തുക സർക്കാരിന് കൈമാറുകയാണ് പതിവ്. ഇത്തവണ സർക്കാരിന് കൈമാറാൻ കഴിയുന്ന അധിക തുക സാധാരണയേക്കാൾ വളരെ വലുതായിരിക്കുമെന്നാണ് വിലയിരുത്തൽ.

പൊതുജനങ്ങൾക്ക് മേൽ അധിക നികുതി ചുമത്തുകയോ അല്ലെങ്കിൽ കൂടുതൽ കടമെടുക്കുകയോ ചെയ്യാതെ തന്നെ സർക്കാരിന് ഇത്രയും വലിയൊരു തുക ലഭിക്കുന്നു എന്നതാണ് ഇതിന്റെ ഏറ്റവും വലിയ സവിശേഷത. ഇറാൻ സംഘർഷം ഉൾപ്പെടെയുള്ള ആഗോള പ്രശ്‌നങ്ങൾ അന്താരാഷ്ട്ര വിപണിയിൽ വലിയ തോതിലുള്ള ഇന്ധനവില വർദ്ധനവിന് കാരണമായിട്ടുണ്ട്. ഊർജ്ജ ആവശ്യങ്ങൾക്കായി പ്രധാനമായും ഇറക്കുമതിയെ ആശ്രയിക്കുന്ന ഇന്ത്യയ്ക്ക് ഇത് വലിയ സാമ്പത്തിക ബാധ്യതയാണ് ഉണ്ടാക്കുന്നത്.

ഈ സാഹചര്യത്തിൽ ലഭിക്കുന്ന 3 ലക്ഷം കോടി രൂപയുടെ അധിക വരുമാനം സർക്കാരിന്റെ ദൈനംദിന ചെലവുകൾ നിയന്ത്രിക്കാനും, വിവിധ വികസന-ക്ഷേമപദ്ധതികൾ മുടക്കമില്ലാതെ മുന്നോട്ട് കൊണ്ടുപോകാനും, രാജ്യത്തിന്റെ ബജറ്റ് കമ്മി (Fiscal Deficit) കാര്യമായി കുറയ്ക്കാനും വലിയ തോതിൽ സഹായിക്കും. ചുരുക്കത്തിൽ, പ്രതിസന്ധികൾ നിറഞ്ഞ ഈ സമയത്ത് കേന്ദ്ര സർക്കാരിനൊരു വലിയ സാമ്പത്തിക കരുത്തായി ആർ.ബി.ഐയുടെ ഈ വിഹിതം മാറും.