നേമത്ത് ചുവരെഴുതി രാജീവ് ചന്ദ്രശേഖര്; ബിജെപി തെരഞ്ഞെടുപ്പ് പ്രചാരണത്തിന് തുടക്കം
തിരുവനന്തപുരം: നിയമസഭ തെരഞ്ഞെടുപ്പ് പ്രചാരണത്തിന് തുടക്കം കുറിച്ച് ബിജെപി. തിരുവനന്തപുരം ജില്ലയിലെ നേമം മണ്ഡലത്തില് പാര്ട്ടി സംസ്ഥാന അധ്യക്ഷന് രാജീവ് ചന്ദ്രശേഖര് ആണ് ചുവരെഴുതി പ്രചാരണത്തിന് തുടക്കം കുറിച്ചത്. നമുക്ക് വേണം വികസിത നേമം എന്നെഴുതിയാണ് രാജീവ് ചന്ദ്രശേഖര് പ്രചാരണത്തിന് തുടക്കമിട്ടത്.
രാവിലെ പ്രധാനമന്ത്രിയുടെ മന്കീ ബാത് പരിപാടിയില് പങ്കെടുത്ത ശേഷമാണ് രാജീവ് ചന്ദ്രശേഖര് നേമം മണ്ഡലത്തിലുള്പ്പെടുന്ന കാലടി വാര്ഡില് ചുവരെഴുത്ത് നടത്തിയത്. ഔദ്യോഗിക പ്രഖ്യാപനം ഉണ്ടാകാത്തതിനാല് സ്ഥാനാര്ത്ഥിയുടെ പേര് എഴുതിയിട്ടില്ല. ഇതിനായി സ്ഥലം ഒഴിച്ചിട്ടിരിക്കുകയാണ്.
നേമം മണ്ഡലത്തില് ഇത്തവണ താന് മത്സരിക്കുമെന്ന് രാജീവ് ചന്ദ്രശേഖര് പ്രഖ്യാപിച്ചിരുന്നു. നിയമസഭ തെരഞ്ഞെടുപ്പില് പരിഗണിക്കുന്നതിനായി സംസ്ഥാന നേതൃത്വം നല്കിയ പട്ടികയിലും നേമത്ത് രാജീവ് ചന്ദ്രശേഖറുടെ പേരാണുള്ളത്. ബിജെപി ഇത്തവണ വിജയപ്രതീക്ഷ വെച്ചു പുലര്ത്തുന്ന എ ക്ലാസ് മണ്ഡലമാണ് നേമം.