ഓഗസ്റ്റിൽ അസീസിയിൽ നടക്കുന്ന യൂറോപ്യൻ യുവജനസംഗമത്തിൽ ലെയോ പാപ്പ പങ്കെടുക്കും

ലെയോ പതിനാലാമൻ മാർപാപ്പ ഓഗസ്റ്റിൽ ഇറ്റലിയിലെ അസീസിയിൽ നടക്കുന്ന യൂറോപ്യൻ യുവജനസംഗമത്തിൽ പങ്കെടുക്കുമെന്ന് വത്തിക്കാൻ പ്രസ് ഓഫീസ് അറിയിച്ചു. വിശുദ്ധ ഫ്രാൻസിസ് അസീസിയുടെ മരണത്തിന്റെ 800-ാം വാർഷികാഘോഷങ്ങളുടെ ഭാഗമായി സംഘടിപ്പിക്കുന്ന ‘ഗോ! ഫ്രാൻസിസ്കൻ യൂത്ത് മീറ്റിംഗി’ലാണ് പാപ്പ മുഖ്യാതിഥിയായി എത്തുന്നത്.

ഓഗസ്റ്റ് മൂന്ന് മുതൽ ആറുവരെയാണ് അസീസിയിൽ ഈ സംഗമം നടക്കുന്നത്. പരിപാടിയുടെ സമാപന ദിവസമായ ഓഗസ്റ്റ് ആറിന് രാവിലെ മാർപാപ്പ യുവാക്കളുമായി കൂടിക്കാഴ്ച നടത്തും. വിവിധ യൂറോപ്യൻ രാജ്യങ്ങളിൽ നിന്നുള്ള പതിനെട്ടിനും മുപ്പത്തിമൂന്നിനും ഇടയിൽ പ്രായമുള്ള ആയിരക്കണക്കിന് യുവാക്കളാണ് ഈ സംഗമത്തിൽ പങ്കെടുക്കുക.

‘നമ്മുടെ പ്രത്യാശ യേശുവാണ്’ എന്ന സന്ദേശത്തിലൂന്നി, ആധുനിക ലോകത്ത് ക്രൈസ്തവ യുവത്വം നേരിടുന്ന വെല്ലുവിളികളെക്കുറിച്ചും സഭയുടെ ദൗത്യത്തെക്കുറിച്ചും ചർച്ച ചെയ്യാനാണ് ഈ സംഗമം ലക്ഷ്യമിടുന്നത്. അസീസിയിലെ സാന്താ മരിയ ഡെഗ്ലി ഏഞ്ചലി ബസിലിക്കയിൽ മാർപാപ്പ ആഘോഷമായ ദിവ്യബലി അർപ്പിക്കുകയും യുവജനങ്ങൾക്ക് സന്ദേശം നൽകുകയും ചെയ്യും. യുവജനങ്ങൾക്ക് ചോദ്യങ്ങൾ ചോദിക്കാനും അവരുടെ അനുഭവങ്ങൾ പങ്കുവെക്കാനുമായി പ്രത്യേക സമയം മാർപാപ്പ മാറ്റിവച്ചിട്ടുണ്ട്.