തളിപ്പറമ്പിൽ പി കെ ശ്യാമളയെ മാറ്റിയേക്കും, പകരം എം വി ജയരാജൻ?
തളിപ്പറമ്പ്: സി.പി.എമ്മിന്റെ ഉറച്ച കോട്ടയായ തളിപ്പറമ്പിൽ സ്ഥാനാർഥി നിർണ്ണയത്തെച്ചൊല്ലി അണികൾക്കിടയിൽ പ്രതിഷേധം പുകയുന്നു. സംസ്ഥാന സെക്രട്ടറി എം.വി. ഗോവിന്ദന്റെ പത്നി പി.കെ. ശ്യാമളയെ സ്ഥാനാർഥിയായി പരിഗണിക്കുന്നതിനെതിരെ പാർട്ടി പ്രവർത്തകരും അനുഭാവികളും പരസ്യമായി രംഗത്തിറങ്ങിയതോടെ നേതൃത്വം പുനരാലോചനയിലേക്ക് കടന്നതായാണ് സൂചന.
സോഷ്യൽ മീഡിയയിലൂടെയാണ് പാർട്ടി അണികൾ തങ്ങളുടെ പ്രതിഷേധം ശക്തമായി രേഖപ്പെടുത്തുന്നത്. പി.കെ. ശ്യാമളയുടെ സ്ഥാനാർഥിത്വം പാർട്ടിയുടെ വിജയസാധ്യതയെ ബാധിക്കുമെന്നും നേതൃത്വം തീരുമാനം തിരുത്തണമെന്നുമാണ് ഇവരുടെ ആവശ്യം.
ആന്തൂർ നഗരസഭാ അധ്യക്ഷയായിരിക്കെ പ്രവാസി വ്യവസായി ആത്മഹത്യ ചെയ്ത സംഭവത്തിലുണ്ടായ വിവാദങ്ങൾ ശ്യാമളയുടെ ജനകീയതയെ ബാധിച്ചിട്ടുണ്ടെന്നാണ് വിലയിരുത്തൽ. 'ജനകീയതയില്ലാത്ത സ്ഥാനാർഥി' എന്ന ആക്ഷേപമാണ് പ്രധാനമായും ഉയരുന്നത്.
എം.വി. ഗോവിന്ദന്റെ പത്നി എന്ന പരിഗണനയിലാണ് സീറ്റ് നൽകിയതെന്ന വിമർശനം പാർട്ടിക്കുള്ളിൽ തന്നെ സജീവമാണ്. ഇത് ചരിത്രത്തിലാദ്യമായി തളിപ്പറമ്പിൽ പാർട്ടിയുടെ പരാജയത്തിന് വഴിവെക്കുമെന്ന് പ്രവർത്തകർ ആശങ്കപ്പെടുന്നു.
പ്രതിഷേധം ശക്തമായ സാഹചര്യത്തിൽ പി.കെ. ശ്യാമളയ്ക്ക് പകരം എം.വി. ജയരാജനെ തളിപ്പറമ്പിൽ മത്സരിപ്പിക്കാനുള്ള സാധ്യതകൾ പരിശോധിക്കുന്നുണ്ട്. ഇക്കാര്യത്തിൽ ഇന്ന് ചേരുന്ന സംസ്ഥാന സെക്രട്ടറിയേറ്റ് യോഗത്തിൽ അന്തിമ തീരുമാനമുണ്ടാകും. സംസ്ഥാന സെക്രട്ടറി എം.വി. ഗോവിന്ദന്റെ നിലപാട് ഈ വിഷയത്തിൽ നിർണ്ണായകമാകും.
സ്ഥാനാർഥിയുടെ സ്വീകാര്യതയും അണികളുമായുള്ള ആത്മബന്ധവും പരിഗണിക്കാതെ മുന്നോട്ട് പോയാൽ തിരിച്ചടിയുണ്ടാകുമെന്ന മുന്നറിയിപ്പാണ് തളിപ്പറമ്പിലെ സൈബർ ഇടങ്ങളിൽ നിന്നും ഉയരുന്നത്.