അഫ്ഗാനിസ്ഥാനിലെ പ്രധാന നഗരങ്ങളിൽ പാക്കിസ്ഥാൻ ശക്തമായ വ്യോമാക്രമണം നടത്തിയതോടെ ഇരുരാജ്യങ്ങളും തമ്മിലുള്ള ബന്ധം അതീവ ഗുരുതരമായി. തലസ്ഥാനമായ കാബൂളിലും താലിബാൻ കേന്ദ്രമായ കാണ്ഡഹാറിലും നടന്ന ആക്രമണങ്ങളിൽ സാധാരണക്കാർക്ക് പരിക്കേറ്റതായും വലിയ നാശനഷ്ടങ്ങൾ ഉണ്ടായതായും റിപ്പോർട്ടുകളുണ്ട്. തങ്ങളുടെ സൈനികർക്കു നേരെയുണ്ടായ ആക്രമണത്തിനു മറുപടിയായാണ് ഇതെന്നും താലിബാനോട് ഇനി നേരിട്ടുള്ള യുദ്ധമായിരിക്കുമെന്നും പാക്കിസ്ഥാൻ പ്രഖ്യാപിച്ചു.

അതിർത്തിയിൽ സംഘർഷം കടുക്കുമ്പോഴും സമാധാനപരമായ ചർച്ചകൾക്ക് തങ്ങൾ തയ്യാറാണെന്ന് താലിബാൻ ഭരണകൂടം വ്യക്തമാക്കി. പ്രശ്നങ്ങൾ സംസാരത്തിലൂടെ പരിഹരിക്കാനാണ് തങ്ങൾ എപ്പോഴും ആഗ്രഹിക്കുന്നതെന്ന് താലിബാൻ വക്താവ് സബീഹുള്ള മുജാഹിദ് പറഞ്ഞു. ഖത്തർ ഉൾപ്പെടെയുള്ള രാജ്യങ്ങൾ വിഷയത്തിൽ ഇടപെട്ട് സമാധാനം കൊണ്ടുവരാനുള്ള ശ്രമങ്ങൾ തുടങ്ങിയിട്ടുണ്ട്.

അതേസമയം, മേഖലയിലെ അക്രമങ്ങൾ അവസാനിപ്പിക്കണമെന്ന് ഐക്യരാഷ്ട്രസഭയും ലോകരാജ്യങ്ങളും ആവശ്യപ്പെട്ടു. യുദ്ധം തുടരുന്നത് സാധാരണക്കാരുടെ ജീവിതത്തെ ബാധിക്കുമെന്നും ചർച്ചകളിലൂടെ പരിഹാരം കണ്ടെത്തണമെന്നുമാണ് യുഎൻ വ്യക്തമാക്കുന്നത്. എന്നാൽ സ്വന്തം രാജ്യം സംരക്ഷിക്കാൻ പാക്കിസ്ഥാന് അവകാശമുണ്ടെന്ന് അമേരിക്ക പ്രതികരിച്ചു.