13 വയസ്സുകാരിയായ ക്രൈസ്തവ പെൺകുട്ടിയുടെ നിർബന്ധിത വിവാഹം നിയമപരമെന്ന് പാകിസ്ഥാൻ കോടതി; പ്രതിഷേധവുമായി ക്രൈസ്തവ സമൂഹം

പാകിസ്ഥാനിൽ 13 വയസ്സുകാരിയായ ക്രൈസ്തവ പെൺകുട്ടിയെ 30 വയസ്സുകാരനായ മുസ്ലിം പുരുഷൻ വിവാഹം കഴിച്ചത് നിയമപരമാണെന്ന കോടതി വിധിയിൽ പ്രതിഷേധിച്ച് ക്രൈസ്തവ സമൂഹം തെരുവിലിറങ്ങി. ‘മരിയയുടെ കേസ്’ എന്നറിയപ്പെടുന്ന ഈ സംഭവത്തിൽ, പെൺകുട്ടിയെ തട്ടിക്കൊണ്ടുപോയി നിർബന്ധിച്ച് മതപരിവർത്തനം നടത്തുകയായിരുന്നുവെന്ന് കുടുംബം ആരോപിക്കുന്നു.

വിഷയം ഗൗരവമായതോടെ, നിർബന്ധിത മതപരിവർത്തനവും വിവാഹവും തടയുന്നതിനുള്ള മാർഗ്ഗനിർദ്ദേശങ്ങൾ ഏകോപിപ്പിക്കുന്നതിനായി പാകിസ്ഥാൻ ഫെഡറൽ സർക്കാർ 37 അംഗ ദേശീയ സമിതി രൂപീകരിച്ചു. കത്തോലിക്കാ, പ്രൊട്ടസ്റ്റന്റ് ബിഷപ്പുമാരും ഈ സമിതിയിൽ അംഗങ്ങളാണ്.

പഞ്ചാബ് പ്രവിശ്യയുടെ തലസ്ഥാനമായ ലാഹോറിൽ നിന്നുള്ള മരിയ ഷഹബാസ് എന്ന 13 വയസ്സുകാരിയുടെ വിവാഹം മാർച്ച് 25-നാണ് ഫെഡറൽ കോൺസ്റ്റിറ്റ്യൂഷണൽ കോടതി ശരിവെച്ചത്. 2025 ജൂലൈയിൽ തന്റെ മകളെ തട്ടിക്കൊണ്ടുപോയി നിർബന്ധപൂർവ്വം ഇസ്ലാം മതത്തിലേക്ക് മാറ്റിയതാണെന്ന് ചൂണ്ടിക്കാട്ടി പിതാവ് നൽകിയ ഹർജി തള്ളിക്കൊണ്ടായിരുന്നു കോടതിയുടെ ഈ വിവാദ വിധി.

ഈ വിധി നീതിന്യായ വ്യവസ്ഥയുടെ പരാജയമാണെന്ന് ലാഹോർ ആർച്ച് ബിഷപ്പ് ഖാലിദ് റഹ്മത്ത് പറഞ്ഞു. ഇത് രാജ്യത്തെ ന്യൂനപക്ഷ പെൺകുട്ടികളുടെ സുരക്ഷയെ ദുർബലപ്പെടുത്തുമെന്നും അദ്ദേഹം മുന്നറിയിപ്പ് നൽകി. ഏപ്രിൽ 10-ന് സതേൺ പഞ്ചാബിൽ നടന്ന പ്രതിഷേധ റാലിയിൽ മുൾട്ടാൻ ബിഷപ്പ് യൂസഫ് സോഹൻ മരിയയ്ക്ക് നീതി വേണമെന്ന് ആവശ്യപ്പെട്ടു.

പാകിസ്ഥാനിൽ ഓരോ വർഷവും ഏകദേശം 1,000-ത്തോളം അമുസ്ലിം സ്ത്രീകളും പെൺകുട്ടികളും നിർബന്ധിത മതപരിവർത്തനത്തിനും വിവാഹത്തിനും ഇരയാകുന്നുണ്ടെന്ന് കത്തോലിക്കാ രാഷ്ട്രീയ നേതാവ് സർഫ്രാസ് ക്ലെമന്റ് പറഞ്ഞു. ലാഹോർ കേന്ദ്രമായി പ്രവർത്തിക്കുന്ന സെന്റർ ഫോർ സോഷ്യൽ ജസ്റ്റിസിന്റെ കണക്കനുസരിച്ച്, 2024-ൽ മാത്രം പഞ്ചാബ് പ്രവിശ്യയിൽ ക്രൈസ്തവ പെൺകുട്ടികളെ തട്ടിക്കൊണ്ടുപോയി മതം മാറ്റിയ 83 കേസുകൾ റിപ്പോർട്ട് ചെയ്തിട്ടുണ്ട്. യഥാർത്ഥ കണക്കുകൾ ഇതിലും ഉയരാനാണ്‌ സാധ്യത.

ഇതിനിടെ, വിവാഹപ്രായം സ്ത്രീപുരുഷ ഭേദമന്യേ 18 വയസ്സായി നിശ്ചയിച്ചുകൊണ്ടുള്ള ‘ചൈൽഡ് മാര്യേജ് റെസ്ട്രെയിന്റ് ബിൽ 2026’ പഞ്ചാബ് അസംബ്ലിയുടെ സ്റ്റാൻഡിങ് കമ്മിറ്റി അംഗീകരിച്ചു. എന്നാൽ, ചില യാഥാസ്ഥിതിക ഇസ്ലാമിക അംഗങ്ങൾ ഇതിനെ എതിർക്കുന്നുണ്ട്. നിലവിൽ സിന്ധ്, ബലൂചിസ്ഥാൻ, ഇസ്ലാമാബാദ് എന്നിവിടങ്ങളിൽ പെൺകുട്ടികളുടെ വിവാഹപ്രായം 18 ആണ്. എന്നാൽ ഖൈബർ പഖ്തുൻഖ്വ പ്രവിശ്യയിൽ ഇത് ഇപ്പോഴും 16 വയസ്സായി തുടരുന്നു.

അതേസമയം നിർബന്ധിത വിവാഹങ്ങൾ തടയുന്നതിനുള്ള ശ്രമങ്ങളെ ഫൈസലാബാദിലെ നാഷണൽ കാത്തലിക് കമ്മീഷൻ ഡയറക്ടർ ഫാദർ ഖാലിദ് റഷീദ് അസി സ്വാഗതം ചെയ്തു. ഇത്തരം നിയമനിർമ്മാണങ്ങളിൽ സഭാ നേതാക്കളുടെയും മറ്റ് ബന്ധപ്പെട്ടവരുടെയും അഭിപ്രായം തേടേണ്ടത് അത്യാവശ്യമാണെന്നും അദ്ദേഹം ഓർമ്മിപ്പിച്ചു.