അംഗോളയിൽ വിശ്വാസസാഗരം: ഉത്ഥിതനായ ക്രിസ്തുവിന്റെ പാത പിന്തുടരാൻ സൗറിമോയിൽ മാർപാപ്പയുടെ ആഹ്വാനം

ആത്മീയ ചൈതന്യവും പ്രത്യാശയും പകർന്ന് ലെയോ പതിനാലാമൻ മാർപാപ്പയുടെ അംഗോള സന്ദർശനം തുടരുന്നു. നാല് രാഷ്ട്രങ്ങളിലെ അപ്പസ്തോലിക യാത്രയുടെ ഭാഗമായി സൗറിമോയിൽ എത്തിയ പരിശുദ്ധ പിതാവ്, അവിടെ അർപ്പിച്ച വിശുദ്ധ കുർബാനയിൽ ആയിരക്കണക്കിന് വിശ്വാസികളെ അഭിസംബോധന ചെയ്തു.

ഉത്ഥിതനായ ക്രിസ്തു നമ്മുടെ പാതകളെ പ്രകാശിപ്പിക്കുകയും നമ്മെ വിശുദ്ധീകരിക്കുകയും ചെയ്യുന്നുവെന്ന് മാർപാപ്പ തന്റെ സന്ദേശത്തിൽ ഓർമ്മിപ്പിച്ചു.

ഭൗതികമായ നേട്ടങ്ങൾക്കോ സ്വന്തം താൽപ്പര്യങ്ങൾക്കോ വേണ്ടിയല്ല ദൈവത്തെ തേടേണ്ടതെന്ന് മാർപാപ്പ ഓർമ്മിപ്പിച്ചു. “നശ്വരമായ ഭക്ഷണത്തിനുവേണ്ടിയല്ല, മറിച്ച് നിത്യജീവൻ നൽകുന്ന അനശ്വരമായ ഭക്ഷണത്തിനായി നാം അധ്വാനിക്കണം,” എന്ന് ലെയോ പാപ്പ പറഞ്ഞു.

പലപ്പോഴും വിശ്വാസം എന്നത് അന്ധവിശ്വാസങ്ങൾക്കും സ്വാർത്ഥതയ്ക്കും വഴിമാറുന്നതിനെക്കുറിച്ചും പാപ്പ ആശങ്ക പ്രകടിപ്പിച്ചു. ദൈവത്തെ ഒരു ‘ഭാഗ്യചിഹ്നമായോ’ വിഗ്രഹമായോ കാണുന്ന രീതി ഉപേക്ഷിച്ച്, ഹൃദയപൂർവ്വമായ സ്നേഹത്തോടെ ക്രിസ്തുവിനെ പിന്തുടരാൻ പാപ്പ വിശ്വാസികളെ ക്ഷണിച്ചു.

ദൈവം തുറന്നുതന്ന പാത ഒരിക്കലും പരാജയപ്പെടില്ലെന്ന് ഉറപ്പുനൽകിക്കൊണ്ടാണ് മാർപാപ്പ പ്രസംഗം അവസാനിപ്പിച്ചത്. വിശ്വാസികളുടെ ഹൃദയങ്ങളിൽ പ്രത്യാശയുടെ കനൽ കോരിയിട്ട ഈ സന്ദർശനം അംഗോളയിലെ സഭയ്ക്കും ജനങ്ങൾക്കും വലിയ ആത്മീയ ഉണർവാണ് നൽകിയിരിക്കുന്നത്.