മോർഫ് ചെയ്ത ദൃശ്യങ്ങൾ പ്രചരിപ്പിച്ചു, വടകരയിലെ യുവാവിന്റെ തിരോധാനത്തിൽ ലോൺ മാഫിയയുടെ ക്രൂരത വെളിപ്പെടുത്തുന്ന ചാറ്റുകൾ പുറത്ത്

കോഴിക്കോട്: വടകര ആയഞ്ചേരി സ്വദേശിയായ വിഷ്ണുവിനെ (25) കാണാതായ സംഭവത്തിന് പിന്നിൽ ലോൺ ആപ്പ് മാഫിയയുടെ ഭീഷണിയാണെന്ന് സ്ഥിരീകരിക്കുന്ന തെളിവുകൾ പുറത്ത്. തന്റെ മോർഫ് ചെയ്ത ചിത്രങ്ങൾ ലോൺ സംഘം പ്രചരിപ്പിച്ചുവെന്ന് വിഷ്ണു സഹോദരനോട് വെളിപ്പെടുത്തുന്ന വാട്‌സ്ആപ്പ് സന്ദേശങ്ങളാണ് ഇപ്പോൾ പുറത്തുവന്നിരിക്കുന്നത്. തിരോധാനത്തിൽ ലോൺ മാഫിയയുടെ പങ്ക് അടിവരയിടുന്നതാണ് ഈ നിർണ്ണായക വെളിപ്പെടുത്തൽ.

മുമ്പ് ജിയോയിൽ ഗ്രൗണ്ട് സ്റ്റാഫായി ജോലി ചെയ്തിരുന്ന സമയത്താണ് വിഷ്ണു ഒരു ഓൺലൈൻ ആപ്പ് വഴി 10,000 രൂപ വായ്പയെടുത്തത്. ജോലി നഷ്ടപ്പെട്ടതോടെ തിരിച്ചടവ് മുടങ്ങി. ഇതോടെയാണ് ലോൺ സംഘം ഭീഷണി ആരംഭിച്ചത്. വിഷ്ണുവിന്റെ ചിത്രങ്ങൾ മോർഫ് ചെയ്ത് പ്രചരിപ്പിച്ച സംഘം, ബന്ധുക്കളെയും സുഹൃത്തുക്കളെയും വിളിച്ച് അപമാനിക്കുമെന്നും വീട്ടിലെത്തുമെന്നും ഭീഷണിപ്പെടുത്തി. വിഷ്ണുവിന്റെ ഫോൺ സ്വിച്ച് ഓഫ് ആയതോടെ, വായ്പ കുടിശ്ശികയുണ്ടെന്ന് ആരോപിച്ച് ബന്ധുക്കളെയും സുഹൃത്തുക്കളെയും ലോൺ സംഘം വിളിച്ച് ശല്യം ചെയ്യാനും തുടങ്ങിയതായി പരാതിയുണ്ട്.

ഈ മാസം 13-ാം തീയതിയാണ് വിഷ്ണുവിനെ കാണാതായത്. ബാങ്കിലേക്ക് പോകുന്നുവെന്ന് പറഞ്ഞ് വീട്ടിൽ നിന്നിറങ്ങിയ വിഷ്ണു, രാത്രിയിൽ താൻ കോഴിക്കോട്ടേക്ക് പോവുകയാണെന്നും വൈകുമെന്നും വീട്ടുകാരെ അറിയിച്ചിരുന്നു. എന്നാൽ പിന്നീട് വിവരമൊന്നും ഉണ്ടായില്ല. പോലീസിന്റെ സൈബർ സെൽ നടത്തിയ അന്വേഷണത്തിൽ കാസർഗോഡാണ് വിഷ്ണുവിന്റെ മൊബൈൽ ടവർ ലൊക്കേഷൻ അവസാനമായി കാണിച്ചത്. വടകര പോലീസ് കേസ് രജിസ്റ്റർ ചെയ്ത് അന്വേഷണം ഊർജിതമാക്കിയിട്ടുണ്ട്. ലോൺ സംഘത്തിന്റെ ഫോൺ കോളുകളും ഡിജിറ്റൽ സന്ദേശങ്ങളും പോലീസ് കേന്ദ്രീകരിച്ച് പരിശോധിക്കുന്നു.

ലോൺ ആപ്പ് കെണികൾ കേരളത്തിൽ വർദ്ധിച്ചുവരുന്ന സാഹചര്യത്തിൽ, ഈ സംഭവം വലിയ ആശങ്കയ്ക്കാണ് വഴിവെച്ചിരിക്കുന്നത്. വിഷ്ണുവിനെ കണ്ടെത്താനായി കാസർഗോഡ് കേന്ദ്രീകരിച്ച് സിസിടിവി ദൃശ്യങ്ങൾ പോലീസ് പരിശോധിച്ചുവരികയാണ്.