യു.ഡി.എഫിൽ മന്ത്രിസ്ഥാന ചർച്ചകൾ ചൂടുപിടിക്കുന്നു: വിട്ടുവീഴ്ചയില്ലാതെ പി.ജെ. ജോസഫ്; പുതുമുഖങ്ങൾക്കായി വാദമുയർത്തി അണികൾ

*തിരുവനന്തപുരം:* നിയമസഭാ തിരഞ്ഞെടുപ്പിൽ മികച്ച വിജയം നേടി അധികാരത്തിലേക്ക് തിരിച്ചെത്തുന്ന യു.ഡി.എഫിൽ മന്ത്രിസഭാ രൂപീകരണവുമായി ബന്ധപ്പെട്ട ഉഭയകക്ഷി ചർച്ചകൾ ക്ലൈമാക്സിലേക്ക്. വലിയ കക്ഷിയായ കോൺഗ്രസിന് പുറമെ ഘടകകക്ഷികളായ മുസ്ലിം ലീഗും കേരള കോൺഗ്രസും (ജോസഫ്) തങ്ങളുടെ ആവശ്യങ്ങൾ ശക്തമായി മുന്നോട്ടുവെച്ചതോടെ ചർച്ചകൾ കൂടുതൽ സങ്കീർണ്ണമായിരിക്കുകയാണ്.

ചീഫ് വിപ്പ് പദവി വേണ്ട, രണ്ട് മന്ത്രിസ്ഥാനം വേണം

മത്സരിച്ച എട്ട് സീറ്റുകളിൽ ഏഴിലും ഉജ്ജ്വല വിജയം നേടിയ കേരള കോൺഗ്രസ് ഇത്തവണ വിട്ടുവീഴ്ചയില്ലാത്ത നിലപാടിലാണ്. മുൻപ് പാർട്ടികൾക്ക് നൽകാറുള്ള ചീഫ് വിപ്പ് പദവി തങ്ങൾക്ക് വേണ്ടെന്ന് പാർട്ടി ചെയർമാൻ പി.ജെ. ജോസഫ് കോൺഗ്രസ് നേതൃത്വത്തെ അറിയിച്ചു കഴിഞ്ഞു. "വലിയ കക്ഷിയായ കോൺഗ്രസ് തന്നെ ചീഫ് വിപ്പ് പദവി കൈവശം വെച്ചോളൂ, ഞങ്ങൾക്ക് അർഹതപ്പെട്ട മന്ത്രിസ്ഥാനങ്ങൾ മതി" എന്നാണ് ചർച്ചകളിൽ ജോസഫിന്റെ നിലപാട്.

ഉമ്മൻ ചാണ്ടി സർക്കാരിന്റെ കാലത്ത് കൈകാര്യം ചെയ്തിരുന്ന ജലവിഭവ വകുപ്പിന് പുറമെ, പൊതുമരാമത്തോ കൃഷിയോ വേണമെന്ന ആവശ്യവും കേരള കോൺഗ്രസ് മുന്നോട്ടുവെച്ചിട്ടുണ്ട്. എന്നാൽ പൊതുമരാമത്ത് വകുപ്പ് വിട്ടുനൽകാൻ മുസ്ലിം ലീഗ് തയ്യാറാകാത്ത സാഹചര്യത്തിൽ വി.ഡി. സതീശന്റെ നേതൃത്വത്തിൽ ചർച്ചകൾ തുടരുകയാണ്. മോൻസ് ജോസഫ്, അപു ജോൺ ജോസഫ് എന്നിവരും പി.ജെ. ജോസഫിനൊപ്പം ചർച്ചകളിൽ പങ്കെടുക്കുന്നുണ്ട്.

### പുതുമുഖങ്ങൾക്ക് അവസരം വേണം; അപു ജോൺ ജോസഫിനായി ആവശ്യം

മന്ത്രിസഭാ രൂപീകരണ ചർച്ചകൾ പുരോഗമിക്കുമ്പോൾ കേരള കോൺഗ്രസിനുള്ളിൽ നിന്നും അണികളിൽ നിന്നും പുതുമുഖങ്ങളെ കൊണ്ടുവരണമെന്ന ആവശ്യം ശക്തമാണ്. മുൻ ആഭ്യന്തര മന്ത്രി കൂടിയായ മുതിർന്ന നേതാവ് രമേശ് ചെന്നിത്തലയെ മാറ്റിനിർത്തി, മുഖ്യമന്ത്രി പദത്തിലേക്ക് കോൺഗ്രസ് വി.ഡി. സതീശനെ നിയോഗിച്ച മാതൃക കേരള കോൺഗ്രസും പിന്തുടരണമെന്നാണ് രാഷ്ട്രീയ നിരീക്ഷകനായ സാബു ജോസിനെപ്പോലുള്ളവർ ചൂണ്ടിക്കാണിക്കുന്നത്.

ഭരണരംഗത്ത് പുതുരക്തം വരണമെന്ന താല്പര്യപ്രകാരം അപു ജോൺ ജോസഫിനെ മന്ത്രിയാക്കണമെന്ന വാദമാണ് ഇപ്പോൾ ഉയരുന്നത്. തിരഞ്ഞെടുപ്പ് രാഷ്ട്രീയത്തിൽ നിന്ന് സ്വയം മാറിനിന്ന് പാർട്ടിയെ വൻ വിജയത്തിലേക്ക് നയിച്ച പി.ജെ. ജോസഫ് സാറിനെ വേദനിപ്പിക്കുന്ന ഒരു തീരുമാനവും കോൺഗ്രസിന്റെ ഭാഗത്തുനിന്ന് ഉണ്ടാകരുത് എന്നും അണികൾ മുന്നറിയിപ്പ് നൽകുന്നു.

മധ്യകേരളത്തിന്റെ പ്രാതിനിധ്യവും 'ജോസ് കെ. മാണി' പാഠവും

ഇടതുമുന്നണിയിൽ മത്സരിച്ച കേരള കോൺഗ്രസ് (എം) ഇത്തവണ ദയനീയമായി പരാജയപ്പെട്ടപ്പോൾ, യു.ഡി.എഫിൽ വലിയ വിജയം കൊയ്ത പി.ജെ. ജോസഫിന്റെ കരുത്ത് വി.ഡി. സതീശനും ടീമും മറക്കരുത് എന്നാണ് ഉയരുന്ന പ്രധാന വികാരം. മധ്യകേരളത്തിലും ക്രൈസ്തവ ന്യൂനപക്ഷങ്ങൾക്കിടയിലും യു.ഡി.എഫിന് ഉണ്ടായ സ്വാധീനം നിലനിർത്താൻ കേരള കോൺഗ്രസിന് അർഹമായ പ്രാതിനിധ്യം നൽകേണ്ടതുണ്ട്.

ഒരൊറ്റ മന്ത്രിസ്ഥാനം കൊണ്ട് കേരള കോൺഗ്രസ് തൃപ്തിപ്പെടരുത് എന്ന സമ്മർദ്ദവും ശക്തമാണ്. ഇടതുമുന്നണിയിൽ റോഷി അഗസ്റ്റിന് ഏക മന്ത്രിസ്ഥാനം നൽകി ഒതുങ്ങേണ്ടി വന്ന ജോസ് കെ. മാണിയുടെ ദയനീയ അവസ്ഥ നമ്മുടെ മുന്നിലുണ്ട്. അതിനാൽ സിറ്റിംഗ് എം.എൽ.എയായ മോൻസ് ജോസഫ് ഒറ്റ മന്ത്രിസ്ഥാനം മാത്രമായി അംഗീകരിക്കരുത് എന്നും, ഇനി ഒരൊറ്റ മന്ത്രിസ്ഥാനമേ ലഭിക്കൂ എങ്കിൽ അത് പി.ജെ. ജോസഫിന്റെ മകനായ അപു ജോൺ ജോസഫിന് അവകാശപ്പെട്ടതാണെന്നുമാണ് പാർട്ടിയിലെ ഒരു വിഭാഗത്തിന്റെ നിലപാട്.

ചെറുകക്ഷികൾക്ക് കാലാവധി നിശ്ചയിക്കണം

കോൺഗ്രസും മുസ്ലിം ലീഗും ഇത്തവണ പുതിയ വ്യക്തികൾക്ക് കൂടുതൽ അവസരം നൽകണമെന്ന ആവശ്യവും ശക്തമാണ്. അതുപോലെ തന്നെ യു.ഡി.എഫിലെ ഒരൊറ്റ എം.എൽ.എമാർ മാത്രമുള്ള ചെറുകക്ഷികൾക്ക് മന്ത്രിസ്ഥാനം നൽകുമ്പോൾ, അത് അഞ്ചുവർഷം പൂർണ്ണമായി നൽകാതെ കൃത്യമായ കാലാവധി നിശ്ചയിച്ച് പങ്കിട്ടു നൽകാൻ യു.ഡി.എഫ് നേതൃത്വം തയ്യാറാകണമെന്ന നിർദ്ദേശവും ചർച്ചകളിലേക്ക് വരുന്നുണ്ട്.

വരും ദിവസങ്ങളിൽ നടക്കാനിരിക്കുന്ന ഉന്നതതല യു.ഡി.എഫ് യോഗങ്ങളിൽ ഈ ആവശ്യങ്ങളന്മേൽ അന്തിമ തീരുമാനമുണ്ടാകും. ഘടകകക്ഷികളെ പിണക്കാതെയും പുതുമുഖങ്ങൾക്ക് പ്രാധാന്യം നൽകിയും വി.ഡി. സതീശൻ എങ്ങനെ മന്ത്രിസഭ രൂപീകരിക്കുമെന്നാണ് കേരള രാഷ്ട്രീയം ഉറ്റുനോക്കുന്നത്.

 സാബു ജോസ് .
എറണാകുളം