വടക്കൻ മ്യാൻമറിൽ ഡിസംബർ 25 ന് ക്രിസ്തുമസ് ആഘോഷങ്ങൾ നിരോധിച്ച് സൈനിക ഭരണകൂടം

മ്യാൻമറിന്റെ വടക്കൻ മേഖലയിൽ ഡിസംബർ 20 ന് മുമ്പ് ക്രിസ്തുമസ് ആഘോഷിക്കണമെന്ന് സൈനിക ഭരണകൂടം ഉത്തരവിട്ടു. ഡിസംബർ 25-ാം തീയതി ആഘോഷിക്കുന്നത് ആ പ്രദേശത്ത് മാസാവസാനം നടക്കാനിരിക്കുന്ന തിരഞ്ഞെടുപ്പിന് വളരെ അടുത്താണെന്നാണ് സൈനിക ഭരണകൂടത്തിന്റെ വാദം.

ഈ നടപടി പ്രാദേശിക തലസ്ഥാനമായ മൈറ്റ്കിനയിലെയും പുട്ടാവോ, തനായി, നവാങ് മുൻ മുനിസിപ്പാലിറ്റികളിലെയും ക്രൈസ്തവരെയും ബാധിക്കുമെന്ന് ഏഷ്യാ ന്യൂസ് ഏജൻസി റിപ്പോർട്ട് ചെയ്തു. “തിരഞ്ഞെടുപ്പ് കാരണമാണ് ഇത്. സാധാരണയായി ഡിസംബർ 25 ന് അവ നടത്തുകയാണെങ്കിൽ, അത് തിരഞ്ഞെടുപ്പിന് വളരെ അടുത്തായിരിക്കും” എന്ന് പുട്ടാവോ മുനിസിപ്പാലിറ്റിയുടെ ജനറൽ അഡ്മിനിസ്ട്രേഷൻ ഡിപ്പാർട്ട്‌മെന്റിലെ ഒരു അംഗം പ്രാദേശിക മാധ്യമങ്ങളോട് പറഞ്ഞു.

2021 ലെ അട്ടിമറി മുതൽ മ്യാൻമർ ഭരിക്കുന്നത് സൈനിക ഭരണകൂടമാണ്. അതിനുശേഷം രാജ്യത്ത് ആഭ്യന്തര യുദ്ധം ആരംഭിച്ചു. നിരവധി പള്ളികളും മതപരമായ കെട്ടിടങ്ങളേയും ബാധിക്കുന്ന ആക്രമണങ്ങൾക്ക് ഇത് വഴിവെച്ചു. ഡിസംബർ 25 ന് പൊതു ക്രിസ്മസ് ആഘോഷങ്ങൾ നടത്തുന്നതിനുള്ള നിരോധനം പ്രദേശത്തെ വിശ്വാസികൾ നിരസിച്ചു.

“പ്രധാനമായും ക്രൈസ്തവരുള്ള ഈ പ്രദേശത്തെ സംബന്ധിച്ചിടത്തോളം, ഭരണകൂടത്തിന്റെ ഉത്തരവ് ഒരു ലോജിസ്റ്റിക് ക്രമീകരണമല്ല. മറിച്ച് ബോധപൂർവമായ നിയന്ത്രണത്തിന്റെയും അടിച്ചമർത്തലിന്റെയും നടപടിയാണ്.” ഏഷ്യാ ന്യൂസ് പറയുന്നു. സാധ്യമായ പ്രത്യാഘാതങ്ങൾ ഭയന്ന് മിക്ക പള്ളികളും 18, 19 തീയതികളിലേക്ക് അവരുടെ പ്രവർത്തനങ്ങൾ പുനഃക്രമീകരിച്ചതായും റിപ്പോർട്ട് സൂചിപ്പിക്കുന്നു.

“സൈന്യം അധികാരം നിലനിർത്തുന്നിടത്തോളം, മതസ്വാതന്ത്ര്യത്തിനുള്ള സാധ്യതകൾ ഇരുളടഞ്ഞതായി തുടരും. രാജ്യത്തുടനീളം നിലനിൽക്കുന്ന സമാധാനം സ്ഥാപിക്കുന്നതിലൂടെയും, എല്ലാ മതങ്ങളിലെയും വംശങ്ങളിലെയും ആളുകളുടെ മനുഷ്യാവകാശങ്ങൾ ഉയർത്തിപ്പിടിക്കുന്ന ഒരു യഥാർത്ഥ ബഹുകക്ഷി ഫെഡറൽ ജനാധിപത്യം സ്ഥാപിക്കുന്നതിലൂടെയും മാത്രമേ ഗണ്യമായ പുരോഗതി കൈവരിക്കാൻ കഴിയൂ.” മ്യാൻമറിനെക്കുറിച്ചുള്ള റിപ്പോർട്ടിൽ പറയുന്നത് ഇപ്രകാരമാണ്.

മ്യാൻമറിലെ 54 ദശലക്ഷം ജനസംഖ്യയിൽ 8.1% ക്രിസ്ത്യാനികളാണെന്ന് എയ്ഡ് ടു ദി ചർച്ച് ഇൻ നീഡിന്റെ 2025 ലെ മതസ്വാതന്ത്ര്യ റിപ്പോർട്ട് സൂചിപ്പിക്കുന്നു. ബഹുഭൂരിപക്ഷവും – 76.4% – ബുദ്ധമതക്കാരാണ്.