ഇറാൻ യുദ്ധം കാരണം ലോകമെമ്പാടുമുള്ള ജനങ്ങളുടെ ശമ്പളത്തെയും തൊഴിൽ സാഹചര്യങ്ങളെയും ദോഷകരമായി ബാധിക്കുന്നതായി പുതിയ അന്താരാഷ്ട്ര പഠന റിപ്പോർട്ട് വ്യക്തമാക്കുന്നു. വരും വർഷങ്ങളിൽ ലക്ഷക്കണക്കിന് ആളുകൾക്ക് ജോലി നഷ്ടപ്പെടാനും തൊഴിലാളികളുടെ വരുമാനം വൻതോതിൽ കുറയാനും ഈ യുദ്ധം കാരണമാകുമെന്ന് ഐക്യരാഷ്ട്ര സംഘടനയുടെ അന്താരാഷ്ട്ര തൊഴിൽ സംഘടന മുന്നറിയിപ്പ് നൽകി. ഇന്ധനവില വർദ്ധനവ്, ഗതാഗത തടസ്സങ്ങൾ, വിനോദസഞ്ചാര മേഖലയിലെ തകർച്ച എന്നിവയാണ് ലോകരാജ്യങ്ങളുടെ സമ്പദ്‌വ്യവസ്ഥയെ പ്രധാനമായും പ്രതിസന്ധിയിലാക്കുന്നത്.

ഈ വർഷം ആഗോളതലത്തിൽ ജനങ്ങളുടെ വരുമാനത്തിൽ വലിയ കുറവുണ്ടാകുമെന്നും മിഡിൽ ഈസ്റ്റ് രാജ്യങ്ങളെയും ഏഷ്യൻ രാജ്യങ്ങളെയും ആയിരിക്കും ഇത് ഏറ്റവും കൂടുതൽ ബാധിക്കുകയെന്നും റിപ്പോർട്ടിൽ പറയുന്നു. പ്രത്യേകിച്ച് വിദേശങ്ങളിൽ ജോലി ചെയ്ത് നാട്ടിലേക്ക് പണമയക്കുന്ന പ്രവാസി തൊഴിലാളികളെയാണ് ഈ പ്രതിസന്ധി ദോഷകരമായി ബാധിക്കാൻ പോകുന്നത്. ആഗോള തൊഴിൽ വിപണിയെ ദീർഘകാലത്തേക്ക് തകിടം മറിക്കുന്ന വലിയൊരു ആഘാതമായി ഈ യുദ്ധം മാറിക്കൊണ്ടിരിക്കുകയാണെന്ന് സാമ്പത്തിക വിദഗ്ദ്ധർ ചൂണ്ടിക്കാണിക്കുന്നു.

അതേസമയം യുദ്ധം അവസാനിപ്പിക്കുന്നതിനായുള്ള ഇറാന്റെ പുതിയ നിർദ്ദേശങ്ങൾ മധ്യസ്ഥത വഹിക്കുന്ന പാകിസ്ഥാൻ കഴിഞ്ഞ ദിവസം അമേരിക്കയ്ക്ക് കൈമാറിയിട്ടുണ്ട്. തർക്കങ്ങൾ പരിഹരിച്ച് സമാധാനം കണ്ടെത്താൻ ഇരുരാജ്യങ്ങൾക്കും മുന്നിൽ ഇനി വളരെ കുറഞ്ഞ സമയം മാത്രമാണുള്ളതെന്ന് ഔദ്യോഗിക വൃത്തങ്ങൾ സൂചിപ്പിച്ചു. സമാധാന ചർച്ചകൾ പരാജയപ്പെടുകയാണെങ്കിൽ യുദ്ധം വീണ്ടും തുടങ്ങുന്നതിനെക്കുറിച്ചുള്ള അടുത്ത നീക്കങ്ങൾ ചർച്ച ചെയ്യാൻ അമേരിക്കൻ പ്രസിഡന്റ് ഡൊണാൾഡ് ട്രംപ് സൈനിക മേധാവിമാരുടെ അടിയന്തര യോഗം വിളിച്ചിട്ടുണ്ട്.