ഡൽഹി സ്വദേശിനിയായ ഇന്ത്യൻ വിദ്യാർത്ഥിനി കാനഡയിൽ മരിച്ചു; കാരണം വ്യക്തമല്ലെന്ന് കോൺസുലേറ്റ് അധികൃതർ
ന്യൂഡൽഹി: കാനഡയിൽ പഠിക്കുന്ന ഇന്ത്യൻ വിദ്യാർത്ഥിനി മരിച്ചു. കാനഡയിലെ കാൽഗറി സർവകലാശാലയിൽ പഠിക്കുന്ന ഡൽഹി സ്വദേശിനി തന്യ ത്യാഗിയാണ് മരിച്ചത്. യുവതിയുടെ പെട്ടന്നുള്ള മരണത്തിന്റെ കാരണം വ്യക്തമല്ലെന്നും വാൻകൂവറിലെ കോൺസുലേറ്റ് ജനറൽ ഓഫ് ഇന്ത്യ അറിയിച്ചു.
കനേഡിയൻ അധികൃതരുമായി നിരന്തരം സമ്പർക്കം പുലർത്തുന്നുണ്ടെന്നും ത്യാഗിയുടെ കുടുംബത്തിന് ആവശ്യമായ എല്ലാ സഹായങ്ങളും വാഗ്ദാനം ചെയ്യുമെന്നും കോൺസുലേറ്റ് എക്‌സിലെ പ്രസ്താവനയിൽ പറഞ്ഞു.
“കാല്‍ഗറി സര്‍വകലാശാലയിലെ ഇന്ത്യന്‍ വിദ്യാര്‍ത്ഥിനിയായ ശ്രീമതി തന്യ ത്യാഗിയുടെ പെട്ടെന്നുള്ള മരണത്തിൽ ഞങ്ങള്‍ ദുഃഖിതരാണ്. കോണ്‍സുലേറ്റ് അധികൃതരുമായി ബന്ധപ്പെട്ടിട്ടുണ്ട്. ദുഃഖിതരായ കുടുംബത്തിന് ആവശ്യമായ എല്ലാ സഹായങ്ങളും നല്‍കും. മരിച്ചയാളുടെ കുടുംബത്തിനും സുഹൃത്തുക്കള്‍ക്കും ഞങ്ങളുടെ ഹൃദയംഗമമായ അനുശോചനവും പ്രാര്‍ത്ഥനയും അറിയിക്കുന്നു,” പ്രസ്താവനയില്‍ പറയുന്നു.
തന്യ ത്യാഗിയുടെ മരണകാരണമോ സാഹചര്യമോ സംബന്ധിച്ച കൂടുതൽ വിവരങ്ങൾ ഉദ്യോഗസ്ഥർ ഇതുവരെ പുറത്തുവിട്ടിട്ടില്ല. ഹൃദയാഘാതം മൂലമാണ് അവർ മരിച്ചതെന്ന് സ്ഥിരീകരിക്കാത്ത റിപ്പോർട്ടുകളും പുറത്തുവരുന്നുണ്ട്.