സംസ്ഥാനത്ത് കടുത്ത ചൂട്, എട്ട് ജില്ലകളിൽ യെല്ലോ അലർട്ട്, വോട്ടെടുപ്പ് ദിനത്തിലും ജാഗ്രത

തിരുവനന്തപുരം: സംസ്ഥാനത്ത് വേനൽച്ചൂട് റെക്കോർഡ് നിലയിലേക്ക്. ഉയർന്ന താപനില കണക്കിലെടുത്ത് വോട്ടെടുപ്പ് ദിനമായ വ്യാഴാഴ്ച വരെ എട്ട് ജില്ലകളിൽ കേന്ദ്ര കാലാവസ്ഥാ വകുപ്പ് യെല്ലോ അലർട്ട് പ്രഖ്യാപിച്ചു. സാധാരണയേക്കാൾ 2 മുതൽ 3 ഡിഗ്രി സെൽഷ്യസ് വരെ ചൂട് വർധിക്കാനിടയുള്ളതിനാൽ സൂര്യാഘാതം ഉൾപ്പെടെയുള്ള ആരോഗ്യപ്രശ്നങ്ങൾക്കെതിരെ ജാഗ്രത പാലിക്കണമെന്ന് സംസ്ഥാന ദുരന്തനിവാരണ അതോറിറ്റി മുന്നറിയിപ്പ് നൽകി.

വ്യാഴാഴ്ച വരെ പാലക്കാട് ജില്ലയിൽ ഉയർന്ന താപനില 38 °C വരെയും കൊല്ലം, കോട്ടയം, തൃശൂർ ജില്ലകളിൽ 37°C വരെയും രേഖപ്പെടുത്തുമെന്നാണ് കാലാവസ്ഥ വകുപ്പിന്റെ പ്രവചനം. തിരുവനന്തപുരം, പത്തനംതിട്ട, ആലപ്പുഴ, എറണാകുളം ജില്ലകളിൽ ഉയർന്ന താപനില 36°C വരെയും ഉയരാൻ സാധ്യതയുണ്ട്. ഈ ജില്ലകളിൽ സാധാരണയേക്കാൾ 2 മുതൽ 3 ഡി​ഗ്രി സെൽഷ്യസ് വരെ കൂടുതൽ ചൂട് അനുഭവപ്പെടാൻ സാധ്യതയുള്ളതിനാൽ ജാ​ഗ്രത പാലിക്കണം. ഉയർന്ന താപനിലയും ഈർപ്പമുള്ള വായുവും കാരണം ഈ ജില്ലകളിൽ മലയോര മേഖലകളിലൊഴികെ ഈ ദിവസങ്ങളിലും ചൂടും അസ്വസ്ഥതയുമുള്ള കാലാവസ്ഥയ്ക്ക് സാധ്യതയുണ്ടെന്നും മുന്നറിയിപ്പിൽ പറയുന്നു.

വോട്ടെടുപ്പ് ഡ്യൂട്ടിയിലുള്ളവർക്കും വോട്ടർമാർക്കും ജാഗ്രതാ നിർദ്ദേശം:

തിരഞ്ഞെടുപ്പ് പ്രവർത്തനങ്ങളിൽ ഏർപ്പെട്ടിരിക്കുന്ന ഉദ്യോഗസ്ഥരും സ്ഥാനാർത്ഥികളും വോട്ടർമാരും കർശനമായ മുൻകരുതലുകൾ സ്വീകരിക്കണം.

വെള്ളം കുടിക്കുന്നത് ശീലമാക്കുക: ദാഹം തോന്നിയില്ലെങ്കിലും കൃത്യമായ ഇടവേളകളിൽ വെള്ളം കുടിക്കണം. നിർജലീകരണം ഒഴിവാക്കാൻ ഉദ്യോഗസ്ഥർക്കും ഏജന്റുമാർക്കും കുടിവെള്ളം ഉറപ്പാക്കണം.

വെയിൽ ഒഴിവാക്കുക: പകൽ 11 മണി മുതൽ 3 മണി വരെ നേരിട്ട് വെയിലേൽക്കുന്നത് ഒഴിവാക്കണം. വോട്ട് ചെയ്യാൻ എത്തുന്നവർ കുടയോ തൊപ്പിയോ കരുതുന്നത് ഉചിതമായിരിക്കും.

പൊതുയോഗങ്ങൾക്കും റാലികൾക്കും നിയന്ത്രണം: സ്ഥാനാർത്ഥി പര്യടനങ്ങളും റോഡ് ഷോകളും വൈകുന്നേരം 4 മണിക്ക് ശേഷം ക്രമീകരിക്കുന്നതാണ് ഉചിതം.

പ്രഥമ ശുശ്രൂഷ: പോളിങ് ബൂത്തുകൾക്കും പൊതുയോഗങ്ങൾക്കും സമീപം കുടിവെള്ള സൗകര്യവും അത്യാവശ്യ ഘട്ടങ്ങളിൽ പ്രഥമ ശുശ്രൂഷ നൽകാനുള്ള ക്രമീകരണങ്ങളും സംഘാടകർ ഉറപ്പാക്കണം.

സൂര്യാഘാതം, സൂര്യാതപം തുടങ്ങിയവ ഒഴിവാക്കാൻ അയഞ്ഞ പരുത്തി വസ്ത്രങ്ങൾ ധരിക്കാനും പാദരക്ഷകൾ ഉപയോഗിക്കാനും ആരോഗ്യ വകുപ്പ് നിർദ്ദേശിച്ചു.