മേഖലയിലെ സംഘർഷങ്ങൾക്ക് അറുതി വരുത്താനുള്ള നിർണ്ണായക നീക്കത്തിന്റെ ഭാഗമായി ഇസ്രായേലും ലെബനനും തമ്മിലുള്ള ചരിത്രപരമായ കൂടിക്കാഴ്ച നാളെ നടക്കുമെന്ന് യുഎസ് പ്രസിഡന്റ് ഡൊണാൾഡ് ട്രംപ് പ്രഖ്യാപിച്ചു. നീണ്ട 34 വർഷത്തെ ഇടവേളയ്ക്ക് ശേഷമാണ് ഇരുരാജ്യങ്ങളും തമ്മിൽ ഇത്തരമൊരു ഉന്നതതല ചർച്ചയ്ക്ക് വഴിയൊരുങ്ങുന്നത്.

മൂന്ന് പതിറ്റാണ്ടിലേറെ നീണ്ട ശത്രുതയ്ക്കും സംഘർഷങ്ങൾക്കും ശേഷം ഇരുരാജ്യങ്ങളും ഒരു മേശയ്ക്ക് ചുറ്റുമിരിക്കുന്നത് പശ്ചിമേഷ്യയിൽ വലിയ മാറ്റങ്ങൾക്ക് കാരണമാകുമെന്ന് വിലയിരുത്തപ്പെടുന്നു. “ഇതൊരു വലിയ ചുവടുവെപ്പാണ്. 34 വർഷത്തെ കാത്തിരിപ്പിന് ശേഷം നാളെ ആ ചരിത്ര നിമിഷം സംഭവിക്കും,” എന്ന് ട്രംപ് പറഞ്ഞു. മേഖലയിൽ സമാധാനം കൊണ്ടുവരാനുള്ള തന്റെ ഭരണകൂടത്തിന്റെ ശ്രമങ്ങളുടെ വിജയമാണിതെന്നും അദ്ദേഹം കൂട്ടിച്ചേർത്തു.

നിലവിലെ വെടിനിർത്തൽ കരാർ കൂടുതൽ ശക്തമാക്കുന്നതിനും അതിർത്തി തർക്കങ്ങൾ പരിഹരിക്കുന്നതിനുമാണ് ഈ ചർച്ചകൾ പ്രാധാന്യം നൽകുന്നത്.ഏതൊക്കെ നേതാക്കളാണ് ചർച്ചയിൽ പങ്കെടുക്കുകയെന്ന് ട്രംപ് വ്യക്തമാക്കിയിട്ടില്ലെങ്കിലും, ഇസ്രായേൽ പ്രധാനമന്ത്രി ബെഞ്ചമിൻ നെതന്യാഹുവും ലെബനൻ പ്രസിഡന്റ് ജോസഫ് ഔണും പങ്കെടുക്കാൻ സാധ്യതയുണ്ടെന്ന് ചില മാധ്യമങ്ങൾ റിപ്പോർട്ട് ചെയ്യുന്നു.