നടിയെ ആക്രമിച്ച കേസ്: മെമ്മറി കാര്ഡിലെ പുനരന്വേഷണത്തില് നിന്നും രണ്ടാമത്തെ ജഡ്ജിയും പിന്മാറി
Jun 10, 2026, 14:07 IST
കൊച്ചി: നടിയെ ആക്രമിച്ച ദൃശ്യങ്ങള് പകര്ത്തിയെന്ന കേസിലെ പ്രധാന തെളിവായ മെമ്മറി കാര്ഡ് കേസിലെ പുനരന്വേഷണം ആവശ്യപ്പെട്ട് പരാതിക്കാരി നല്കിയ ഹര്ജി പരിഗണിക്കുന്നതില് നിന്ന് ഹൈക്കോടതിയിലെ രണ്ടാമത്തെ ജഡ്ജിയും പിന്മാറി. ജസ്റ്റിസ് കൗസര് എടപ്പഗത്താണ് ഹര്ജി പരിഗണിക്കുന്നതില് നിന്ന് പിന്മാറിയത്. ഇനി മറ്റൊരു ബെഞ്ചായിരിക്കും ഹര്ജി പരിഗണിക്കുക.
കേസിലെ പ്രധാന തെളിവായ മെമ്മറികാര്ഡ് കോടതിയുടെ കസ്റ്റഡിയിലിരിക്കേ അനധികൃതമായി പരിശോധിച്ചതില് പുനരന്വേഷണം ആവശ്യപ്പെട്ടാണ് നടി ഹൈക്കോടതിയില് ഹര്ജി സമര്പ്പിച്ചത്.
ഹര്ജി പരിഗണിക്കുന്നതില് നിന്ന് ജഡ്ജി ജസ്റ്റിസ് ജോബിന് സെബാസ്റ്റ്യന് കഴിഞ്ഞദിവസം പിന്മാറിയിരുന്നു. ഹൈക്കോടതി മേല്നോട്ടത്തില് സൈബര് ഫൊറന്സിക് വിദഗ്ധര് ഉള്പ്പെട്ട പ്രത്യേക അന്വേഷണസംഘത്തിന്റെ നേതൃത്വത്തിലുള്ള അന്വേഷണമാണ് നടി ആവശ്യപ്പെടുന്നത്.