'ജീവിതം വ്യത്യസ്ത സമയങ്ങളില്‍ വ്യത്യസ്ത നിറങ്ങള്‍ നിങ്ങള്‍ക്ക് കാണിച്ചുതരും. ഓരോ നിറവും നിങ്ങള്‍ക്ക് വ്യത്യസ്ത അനുഭവങ്ങള്‍ നല്‍കും'' - ഇന്നത്തെ ചിന്താവിഷയം
ജീവിതം അതാണ്, നിറങ്ങളില്‍ ചാലിച്ച് എഴുതിയ കവിത. ജീവിതത്തിന് നിറമോ.? ഇതെന്നാ വര്‍ത്തമാനമാ പറയുന്നത്.? എന്നൊരു ചോദ്യം ഇപ്പോള്‍ മനസ്സില്‍ ഉയരുന്നില്ലേ.
ചില സമയങ്ങളില്‍ നിറഞ്ഞു കവിഞ്ഞും കുതിച്ചുപാഞ്ഞും, മറ്റു ചില അവസരങ്ങളില്‍ മെലിഞ്ഞ്, ശോഷിച്ച് മെല്ലെ ഒഴുകുന്ന നദി പോലെയാണ് മിക്കവരുടെയും ജീവിതം.
സമാധാനവും സന്തോഷവും ഉള്ള ഒരാളുടെ ജീവിതത്തിന് ഏഴഴകാണുള്ളത്. അയാളെ നിറങ്ങളില്‍ നീരാടിക്കുകയാണ് ജീവിതം.
അയാള്‍ കാണുന്നതും കേള്‍ക്കുന്നതും അനുഭവിക്കുന്നതും എല്ലാം നിറമുള്ളതായി തോന്നും. മനുഷ്യര്‍ക്ക് ജീവിതത്തില്‍ പാളിച്ചകളും പാകപ്പഴികളും ഒക്കെ ഉണ്ടാകാറുണ്ട്.
അങ്ങനെയുള്ളവരുടെ ജീവിതത്തില്‍ പ്രതീക്ഷയുടെ നിറങ്ങള്‍ അപ്രത്യക്ഷമാവുകയാണ് ചെയ്യുന്നത്. അത് അവരുടെ തോന്നലുകളും മാനസികാവസ്ഥയും ഒക്കെ ആയിരിക്കാം അങ്ങനെ അവരെ ചിന്തിപ്പിക്കുന്നതും, ചിന്തിക്കാന്‍ പ്രേരിപ്പിക്കുന്നതും.
നമ്മുടെയൊക്കെ ജീവിതകാലത്ത് വ്യത്യസ്ത സമയങ്ങളില്‍, ഇതുപോലെ വ്യത്യസ്ത നിറങ്ങള്‍, ജീവിതത്തിന്റെ തനിനിറങ്ങള്‍ നമ്മുടെ മുന്നില്‍ തെളിഞ്ഞുവരും.
കാലദേശ ഭേദമില്ലാതെ ഇത്തരം അവസ്ഥകളിലൂടെയാണ് എല്ലാവരും കടന്നു പോകുന്നത്, അല്ലെങ്കില്‍ എല്ലാവര്‍ക്കും കടന്നു പോകേണ്ടത്.
ഈ അവസ്ഥാന്തരങ്ങളില്‍ ഉണ്ടാവുന്ന നിറഭേദങ്ങളില്‍ നിന്ന് നമുക്ക് ധാരാളം പാഠങ്ങള്‍ പഠിക്കാനുണ്ട്.
അത്തരം പാഠങ്ങള്‍ ഹോം വര്‍ക്കായി ചെയ്തു പഠിച്ചാല്‍, വീണ്ടും നിറങ്ങളില്‍ ചാലിച്ച് എഴുതിയ കവിതയായി ജീവിതം നിങ്ങളെ ആനന്ദിപ്പിക്കും എന്നതിന് സംശയമില്ല.