എന്തുകൊണ്ടാണ് ദൈവാലയങ്ങളിൽ വിശുദ്ധവാരത്തിൽ രൂപങ്ങൾ വയലറ്റ് തുണികൾ കൊണ്ട് മറയ്ക്കുന്നത്?

വിശുദ്ധ വാരത്തിൽ, ലോകമെമ്പാടുമുള്ള കത്തോലിക്കാ ദൈവാലയങ്ങളിൽ കുരിശുകളും വിശുദ്ധരുടെ രൂപങ്ങളും വയലറ്റ് നിറത്തിലുള്ള തുണി ഉപയോഗിച്ച് മറയ്ക്കുന്ന രീതി നാം കാണാറുണ്ട്. അവ എന്തുകൊണ്ടാണെന്ന് അറിയാമോ? ഈ ആചരണത്തിന് പിന്നിലെ ആത്മീയവും ചരിത്രപരവുമായ കാരണങ്ങൾ പരിശോധിക്കാം.

വിശുദ്ധ വാരത്തിന്റെ ആരംഭം മുതൽ യേശുവിന്റെ ഉയിർപ്പിന് തൊട്ടുമുമ്പുള്ള ശനിയാഴ്ച വരെയാണ് ഈ രീതി പിന്തുടരുന്നത്. ദൈവാലയത്തിലെ ദൃശ്യപരമായ അലങ്കാരങ്ങൾ കുറയ്ക്കുന്നതിലൂടെ വിശ്വാസികളുടെ ശ്രദ്ധ പൂർണ്ണമായും ആന്തരിക പ്രാർഥനയിലേക്കും യേശുവിന്റെ പീഡാനുഭവങ്ങളിലേക്കും കേന്ദ്രീകരിക്കുക എന്നതാണ് ഇതിന്റെ പ്രധാന ലക്ഷ്യം. വായനകളിലൂടെയും പ്രാർഥനകളിലൂടെയും കേൾക്കുന്ന ദൈവവചനത്തിന് കൂടുതൽ പ്രാധാന്യം നൽകാൻ ഇത് സഹായിക്കുന്നു.

ഈ കാലഘട്ടത്തിൽ ദൈവാലയത്തിലെ മനോഹരമായ രൂപങ്ങൾ മറയ്ക്കുന്നത് ഒരുതരം ‘ആത്മീയ ദാരിദ്ര്യം’ അനുസ്മരിപ്പിക്കുന്നു. ഈസ്റ്റർ ദിനത്തിൽ യേശു ഉയിർത്തെഴുന്നേൽക്കുമ്പോൾ മാത്രം ഈ രൂപങ്ങൾ തുറന്നുകാട്ടുന്നത് ഉയിർപ്പിന്റെ സന്തോഷം വർധിപ്പിക്കാൻ സഹായിക്കുന്നു.

യേശു തന്റെ പരസ്യജീവിതത്തിന്റെ അവസാന നാളുകളിൽ ശത്രുക്കളിൽ നിന്ന് ഒളിച്ചുനടന്നതിനെയും (യോഹന്നാൻ 8:59), അവിടുത്തെ ദൈവത്വം മനുഷ്യരുടെ കണ്ണുകളിൽ നിന്ന് മറയ്ക്കപ്പെട്ടതിനെയും ഇത് സൂചിപ്പിക്കുന്നു.

രൂപങ്ങൾ മറയ്ക്കുന്നത് വഴി വിശ്വാസികളിൽ വിശുദ്ധമായ ഒരു അസ്വസ്ഥതയും കാത്തിരിപ്പും സൃഷ്ടിക്കപ്പെടുന്നു. ഈസ്റ്റർ രാവിൽ തുണികൾ മാറ്റുമ്പോൾ, മരണത്തിന് മേൽ ജീവൻ നേടിയ വിജയം കൂടുതൽ അർഥവത്തായി അനുഭവപ്പെടുന്നു.

വയലറ്റ് നിറത്തിന്റെ പ്രാധാന്യം

പശ്ചാത്താപത്തിന്റെയും പ്രായശ്ചിത്തത്തിന്റെയും പ്രതീകമായാണ് വയലറ്റ് നിറത്തിലുള്ള തുണികൾ ഉപയോഗിക്കുന്നത്. കുരിശുകൾ ദുഃഖവെള്ളിയാഴ്ചത്തെ തിരുക്കർമ്മങ്ങൾ വരെയും, മറ്റ് രൂപങ്ങൾ ഈസ്റ്റർ വിജിൽ കുർബാനയുടെ സമയം വരെയുമാണ് മറച്ചു വയ്ക്കുന്നത്.

നൂറ്റാണ്ടുകളായി തുടർന്നുപോരുന്ന ഈ ലളിതമായ ആചാരം, ബാഹ്യമായ കാഴ്ചകളിൽ നിന്ന് മാറി ആത്മീയമായ ഉണർവ് നേടാൻ വിശ്വാസികളെ സഹായിക്കുന്നു.

കട‌പ്പാട് ലൈഫ് ഡേ