വി. ഫ്രാൻസിസ് അസ്സീസിയുടെ തിരുനാൾ ദിനം ദേശീയ അവധി ദിനമാക്കാൻ ഒരുങ്ങി ഇറ്റലി

വി. ഫ്രാൻസിസ് അസ്സീസിയുടെ തിരുനാൾ ദിനമായ ഒക്ടോബർ നാല് ദേശീയ അവധി ദിനമാക്കുന്നതിനുള്ള ഒരു നിർണ്ണായക ചുവടുവയ്പ്പ് ഇറ്റാലിയൻ പാർലമെന്റ് നടത്തി. ഇറ്റലിയിലെ പാർലമെന്റിന്റെ ചേംബർ ഓഫ് ഡെപ്യൂട്ടീസ് സെപ്റ്റംബർ 23-ന് ബിൽ പാസാക്കാൻ വോട്ട് ചെയ്തു, 247 വോട്ടുകൾ നിർദേശത്തെ അനുകൂലിച്ചും രണ്ട് പേർ എതിർത്തും വോട്ട് ചെയ്തു. എട്ട് പേർ വിട്ടുനിന്നു.

ബിൽ നിയമമായി പാസാക്കപ്പെടാനാണ് സാധ്യത. പക്ഷേ ആദ്യം ഇറ്റലിയിലെ പാർലമെന്റിന്റെ മറ്റൊരു സഭയായ സെനറ്റിൽ വോട്ടെടുപ്പിന് വിധേയമാക്കണം. ഇറ്റലിയുടെ രക്ഷാധികാരിയാണ് വി. ഫ്രാൻസിസ് അസീസി. 1977 വരെ രാജ്യം അദ്ദേഹത്തിന്റെ തിരുനാൾ ദിനം ദേശീയ അവധിയായി ആഘോഷിച്ചു. വി. ഫ്രാൻസിസിന്റെ മരണത്തിന്റെ 800-ാം വാർഷികം ആഘോഷിക്കുന്നതിനാൽ 2026 ഒരു സുപ്രധാന വർഷമായിരിക്കും.

ഇറ്റലിയിൽ നിലവിൽ കലണ്ടറിൽ 12 ദേശീയ പ്രവൃത്തി അവധി ദിനങ്ങളുണ്ട്, അതിൽ എട്ടെണ്ണം മതപരമായ തിരുനാൾ ദിവസങ്ങളെ മാത്രം അടിസ്ഥാനമാക്കിയുള്ളതാണ്. ജനുവരി 6 ലെ എപ്പിഫനി, ഈസ്റ്റർ തിങ്കളാഴ്ച, ഓഗസ്റ്റ് 15 ന് മറിയത്തിന്റെ സ്വർഗാരോപണം, നവംബർ ഒന്നിന് സകല വിശുദ്ധരുടെയും ദിനം, ഡിസംബർ എട്ട് അമലോത്ഭവ തിരുനാൾ, ഡിസംബർ 25 ന് ക്രിസ്മസ് ദിനം, ഡിസംബർ 26 ന് രക്തസാക്ഷി വിശുദ്ധ സ്റ്റീഫന്റെ തിരുനാൾ എന്നിവയാണവ.

എട്ടാമത്തെ മതപരമായ അവധി നഗരം അനുസരിച്ച് വ്യത്യാസപ്പെടുന്നു, കാരണം അത് സ്ഥലത്തിന്റെ രക്ഷാധികാരി തിരുനാളാണ്. ജൂൺ 29 ന് വിശുദ്ധ പത്രോസിന്റെയും പൗലോസിന്റെയും തിരുനാൾ റോമിൽ ഒരു അവധിക്കാലമാണ്, കാരണം അവർ റോമാ നഗരത്തിന്റെ രക്ഷാധികാരികളാണ്.

മറ്റ് നാല് ദേശീയ അവധി ദിനങ്ങൾ ജനുവരി 1, പുതുവത്സര ദിനം (ദൈവമാതാവായ മറിയത്തിന്റെ തിരുനാൾ); 1945-ൽ നാസി-ഫാസിസത്തിൽ നിന്ന് ഇറ്റലി മോചിപ്പിക്കപ്പെട്ടതിന്റെ ആഘോഷമായ ഏപ്രിൽ 25; മെയ് 1, തൊഴിലാളി ദിനം (തൊഴിലാളിയായ വിശുദ്ധ ജോസഫിന്റെ തിരുനാൾ); 1946-ൽ ഇറ്റാലിയൻ റിപ്പബ്ലിക്കിന്റെ ജനനത്തെ അടയാളപ്പെടുത്തുന്ന അവധി ദിനമായ ജൂൺ 2 എന്നിവയാണ്.