അസീസിയിലെ ആത്മീയ വിസ്മയം: 800 വർഷങ്ങൾക്കിപ്പുറം വിശ്വാസികൾക്ക് മുന്നിൽ വിശുദ്ധ ഫ്രാൻസിസിന്റെ തിരുശേഷിപ്പുകൾ

അസീസിയിലെ വിശുദ്ധ ഫ്രാൻസിസിന്റെ എണ്ണൂറാം ചരമവാർഷികത്തോടനുബന്ധിച്ച് ചരിത്രത്തിലാദ്യമായി അദ്ദേഹത്തിന്റെ ഭൗതികാവശിഷ്ടങ്ങൾ പൊതുദർശനത്തിന് വച്ചിരിക്കുകയാണ്. നൂറ്റാണ്ടുകളോളം ശവകുടീരത്തിന്റെ ആഴങ്ങളിൽ നിഗൂഢമായി സൂക്ഷിക്കപ്പെട്ടിരുന്ന വിശുദ്ധന്റെ അസ്ഥികൾ, സ്ഫടികക്കൂട്ടിൽ വെടിയുണ്ടയെ പ്രതിരോധിക്കുന്ന ഗ്ലാസ് കവചത്തിന് പിന്നിലായാണ് വിശ്വാസികൾക്കായി ഒരുക്കിയിരിക്കുന്നത്. ചിത്രങ്ങളിൽ മാത്രം കണ്ടിരുന്ന വിദൂരമായ ഒരു രൂപത്തിനപ്പുറം, സുവിശേഷം യഥാർഥത്തിൽ ജീവിച്ചു കാണിച്ച ഒരു മനുഷ്യനെ തൊട്ടടുത്ത് കാണാനായതിന്റെ നിർവൃതിയിലാണ് അസീസിയിലെത്തുന്ന ലക്ഷക്കണക്കിന് തീർഥാടകർ.

രഹസ്യ ഒളിത്താവളത്തിൽ നിന്ന് സ്ഫടികക്കൂട്ടിലേക്ക്

വിശുദ്ധ ഫ്രാൻസിസിന്റെ മരണശേഷം തിരുശേഷിപ്പുകൾ മോഷ്ടിക്കപ്പെടുമോ എന്ന ഭയത്താൽ നൂറ്റാണ്ടുകളോളം അതീവ രഹസ്യമായാണ് അവ സൂക്ഷിച്ചിരുന്നത്. 1818-ൽ പയസ് ഏഴാമൻ മാർപാപ്പയുടെ കാലത്താണ് പാറയിൽ കൊത്തിയെടുത്ത അദ്ദേഹത്തിന്റെ ശവകുടീരം കണ്ടെത്തിയത്. അതേസമയം ഇതാദ്യമായാണ് സാൻ ഫ്രാൻസെസ്കോ ബസിലിക്കയുടെ ഹൃദയഭാഗത്ത് ഈ ഭൗതികാവശിഷ്ടങ്ങൾ ദൃശ്യമാകുന്ന രീതിയിൽ പ്രദർശിപ്പിക്കുന്നത്. കേവലം കൗതുകത്തിനപ്പുറം, ക്രിസ്തുവിനായി സർവവും ത്യജിച്ച ഒരു മനുഷ്യന്റെ വിനയവും സമർപ്പണവും വിശ്വാസികൾക്ക് നേരിട്ട് അനുഭവവേദ്യമാക്കുക എന്നതാണ് ഈ പ്രദർശനത്തിന്റെ ലക്ഷ്യം.

രണ്ട് വിശുദ്ധർ, ഒരേ സന്ദേശം

അസീസി ഇന്ന് രണ്ട് വ്യത്യസ്ത തലമുറകളുടെ ആത്മീയ സംഗമഭൂമിയാണ്. മധ്യകാലഘട്ടത്തിലെ വിശുദ്ധനായ ഫ്രാൻസിസിനൊപ്പം തന്നെ, ആധുനിക കാലഘട്ടത്തിലെ “ഇന്റർനെറ്റിന്റെ വിശുദ്ധൻ” കാർലോ അക്യുത്തിസും അസീസിയിൽ വിശ്വാസികളെ കാത്തിരിക്കുന്നു. 800 വർഷങ്ങളുടെ ദൂരമുണ്ടെങ്കിലും ഇവർ രണ്ടുപേരും നൽകുന്ന സന്ദേശം ഒന്ന് തന്നെയാണ് – വിശുദ്ധി എന്നത് ഭൂതകാലത്തിന്റേതല്ല, വർത്തമാനകാലത്തിന്റേതാണ്. മധ്യകാലത്തെ സന്യാസി വസ്ത്രമായാലും ആധുനിക കാലത്തെ നൈക്ക് ഹൂഡി ആയാലും, ഓരോ വ്യക്തിയെക്കുറിച്ചും ദൈവത്തിന് കൃത്യമായ പദ്ധതിയുണ്ടെന്ന് ഈ രണ്ട് ജീവിതങ്ങളും നമ്മെ ഓർമ്മിപ്പിക്കുന്നു.

വിശുദ്ധി എന്നത് ഒരു മ്യൂസിയത്തിൽ സൂക്ഷിക്കേണ്ട ഒന്നല്ലെന്നും മറിച്ച് നാം ജീവിക്കുന്ന കാലഘട്ടത്തിൽ സ്വയം സമർപ്പിക്കാൻ ധൈര്യപ്പെടലാണെന്നും അസീസി നമ്മെ പഠിപ്പിക്കുന്നു. വിശുദ്ധ ഫ്രാൻസിസ് പ്രകൃതിയിലൂടെയും കൽഭിത്തികൾക്കിടയിലൂടെയും ദൈവത്തെ കണ്ടെത്തിയപ്പോൾ, കാർലോ അക്യുത്തിസ് വെബ്‌സൈറ്റുകളിലൂടെയും കോഡിംഗിലൂടെയും ആ പാത പിന്തുടർന്നു. ഗ്ലാസ് മതിലുകൾക്ക് പിന്നിലിരുന്ന് അവർ രണ്ടുപേരും ഒരേ കാര്യം മന്ത്രിക്കുന്നു: നിങ്ങളുടെ വിജയങ്ങളോ ശേഖരിച്ച വസ്തുക്കളോ അല്ല, മറിച്ച് നിങ്ങൾ നൽകിയ സ്നേഹമാണ് നിങ്ങളുടെ ജീവിതത്തെ ഓർമ്മപ്പെടുത്തുന്നത്.

കടപ്പാട്- ലൈഫ് ഡേ