നോമ്പുകാലത്ത് പൂർണ്ണ ദണ്ഡവിമോചനം നേടാനുള്ള നാലുവഴികൾ

വിശ്വാസികളെ സംബന്ധിച്ചിടത്തോളം നോമ്പുകാലം ആത്മീയ നവീകരണത്തിന്റെയും മാനസാന്തരത്തിന്റെയും സമയമാണ്. പാപമോചനം ലഭിച്ച പാപങ്ങളുടെ ശിക്ഷയിൽ നിന്നുള്ള പൂർണ്ണമായ വിടുതലാണ് ‘ പൂർണ്ണ ദണ്ഡവിമോചനം ‘ എന്ന് ലളിതമായി പറയാം. ഒരാൾക്ക് തന്റെ ആത്മാവിനു വേണ്ടിയോ അല്ലെങ്കിൽ ശുദ്ധീകരണ സ്ഥലത്തെ ആത്മാക്കൾക്ക് വേണ്ടിയോ ഇത് അപേക്ഷിക്കാവുന്നതാണ്.

​ദിവസവും പൂർണ്ണ ദണ്ഡവിമോചനം നേടുന്നതിനായി സഭ നിർദ്ദേശിക്കുന്ന പ്രധാനപ്പെട്ട നാല് വഴികൾ നമുക്ക് നോക്കാം.

​1. കുരിശിന്റെ വഴി

​നോമ്പുകാലത്ത് കുരിശിന്റെ വഴി ചൊല്ലി ധ്യാനിക്കുന്നത് വഴി ദണ്ഡവിമോചനം ലഭിക്കും. അംഗീകരിക്കപ്പെട്ട 14 സ്ഥലങ്ങൾക്ക് മുൻപിൽ നിന്നായിരിക്കണം ഇത് ചൊല്ലേണ്ടത്. പള്ളിയിൽ പോകാൻ സാധിക്കാത്തവർക്ക് അല്പസമയം കർത്താവിന്റെ പീഡാനുഭവങ്ങളെക്കുറിച്ച് ഭക്തിപൂർവ്വം വായിച്ചോ ധ്യാനിച്ചോ ഇത് നേടാവുന്നതാണ്.

2. പരിശുദ്ധ ജപമാല ചൊല്ലുക

​പള്ളിയിലോ കുടുംബമായോ സന്യസ്ത സമൂഹങ്ങളോടൊപ്പമോ ഭക്തിപൂർവ്വം ജപമാല അർപ്പിക്കുന്നത് വഴി ഇത് ലഭിക്കും. ജപമാലയുടെ അഞ്ച് മണികൾ തുടർച്ചയായി ചൊല്ലുകയും രഹസ്യങ്ങൾ ധ്യാനിക്കുകയും വേണം.

​3. ദിവ്യകാരുണ്യ ആരാധന

​വിശുദ്ധ കുർബാന എഴുന്നള്ളിച്ചു വെച്ചിരിക്കുന്നയിടത്തോ അല്ലാതെയോ ദിവ്യകാരുണ്യ നാഥന്റെ സന്നിധിയിൽ കുറഞ്ഞത് അരമണിക്കൂർ സമയം ആരാധനയ്ക്കായി ചിലവഴിക്കുന്നത് വഴി പൂർണ്ണ ദണ്ഡവിമോചനം പ്രാപിക്കാം.

​4. വിശുദ്ധ ഗ്രന്ഥ പാരായണം

​ദൈവവചനത്തോടുള്ള ആദരവോടെ വിശുദ്ധ ബൈബിൾ കുറഞ്ഞത് അരമണിക്കൂർ നേരം വായിക്കുകയോ ശ്രവിക്കുകയോ ചെയ്യുന്നത് വഴി ദണ്ഡവിമോചനം ലഭിക്കും.

​ ​ഒരു പാപസങ്കീർത്തനം വഴി ഒന്നിലധികം ദണ്ഡവിമോചനങ്ങൾ നേടാമെങ്കിലും ഓരോ ദിവസത്തെയും ദണ്ഡവിമോചനത്തിന് പ്രത്യേകമായി വിശുദ്ധ കുർബാന സ്വീകരണവും പാപ്പയുടെ നിയോഗത്തിനായുള്ള പ്രാർത്ഥനയും ആവശ്യമാണ്.

സീനിയ എൽസ ഇഗ്‌നേഷ്യസ്

കടപ്പാട് ലൈഫ് ഡേ