മുറിവുകളെ മുത്തുകൾ ആക്കി മാറ്റാം

നമ്മുടെ ജീവിതത്തിൽ ചിലപ്പോൾ മറ്റുള്ളവർ പറയുന്ന ചെറിയ വാക്കുകൾ പോലും വലിയ മുറിവുകളുണ്ടാക്കാറുണ്ട്. അവ വിദ്വേഷത്തോടെ പറയുന്നതാകണമെന്നില്ല, എന്നാൽ അവ നമ്മുടെ മനസ്സിന്റെ ആഴങ്ങളിൽ തങ്ങിനിൽക്കുകയും നമ്മെ വേദനപ്പിക്കുകയും ചെയ്യും. ഇത്തരം സാഹചര്യങ്ങളെ എങ്ങനെ മറികടക്കാം. ഒരു ചെറിയ മണൽത്തരി മുത്തുച്ചിപ്പിയുടെ ഉള്ളിൽ കടക്കുമ്പോൾ ഉണ്ടാകുന്ന അസ്വസ്ഥതയെ അത് നേരിടുന്നത്, ആ തരിയെ തന്റെ ശരീരത്തിലെ ദ്രവം കൊണ്ട് പൊതിഞ്ഞ് മനോഹരമായ ഒരു മുത്താക്കി മാറ്റിക്കൊണ്ടാണ്. ഇതേപോലെ നമ്മുടെ ആത്മാവിലുണ്ടാകുന്ന മുറിവുകളെയും ഒരു നിധിയാക്കി മാറ്റാൻ നമുക്ക് സാധിക്കും.

വേദനയുണ്ടാക്കുന്ന വാക്കുകളെ നമുക്ക് പെട്ടെന്ന് മറക്കാൻ കഴിഞ്ഞെന്നു വരില്ല. എന്നാൽ ആ മുറിവുകളെ പരിശുദ്ധാത്മാവിന് സമർപ്പിക്കുമ്പോൾ, അവൻ അവയെ അനുകമ്പയായും മധ്യസ്ഥ പ്രാർത്ഥനയായും രൂപാന്തരപ്പെടുത്തുന്നു. കത്തോലിക്കാ സഭയുടെ മതബോധനഗ്രന്ഥം (CCC 2843) പഠിപ്പിക്കുന്നത് പോലെ, പരിശുദ്ധാത്മാവിന് സ്വയം സമർപ്പിക്കുന്ന ഒരു ഹൃദയത്തിന് മുറിവേറ്റ ഓർമ്മകളെ ശുദ്ധീകരിക്കാൻ കഴിയും. മുറിവുകളിൽ പരിശുദ്ധാത്മാവ് നൽകുന്ന കൃപയുടെ ആവരണം ഒരു തൈലം പോലെ പ്രവർത്തിക്കുകയും വേദനയെ മഹത്വമായി മാറ്റുകയും ചെയ്യുന്നു.

ഒരു ചെറിയ മുത്തുണ്ടാകാൻ പോലും വർഷങ്ങളോളം സമയമെടുക്കാറുണ്ട്. അതുപോലെ തന്നെ മനസ്സിന്റെ മുറിവുകൾ ഉണങ്ങുന്നതും ക്ഷമിക്കാൻ പഠിക്കുന്നതും ഒരു നീണ്ട പ്രക്രിയയാണ്. ഓരോ ദിവസവും നമ്മുടെ വേദനകളെ ദൈവത്തിന് സമർപ്പിക്കുമ്പോൾ, കൃപയുടെ ഓരോ പാളികളാൽ ആ മുറിവ് പൊതിയപ്പെടും. കഠിനമായ വാക്കുകൾ സൃഷ്ടിക്കുന്ന മുറിവുകൾ ഉണങ്ങാൻ കൂടുതൽ സമയമെടുത്തേക്കാം, എന്നാൽ പരിശുദ്ധാത്മാവിന്റെ സഹായത്തോടെ ആ വേദനയുടെ ഓർമ്മകളെ ശുദ്ധീകരിക്കാൻ നമുക്ക് സാധിക്കും.

മുറിവുകളെ മുത്തുകളാക്കി മാറ്റുക എന്നതിനർഥം കഷ്ടപ്പാടുകളെ ദൈവകൃപയാൽ പരിവർത്തനം ചെയ്യുക എന്നാണ്. നമ്മെ വേദനിപ്പിച്ച വ്യക്തിയോട് ക്ഷമിക്കാനും ആ സാഹചര്യത്തെ പുതിയൊരു കാഴ്ചപ്പാടിലൂടെ കാണാനും ദൈവം നമ്മെ സഹായിക്കും. നാം സ്വർഗത്തിൽ എത്തുമ്പോൾ, ഭൂമിയിൽ വച്ച് പരിശുദ്ധാത്മാവിന്റെ സഹായത്തോടെ നാം രൂപപ്പെടുത്തിയെടുത്ത ഈ ‘മുത്തുകൾ’ നമ്മുടെ വലിയ നിധിയായി മാറും. കൃപയാൽ മാറ്റം സാധ്യമാണെന്നും നമ്മുടെ വേദനകൾ വൃഥാവിലാകില്ലെന്നുമുള്ള വലിയൊരു പ്രത്യാശയാണിത് നൽകുന്നത്.

ജീവിതത്തിൽ നിങ്ങളെ വേദനിപ്പിച്ച ഏതെങ്കിലും വാക്കുകളെ ഇത്തരത്തിൽ ഒരു മുത്താക്കി മാറ്റാൻ ഇനിമുതൽ നമുക്ക് ശ്രമിക്കാം.