ഫോണ്‍ കൈയിലുണ്ടെങ്കില്‍ പഠനം എളുപ്പമാകുമോ? ഈ ഒരു ശീലം വിദ്യാര്‍ത്ഥികളുടെ പഠനത്തെ ബാധിക്കാം
ഓണ്‍ലൈന്‍ ക്ലാസുകളും പഠന ആപ്പുകളും ഇ-ബുക്കുകളും എത്തിയതോടെ മൊബൈല്‍ ഫോണ്‍ വിദ്യാര്‍ത്ഥികളുടെ പഠനത്തിന്റെ ഭാഗമായിക്കഴിഞ്ഞു. ഒരു വിഷയത്തെക്കുറിച്ച് സംശയം വന്നാല്‍ ഉടന്‍ തിരയാം, വീഡിയോ ക്ലാസുകള്‍ കാണാം, പഠനസാമഗ്രികള്‍ ഡൗണ്‍ലോഡ് ചെയ്യാം.
എന്നാല്‍ പഠനത്തിനായി ഫോണ്‍ കൈയില്‍ എടുക്കുമ്പോള്‍ തന്നെ മറ്റൊരു ശീലം കൂടി തുടങ്ങുന്നുണ്ടെങ്കില്‍ അത് ശ്രദ്ധിക്കണം. പഠനത്തിനിടെ ഇടയ്ക്കിടെ സാമൂഹികമാധ്യമങ്ങള്‍ പരിശോധിക്കുന്നതും സന്ദേശങ്ങള്‍ നോക്കുന്നതും അറിയിപ്പുകള്‍ക്ക് പിന്നാലെ പോകുന്നതുമാണ് പ്രധാന പ്രശ്‌നം.
പഠിക്കുമ്പോള്‍ ഒരു അറിയിപ്പ് വന്നാല്‍ കുറച്ച് സെക്കന്‍ഡ് ഫോണ്‍ നോക്കുന്നതായി തോന്നിയാലും, വീണ്ടും പഠനത്തിലേക്ക് ശ്രദ്ധ കൊണ്ടുവരാന്‍ കൂടുതല്‍ സമയം വേണ്ടിവരും. വീഡിയോ ക്ലാസിനിടയില്‍ മറ്റ് വീഡിയോകളിലേക്കോ വിനോദ ഉള്ളടക്കങ്ങളിലേക്കോ മാറുന്നതും പഠനസമയം കുറയ്ക്കാം. പ്രത്യേകിച്ച് ഒരേസമയം പഠനവും സാമൂഹികമാധ്യമങ്ങളും ഉപയോഗിക്കുന്ന ശീലം ശ്രദ്ധ ചിതറാനും പഠിച്ച കാര്യങ്ങള്‍ ഓര്‍ത്തെടുക്കുന്നതിനെ ബാധിക്കാനും ഇടയാക്കാം.
ഫോണ്‍ ഉപയോഗിച്ചുള്ള പഠനം പൂര്‍ണമായും ഒഴിവാക്കണമെന്നല്ല ഇതിന്റെ അര്‍ഥം. പഠനത്തിനായി ഫോണ്‍ ഉപയോഗിക്കുമ്പോള്‍ ആവശ്യമായ ആപ്പുകളും വെബ്സൈറ്റുകളും മാത്രം തുറക്കുകയും അനാവശ്യ അറിയിപ്പുകള്‍ ഓഫ് ചെയ്യുകയും പഠനസമയത്ത് സാമൂഹികമാധ്യമങ്ങളില്‍ നിന്ന് അകലം പാലിക്കുകയും ചെയ്യുന്നത് സഹായകരമാണ്. സാധ്യമെങ്കില്‍ പ്രധാനപ്പെട്ട പഠനസാമഗ്രികള്‍ നേരത്തെ ഡൗണ്‍ലോഡ് ചെയ്ത് ഇന്റര്‍നെറ്റ് ഉപയോഗം കുറയ്ക്കുന്നതും ശ്രദ്ധ നിലനിര്‍ത്താന്‍ സഹായിക്കും.
അതുകൊണ്ട് വിദ്യാര്‍ത്ഥികളുടെ പഠനത്തില്‍ പ്രശ്‌നം ഫോണ്‍ തന്നെയാണെന്ന് പറയാനാകില്ല; ഫോണ്‍ എങ്ങനെ ഉപയോഗിക്കുന്നു എന്നതാണ് പ്രധാന കാര്യം. പഠനത്തിനായി എടുത്ത ഫോണ്‍ ഇടയ്ക്കിടെ വിനോദത്തിനുള്ള ഉപകരണമായി മാറുന്നുണ്ടെങ്കില്‍ അതാണ് ശ്രദ്ധിക്കേണ്ട ശീലം. പഠനസമയം വ്യക്തമായി നിശ്ചയിച്ച് ഫോണ്‍ അതിനനുസരിച്ച് ഉപയോഗിച്ചാല്‍ സാങ്കേതികവിദ്യ പഠനത്തിന് സഹായിയായി തന്നെ നിലനിര്‍ത്താനാകും.