കടുത്ത ഉഷ്ണതരംഗത്തെയും ശക്തമായ കാറ്റിനെയും തുടർന്ന് ഫ്രാൻസിലും സ്പെയിനിലും പടർന്നുപിടിക്കുന്ന കാട്ടുതീ നിയന്ത്രിക്കാനാവാതെ അഗ്നിശമന സേനാംഗങ്ങൾ ബുദ്ധിമുട്ടുന്നു. ഇരുരാജ്യങ്ങളിലുമായി ഇതുവരെ മൂന്ന് ലക്ഷത്തിലധികം ആളുകളെയാണ് സുരക്ഷിത സ്ഥാനങ്ങളിലേക്ക് മാറ്റിപ്പാർപ്പിച്ചത്.

ഗിറോണ്ടെ (Gironde), ലാൻഡെസ് (Landes) മേഖലകളിൽ നിന്ന് ഏകദേശം 2.5 ലക്ഷത്തോളം ആളുകളെ ഒഴിപ്പിച്ചു. പ്രശസ്തമായ ബോർഡോ (Bordeaux) നഗരത്തിലേക്ക് തീ ആഞ്ഞടിക്കുന്നതായി അധികൃതർ മുന്നറിയിപ്പ് നൽകി. മാഡ്രിഡ് മേഖലയിൽ കഴിഞ്ഞ ദിവസം അടിയന്തരാവസ്ഥ പ്രഖ്യാപിച്ചു. വലൻസിയയിൽ കാട്ടുതീയിൽപെട്ട് 70വയസ്സുള്ള ഒരാൾ കാറിനുള്ളിൽ വെന്തുമരിച്ചു. സ്പെയിനിൽ ഇതുവരെ 1.3 ലക്ഷം ഹെക്ടറിലധികം ഭൂമി കത്തിനശിച്ചതായി പ്രധാനമന്ത്രി പെഡ്രോ സാഞ്ചസ് വ്യക്തമാക്കി.

ഫ്രാൻസും സ്പെയിനും സഹായം അഭ്യർത്ഥിച്ചതിനെ തുടർന്ന് യൂറോപ്യൻ യൂണിയൻ ഫയർഫൈറ്റിംഗ് വിമാനങ്ങളും ഹെലികോപ്റ്ററുകളും രക്ഷാപ്രവർത്തനത്തിനായി അയച്ചിട്ടുണ്ട്. അടുത്ത ദിവസങ്ങളിലും കടുത്ത ഉഷ്ണതരംഗവും കാട്ടുതീ സാധ്യതയും തുടരുമെന്ന് കാലാവസ്ഥാ നിരീക്ഷകർ മുന്നറിയിപ്പ് നൽകുന്നു. സ്ഥിതിഗതികൾ വിലയിരുത്താൻ ഫ്രഞ്ച് പ്രസിഡന്റ് ഇമ്മാനുവൽ മാക്രോൺ അടിയന്തര മന്ത്രിസഭാ യോഗം വിളിച്ചുചേർത്തിട്ടുണ്ട്.