നാടകങ്ങളിലൂടെ കന്യാസ്ത്രീകളുടെ ഉടുതുണി അഴിച്ചുമാറ്റി ആക്ഷേപിക്കാന്‍ നാടകശാലകള്‍ ഒരുക്കിയപ്പോള്‍ ഈ കന്യാസ്ത്രീ സ്‌നേഹം എവിടെയായിരുന്നു? മന്ത്രി വി. ശിവന്‍കുട്ടിക്ക് തുറന്ന കത്തുമായി സി. അഡ്വ. ജോസിയ
കോട്ടയം: മന്ത്രി വി. ശിവന്‍കുട്ടിക്ക് തുറന്ന കത്തുമായി സി. അഡ്വ. ജോസിയ. ഛത്തീസ്ഗഡില്‍ മലയാളി കന്യാസ്ത്രീകളെ അറസ്റ്റ് ചെയ്ത വിഷയത്തില്‍ മന്ത്രി മാധ്യമങ്ങള്‍ക്ക് മുന്നില്‍ നടത്തിയ പ്രതികരണങ്ങള്‍ക്കു മറുപടി നല്‍കുകയായിരുന്നു വോയിസ് ഓഫ് നണ്‍സ് ന്റെ പി.ആര്‍.ഒ സിസ്റ്റര്‍ ജോസിയ.
ഞങ്ങളുടെ സഹപ്രവര്‍ത്തകര്‍ക്ക് വേണ്ടിയുള്ള അങ്ങയുടെ ഈ കരുതല്‍ തീര്‍ച്ചയായും സന്തോഷം നല്‍കുന്ന ഒന്നാണ്. കേരളത്തിലെ രണ്ട് കന്യാസ്ത്രീമാരുടെ അറസ്റ്റില്‍ അങ്ങേയ്ക്കുണ്ടായ വിഷമം ഞങ്ങള്‍ക്ക് ആശ്വാസം നല്‍കുന്നുണ്ട്, ഒപ്പം ഒരു ചെറിയ സംശയവുമുണ്ട്.
നാടകങ്ങളിലൂടെയും സിനിമകളിലൂടെയും കന്യാസ്ത്രീകളുടെ ഉടുതുണി അഴിച്ചുമാറ്റി ആക്ഷേപിക്കാന്‍ നാടകശാലകള്‍ ഒരുക്കിയപ്പോഴും, സിപിഎമ്മിന്റെ ഏരിയ സെക്രട്ടറിമാര്‍ അതിന് വേദികള്‍ ഒരുക്കിയപ്പോഴും ഈ കന്യാസ്ത്രീ സ്‌നേഹം എവിടെയായിരുന്നു? യൂട്യൂബ് ചാനലുകളില്‍ സമര്‍പ്പിതര്‍ക്കെതിരെ വൃത്തികെട്ട കഥകള്‍ വിളമ്പി നടന്നവരെ തടയാന്‍ അങ്ങയുടെ സംവിധാനങ്ങള്‍ക്ക് കഴിഞ്ഞോ? എന്നും സി. ജോസിയ ചോദിക്കുന്നു.
ദീപികയില്‍ എഡിറ്റോറിയല്‍ എഴുതിയിട്ട് അരമനയില്‍ ഒതുങ്ങിയിരുന്ന് പ്രാര്‍ത്ഥിക്കുന്നവരാണ് പിതാക്കന്മാര്‍' എന്ന് അങ്ങ് പറഞ്ഞല്ലോ. ഒന്നാമത്തെ കാര്യം, ദീപികയില്‍ എഡിറ്റോറിയല്‍ എഴുതുന്നത് പിതാക്കന്മാര്‍ അല്ല സര്‍. അവര്‍ സഭയുടെ തലവന്മാരാണ്, അല്ലാതെ പത്രപ്രവര്‍ത്തകരല്ല.
ഒരു കാര്യം കൂടി, അങ്ങ് പറഞ്ഞതുപോലെ എല്ലാ തിരുമേനിമാര്‍ക്കും അവരുടെ സ്ഥാനം ഉറപ്പിക്കലാണ് പ്രധാനമെങ്കില്‍, അവര്‍ക്ക് ഇങ്ങനെയുള്ള വിഷയങ്ങളില്‍ ഇടപെടാതെ സ്വസ്ഥമായി ഇരിക്കാമായിരുന്നു. എന്നാല്‍, അവര്‍ അങ്ങനെ ചെയ്യാതെ, ഞങ്ങളുടെ സഹപ്രവര്‍ത്തകര്‍ക്ക് വേണ്ടി ശബ്ദമുയര്‍ത്തുകയും ഇടപെടലുകള്‍ നടത്തുകയും ചെയ്യുന്നവരാണെന്നും
സിസ്റ്റര്‍ പറയുന്നു.
കത്തിന്റെ പൂര്‍ണ രൂപം
ബഹുമാനപ്പെട്ട വിദ്യാഭ്യാസ മന്ത്രി ശ്രീ. വി. ശിവന്‍കുട്ടിക്ക്,
ഛത്തീസ്ഗഡില്‍ മലയാളി കന്യാസ്ത്രീകളെ അറസ്റ്റ് ചെയ്ത വിഷയത്തില്‍ അങ്ങ് മാധ്യമങ്ങള്‍ക്ക് മുന്നില്‍ നടത്തിയ വൈകാരികമായ പ്രതികരണങ്ങള്‍ ശ്രദ്ധയില്‍പ്പെട്ടു. ഞങ്ങളുടെ സഹപ്രവര്‍ത്തകര്‍ക്ക് വേണ്ടിയുള്ള അങ്ങയുടെ ഈ കരുതല്‍ തീര്‍ച്ചയായും സന്തോഷം നല്‍കുന്ന ഒന്നാണ്. കേരളത്തിലെ രണ്ട് കന്യാസ്ത്രീമാരുടെ അറസ്റ്റില്‍ അങ്ങേയ്ക്കുണ്ടായ വിഷമം ഞങ്ങള്‍ക്ക് ആശ്വാസം നല്‍കുന്നുണ്ട്, ഒപ്പം ഒരു ചെറിയ സംശയവുമുണ്ട്.
നാടകങ്ങളിലൂടെയും സിനിമകളിലൂടെയും കന്യാസ്ത്രീകളുടെ ഉടുതുണി അഴിച്ചുമാറ്റി ആക്ഷേപിക്കാന്‍ നാടകശാലകള്‍ ഒരുക്കിയപ്പോഴും, സിപിഎമ്മിന്റെ ഏരിയ സെക്രട്ടറിമാര്‍ അതിന് വേദികള്‍ ഒരുക്കിയപ്പോഴും ഈ കന്യാസ്ത്രീ സ്‌നേഹം എവിടെയായിരുന്നു? യൂട്യൂബ് ചാനലുകളില്‍ സമര്‍പ്പിതര്‍ക്കെതിരെ വൃത്തികെട്ട കഥകള്‍ വിളമ്പി നടന്നവരെ തടയാന്‍ അങ്ങയുടെ സംവിധാനങ്ങള്‍ക്ക് കഴിഞ്ഞോ? അതൊക്കെ ഞങ്ങള്‍ തല്‍ക്കാലം മറക്കുന്നു, പോട്ടെ.
ഇപ്പോള്‍ അങ്ങ് പറഞ്ഞ ചില വാചകങ്ങള്‍ - പ്രത്യേകിച്ചും ബിഷപ്പുമാര്‍ക്കെതിരെയുള്ള വിമര്‍ശനം - കഴിഞ്ഞ ദിവസങ്ങളില്‍ അഭിവാദ്യ പിതാക്കന്മാരും കത്തോലിക്കാ സഭയും നടത്തിയ ഇടപെടലുകളെയും അധ്വാനങ്ങളെയും കുറിച്ച് അങ്ങ് അറിയാതെ പോയതിനാലാണ്.
CBCI എന്നാല്‍ Catholic Bishops' Conference of India എന്നാണ്. മലയാളത്തില്‍, 'ഭാരത കത്തോലിക്കാ മെത്രാന്‍ സമിതി' എന്ന് പറയാം. ഇനി KCBC ആണെങ്കില്‍, Kerala Catholic Bishops' Council അഥവാ'കേരള കത്തോലിക്കാ മെത്രാന്‍ സമിതി' എന്നാണ്. ഈ സമിതികളും അതിലെ അംഗങ്ങളും ഈ വിഷയത്തില്‍ വളരെ സജീവമായി ഇടപെട്ടിരുന്നു/ ഇടപെട്ടുകൊണ്ടിരിക്കുന്നു. അതിന്റെ പത്രക്കുറിപ്പുകളും മറ്റ് തെളിവുകളും ഇതോടൊപ്പം പോസ്റ്റ് ചെയ്യുന്നു. ക്ഷമിക്കണം, അത് ഇംഗ്ലീഷിലാണ്.
'ദീപികയില്‍ എഡിറ്റോറിയല്‍ എഴുതിയിട്ട് അരമനയില്‍ ഒതുങ്ങിയിരുന്ന് പ്രാര്‍ത്ഥിക്കുന്നവരാണ് പിതാക്കന്മാര്‍' എന്ന് അങ്ങ് പറഞ്ഞല്ലോ. ഒന്നാമത്തെ കാര്യം, ദീപികയില്‍ എഡിറ്റോറിയല്‍ എഴുതുന്നത് പിതാക്കന്മാര്‍ അല്ല സര്‍. അവര്‍ സഭയുടെ തലവന്മാരാണ്, അല്ലാതെ പത്രപ്രവര്‍ത്തകരല്ല.
ഒരു കാര്യം കൂടി, അങ്ങ് പറഞ്ഞതുപോലെ എല്ലാ തിരുമേനിമാര്‍ക്കും അവരുടെ സ്ഥാനം ഉറപ്പിക്കലാണ് പ്രധാനമെങ്കില്‍, അവര്‍ക്ക് ഇങ്ങനെയുള്ള വിഷയങ്ങളില്‍ ഇടപെടാതെ സ്വസ്ഥമായി ഇരിക്കാമായിരുന്നു. എന്നാല്‍, അവര്‍ അങ്ങനെ ചെയ്യാതെ, ഞങ്ങളുടെ സഹപ്രവര്‍ത്തകര്‍ക്ക് വേണ്ടി ശബ്ദമുയര്‍ത്തുകയും ഇടപെടലുകള്‍ നടത്തുകയും ചെയ്യുന്നു. അത് അവരുടെ ഉത്തരവാദിത്വബോധം കൊണ്ടാണ്.
പ്രധാനമന്ത്രിമാരോട് പരാതി പറയാനുള്ള ധൈര്യം പോലും തിരുമേനിമാര്‍ കാണിക്കുന്നില്ല എന്ന അങ്ങയുടെ പ്രസ്താവനയും വസ്തുതാപരമല്ല. പല സന്ദര്‍ഭങ്ങളിലും സഭയുടെ നേതൃത്വം സര്‍ക്കാരുകളുമായി ക്രിയാത്മകമായ സംഭാഷണങ്ങള്‍ നടത്തിയിട്ടുണ്ട്. ഇപ്പോഴത്തെ സാഹചര്യത്തില്‍, പരസ്യമായ ഏറ്റുമുട്ടലുകളേക്കാള്‍ ഫലപ്രദമായ മാര്‍ഗ്ഗങ്ങളിലൂടെ പ്രശ്‌നപരിഹാരം കാണാനാണ് സഭ ശ്രമിച്ചുകൊണ്ടിരിക്കുന്നത്. 'എല്ലാ നിയമങ്ങളും ഭരണഘടനയില്‍ പറയുന്ന കാര്യങ്ങളും കാറ്റില്‍ പറത്തിക്കൊണ്ടാണല്ലോ ബജ്റംഗ്ദള്‍ പിന്തുണയോടെ കന്യാസ്ത്രീകളെ അറസ്റ്റ് ചെയ്തുകൊണ്ട് പോയത്' എന്ന അങ്ങയുടെ പരാമര്‍ശം ഞങ്ങളും ഗൗരവത്തോടെയാണ് കാണുന്നത്. ഈ അനീതിക്കെതിരെ നിയമപരമായും അല്ലാതെയും പ്രതികരിക്കാന്‍ സഭ പ്രതിജ്ഞാബദ്ധമാണ്.
ഈ വിഷയത്തില്‍ അങ്ങയുടെ സദുദ്ദേശ്യത്തെ ഞങ്ങള്‍ മാനിക്കുന്നു. എന്നാല്‍, കാര്യങ്ങള്‍ കൃത്യമായി മനസ്സിലാക്കിയ ശേഷം ഒരു പ്രസ്താവന നടത്തുന്നത് കൂടുതല്‍ ഉചിതമായിരിക്കും.
.....
സ്‌നേഹത്തോടെ,
ഒരു കത്തോലിക്കാ സന്യാസിനിയും അഭിഭാഷകയും വോയിസ് ഓഫ് നണ്‍സ് ന്റെ PRO യുമായ
സി. അഡ്വ. ജോസിയ SD.
...