കോപം നിയന്ത്രിക്കാന് നമുക്ക് ചെയ്യാന് സാധിക്കുന്ന കാര്യങ്ങള് എന്തൊക്കെയാണ്?
കോപം മനുഷ്യന്റെ സ്വാഭാവികമായ ഒരു വികാരമാണ്. എല്ലാ ആളുകള്ക്കും ചില സാഹചര്യങ്ങളില് കോപം വരാറുണ്ട്. എന്നാല് കോപം ശരിയായ രീതിയില് നിയന്ത്രിക്കാന് കഴിയാത്തപക്ഷം അത് നമ്മുടെ ആരോഗ്യം, കുടുംബബന്ധങ്ങള്, സൗഹൃദങ്ങള്, ജോലിസ്ഥലം എന്നിവയെ പ്രതികൂലമായി ബാധിക്കും. കോപം നമ്മുടെ ജീവിതത്തെ നിയന്ത്രിക്കുന്നതിന് പകരം, കോപത്തെ നമുക്ക് നിയന്ത്രിക്കാന് പഠിക്കാം. അതിനായി ദിവസേന ജീവിതത്തില് പ്രാവര്ത്തികമാക്കാവുന്ന പത്ത് ലളിതമായ മാര്ഗങ്ങള് നോക്കാം.
1. സംസാരിക്കുന്നതിന് മുമ്പ് ഒന്ന് ചിന്തിക്കുക
കോപമുള്ള സമയത്ത് പറയുന്ന വാക്കുകള് പിന്നീട് നമ്മെ വിഷമിപ്പിച്ചേക്കാം. അതുകൊണ്ട് സംസാരിക്കുന്നതിന് മുമ്പ് കുറച്ച് സമയം എടുത്ത് ചിന്തിക്കുക. മറ്റുള്ളവര്ക്കും അവരുടെ അഭിപ്രായം പറയാന് അവസരം നല്കുക.
2. മനസ്സ് ശാന്തമായ ശേഷം നമ്മുടെ വിഷമം പറയുക
കോപം കുറഞ്ഞ ശേഷം നമ്മുടെ പ്രശ്നം ശാന്തമായും വ്യക്തമായും പറയുക. കുറ്റപ്പെടുത്താതെ, നമ്മുടെ വികാരങ്ങളും ആവശ്യങ്ങളും മാന്യമായി അറിയിക്കാന് ശ്രമിക്കുക.
3. വ്യായാമം ചെയ്യുക
നടത്തം, ഓട്ടം, സൈക്കിള് ചവിട്ടല്, യോഗ തുടങ്ങിയ ശാരീരിക പ്രവര്ത്തനങ്ങള് മനസ്സിലെ സമ്മര്ദം കുറയ്ക്കാന് സഹായിക്കും. കോപം തോന്നുമ്പോള് കുറച്ച് സമയം നടക്കുന്നതും നല്ലതാണ്.
4. കുറച്ച് സമയം ഇടവേള എടുക്കുക
സമ്മര്ദമുള്ള സാഹചര്യങ്ങളില് നിന്ന് അല്പസമയം മാറിനില്ക്കുക. കുറച്ച് നിമിഷങ്ങള് ശാന്തമായി ഇരിക്കുന്നത് മനസ്സിനെ ശമിപ്പിക്കാനും നല്ല തീരുമാനങ്ങള് എടുക്കാനും സഹായിക്കും.
5. പ്രശ്നത്തിന് പരിഹാരം കണ്ടെത്താന് ശ്രമിക്കുക
കോപത്തിന് കാരണമായ കാര്യത്തില് മാത്രം ശ്രദ്ധിക്കാതെ അതിന് ഒരു പരിഹാരം കണ്ടെത്താന് ശ്രമിക്കുക. എല്ലാ കാര്യങ്ങളും നമ്മുടെ നിയന്ത്രണത്തിലല്ലെന്ന് മനസ്സിലാക്കുകയും യാഥാര്ഥ്യബോധത്തോടെ സമീപിക്കുകയും ചെയ്യുക.
6. 'ഞാന്' എന്ന രീതിയില് സംസാരിക്കുക
''നീ എപ്പോഴും ഇങ്ങനെയാണ്'' എന്ന് പറയുന്നതിനുപകരം, ''എനിക്ക് ഇത് വിഷമമായി'' എന്ന രീതിയില് സംസാരിക്കുക. ഇത് അനാവശ്യ തര്ക്കങ്ങള് ഒഴിവാക്കാന് സഹായിക്കും.
7. ക്ഷമിക്കാന് പഠിക്കുക
പഴയ ദേഷ്യവും പകയും മനസ്സില് സൂക്ഷിക്കുന്നത് നമ്മെ കൂടുതല് വിഷമത്തിലാക്കും. ക്ഷമിക്കാന് പഠിക്കുന്നത് മനസ്സിന് സമാധാനം നല്കുകയും ബന്ധങ്ങള് മെച്ചപ്പെടുത്തുകയും ചെയ്യും.
8. നര്മ്മബോധം വളര്ത്തുക
ചില സാഹചര്യങ്ങളില് ചെറിയൊരു ചിരിയും നര്മ്മവും സമ്മര്ദം കുറയ്ക്കാന് സഹായിക്കും. എന്നാല് മറ്റുള്ളവരെ വേദനിപ്പിക്കുന്ന തമാശ ഒഴിവാക്കണം.
9. മനസ്സിനെ ശാന്തമാക്കുന്ന ശീലങ്ങള് പരിശീലിക്കുക
ആഴത്തില് ശ്വാസം എടുക്കുക, ഇഷ്ടപ്പെട്ട സംഗീതം കേള്ക്കുക, പ്രാര്ഥിക്കുക, ധ്യാനിക്കുക, അല്ലെങ്കില് യോഗ പരിശീലിക്കുക. ഇത്തരം ശീലങ്ങള് മനസ്സിനെ ശാന്തമാക്കാന് സഹായിക്കും.
10. ആവശ്യമുള്ളപ്പോള് സഹായം തേടുക
കോപം നിയന്ത്രിക്കാന് വളരെ ബുദ്ധിമുട്ട് അനുഭവപ്പെടുകയോ, അത് നമ്മുടെ ജീവിതത്തെയും ബന്ധങ്ങളെയും പ്രതികൂലമായി ബാധിക്കുകയോ ചെയ്യുന്നുവെങ്കില്, ഒരു കൗണ്സിലറുടെയോ മാനസികാരോഗ്യ വിദഗ്ധന്റെയോ സഹായം തേടാന് മടിക്കരുത്.
കോപം ഇല്ലാതാക്കുക എന്നതല്ല പ്രധാനമായത്; അത് ശരിയായ രീതിയില് നിയന്ത്രിക്കാന് പഠിക്കുകയാണ് വേണ്ടത്. ചെറിയ മാറ്റങ്ങള് ജീവിതത്തില് വലിയ മാറ്റങ്ങള് കൊണ്ടുവരും. ചിന്തിച്ച് സംസാരിക്കുക, ക്ഷമിക്കാന് പഠിക്കുക, ശാന്തത പാലിക്കുക, പ്രശ്നങ്ങള്ക്ക് പരിഹാരം കണ്ടെത്തുക. ഈ നല്ല ശീലങ്ങള് പരിശീലിച്ചാല് കോപത്തെ നിയന്ത്രിക്കാനും സന്തോഷകരമായ ജീവിതം നയിക്കാനും നമുക്ക് കഴിയും.