ഡെങ്കിപ്പനിയും മലേറിയയും അകറ്റാന് ശ്രദ്ധിക്കേണ്ട കാര്യങ്ങള്?
മഴ കനക്കുന്നതോടെ പകര്ച്ചാവ്യാധികളുടെ ഭീഷണിയും ഏറുകയാണ്. മഴക്കാല രോഗങ്ങളെ ഫലപ്രദമായി പ്രതിരോധിക്കാന് കൃത്യമായ രോഗനിര്ണയവും ചികിത്സയും ഒപ്പം പൊതുജന പങ്കാളിത്തവും അത്യന്താപേക്ഷിതമാണ്.
ഡെങ്കിപ്പനി, മലേറിയ തുടങ്ങിയ രോഗങ്ങള് പരത്തുന്ന കൊതുകുകള് വീട്ടുപരിസരങ്ങളില് വളരുന്നത് തടയാന് അതീവ ജാഗ്രത വേണം. ഈ സാഹചര്യത്തില് വീടുകളില് ചെയ്യേണ്ടതും ചെയ്യാന് പാടില്ലാത്തതുമായ കാര്യങ്ങള് കൃത്യമായി മനസ്സിലാക്കേണ്ടതുണ്ട്.
വീടുകളില് ചെയ്യേണ്ട പ്രധാന കാര്യങ്ങളിലൊന്ന് വീട്ടുപരിസരം, ടെറസ്, ഫ്ലവര് പോട്ടുകള് എന്നിവിടങ്ങളില് വെള്ളം കെട്ടിക്കിടക്കുന്നുണ്ടെങ്കില് അത് ആഴ്ചയിലൊരിക്കല് നിര്ബന്ധമായും ഒഴുക്കിക്കളയുക എന്നതാണ്.
കുടിവെള്ളവും മറ്റ് ആവശ്യങ്ങള്ക്കായി ശേഖരിക്കുന്ന വെള്ളവും ടാങ്കുകളിലും ബക്കറ്റുകളിലും കൊതുകുകള്ക്ക് കടക്കാന് കഴിയാത്ത വിധം കൃത്യമായി മൂടിവെക്കണം. കുട്ടികളും മുതിര്ന്നവരും പുറത്തിറങ്ങുമ്പോള് ശരീരം പൂര്ണമായി മൂടുന്ന വസ്ത്രങ്ങള് ധരിക്കാന് ശ്രദ്ധിക്കേണ്ടതാണ്.
കൂടാതെ ജനലുകളിലും വാതിലുകളിലും നെറ്റുകള് ഘടിപ്പിക്കുക, ഉറങ്ങുമ്പോള് കൊതുകുവല ഉപയോഗിക്കുക, അംഗീകൃത കൊതുക് നിവാരണ റിപ്പലന്റുകള് ഉപയോഗിക്കുക എന്നിവയും പ്രധാനമാണ്.
കടുത്ത പനി, കണ്ണിന് പിന്നിലെ വേദന, സന്ധിവേദന, വിറയല്, ഛര്ദ്ദി, അസാധാരണമായ രക്തസ്രാവം തുടങ്ങിയ രോഗലക്ഷണങ്ങള് കണ്ടാല് ഒട്ടും വൈകാതെ തന്നെ വൈദ്യസഹായം തേടേണ്ടതാണ്.
അതേസമയം മഴക്കാലത്തുണ്ടാകുന്ന പനിയെ വെറുമൊരു ജലദോഷമായി കണ്ട് തള്ളിക്കളയരുത്. കൃത്യമായ പരിശോധനയിലൂടെ അത് ഡെങ്കിയോ മലേറിയയോ അല്ലെന്ന് ഉറപ്പാക്കേണ്ടതുണ്ട്. ഡോക്ടറുടെ നിര്ദ്ദേശമില്ലാതെ മെഡിക്കല് സ്റ്റോറുകളില് നിന്ന് വാങ്ങി വേദനസംഹാരികള് കഴിക്കുന്നത് പൂര്ണ്ണമായും ഒഴിവാക്കണം.
ഇത് ഡെങ്കിപ്പനി ബാധിതരില് ആന്തരിക രക്തസ്രാവത്തിന് കാരണമായേക്കാം. ചിരട്ടകള്, പ്ലാസ്റ്റിക് കപ്പുകള്, ചെടിച്ചട്ടിയുടെ അടിയിലെ പ്ലേറ്റുകള് എന്നിവയില് പോലും വെള്ളം കെട്ടിക്കിടക്കാന് അനുവദിക്കരുത്.
കൊതുക് നശീകരണത്തിനായുള്ള പുകയ്ക്കല് പറക്കുന്ന കൊതുകുകളെ മാത്രമേ നശിപ്പിക്കൂ എന്നതിനാല് വീടിനുള്ളിലെ കൊതുകിന്റെ ഉറവിടങ്ങള് ഇല്ലാതാക്കാന് നമ്മള് തന്നെ നേരിട്ട് മുന്കൈ എടുക്കണം.
മലേറിയ പരത്തുന്ന കൊതുകുകള് രാത്രിയിലാണ് കടിക്കുന്നതെങ്കില്, ഡെങ്കിപ്പനി പരത്തുന്ന ഈഡിസ് കൊതുകുകള് പ്രധാനമായും പകല് സമയത്താണ് കടിക്കുന്നത് എന്നതിനാല് പകല് സമയത്തും ജാഗ്രത പാലിക്കാന് മറക്കരുത്.