റഷ്യൻ പ്രസിഡന്റ് വ്ലാഡിമിർ പുടിൻ തർക്കപ്രദേശമായ കുരിൽ ദ്വീപുകൾ സന്ദർശിച്ചതിൽ രൂക്ഷമായ പ്രതികരണവുമായി ജപ്പാൻ രംഗത്ത്. പുടിന്റെ നടപടി ഒട്ടും അംഗീകരിക്കാനാവാത്തതാണെന്ന് ജാപ്പനീസ് പ്രധാനമന്ത്രി സനേ തകൈച്ചി വ്യക്തമാക്കി.

സംഭവത്തിൽ ജപ്പാൻ വിദേശകാര്യ മന്ത്രി തോഷിമിത്സു മൊതെഗി റഷ്യൻ അംബാസഡർ നികൊളായ് നോസ്ദ്രേവിനെ വിളിച്ചുവരുത്തി ഔദ്യോഗികമായി പ്രതിഷേധം അറിയിച്ചു. ജപ്പാൻ ‘വടക്കൻ പ്രദേശങ്ങൾ’ എന്നും റഷ്യ ‘തെക്കൻ കുരിൽ’ എന്നും വിളിക്കുന്ന ഈ ദ്വീപുകൾ, രണ്ടാം ലോകമഹായുദ്ധത്തിന്റെ അവസാനഘട്ടത്തിലാണ് സോവിയറ്റ് യൂണിയൻ പിടിച്ചെടുത്തത്. ഈ തർക്കം കാരണം ഇരു രാജ്യങ്ങളും തമ്മിൽ ഇതുവരെ ഔദ്യോഗിക സമാധാന ഉടമ്പടിയിൽ എത്തിച്ചേരാൻ കഴിഞ്ഞിട്ടില്ല.

“ചരിത്രപരമായും അന്താരാഷ്ട്ര നിയമപ്രകാരവും വടക്കൻ പ്രദേശങ്ങൾ ജപ്പാന്റെ ഭാഗമാണ്. റഷ്യൻ പ്രസിഡന്റിന്റെ ഈ സന്ദർശനം ജപ്പാന്റെ നിലപാടിന് വിരുദ്ധവും ജനങ്ങളുടെ വികാരത്തെ വ്രണപ്പെടുത്തുന്നതുമാണ്” എന്ന് സനേ തകൈച്ചി പറഞ്ഞു. ദ്വീപിൽ എത്തിയ പുടിൻ അവിടുത്തെ ആശുപത്രി, സ്കൂൾ, മത്സ്യ സംസ്കരണ ശാല എന്നിവ സന്ദർശിക്കുകയും പ്രദേശവാസികളുമായി സംവദിക്കുകയും ചെയ്തിരുന്നു.