ക്രിസ്ത്യന് സമൂഹത്തിനെതിരായ അക്രമം: കേന്ദ്ര ആഭ്യന്തര മന്ത്രി അമിത് ഷായ്ക്ക് കത്തയച്ച് യുണൈറ്റഡ് ക്രിസ്ത്യന് ഫോറം
ക്രിസ്ത്യന് സമൂഹത്തിനെതിരായ അക്രമത്തില് ആഭ്യന്തര മന്ത്രി അമിത് ഷാക്ക് കത്തയച്ചു യുണൈറ്റഡ് ക്രിസ്ത്യന് ഫോറം.
കഴിഞ്ഞ ദിവസങ്ങളില് ക്രിസ്മസ് കരോളുകളുമായി ബന്ധപ്പെട്ട് ഉത്തര്പ്രദേശ്, ഛത്തീസ്ഗഡ് തുടങ്ങിയ സംസ്ഥാനങ്ങളില് വലിയ തോതിലുള്ള അതിക്രമങ്ങളാണ് റിപ്പോര്ട്ട് ചെയ്തിരിക്കുന്നത്.
ഛത്തീസ്ഗഡില് 24ന് സംഘപരിവാര് സംഘടനകള് പ്രഖ്യാപിച്ച ബന്ദ് പിന്വലിക്കാന് നടപടി സ്വീകരിക്കണമെന്ന് കത്തില് ആവശ്യപ്പെടുന്നു. ക്രിസ്ത്യന് സമൂഹത്തിനെതിരെ കൂടുതല് അക്രമങ്ങള് ഉണ്ടാകാനുള്ള സാധ്യത കണക്കിലെടുത്ത് ആണ് ഇവരുടെ ആവശ്യം.
ജബല്പൂരില് ക്രിസ്ത്യന് സമൂഹത്തിന് നേരെ നടന്ന അതിക്രമത്തിന്റെ ദൃശ്യങ്ങള് സമൂഹ മാധ്യമങ്ങളില് വ്യാപകമായി പ്രചരിക്കുന്നുണ്ട്.
ഭരണഘടന മുന്നോട്ടുവെക്കുന്ന മതസ്വാതന്ത്ര്യം ഉറപ്പാക്കുന്നതിനായി കേന്ദ്ര ആഭ്യന്തര മന്ത്രി നേരിട്ട് ഇടപെടണമെന്നാണ് യുണൈറ്റഡ് ക്രിസ്ത്യന് ഫോറത്തിന്റെ ആവശ്യം.
പ്രത്യേകിച്ച് ഉത്തര്പ്രദേശ്, ഛത്തീസ്ഗഡ് എന്നീ സംസ്ഥാനങ്ങളില് ക്രമസമാധാന നില തകരുന്ന സാഹചര്യത്തില് ആഭ്യന്തര മന്ത്രാലയത്തിന്റെ ശക്തമായ ഇടപെടല് വേണമെന്ന് സംഘടന കത്തിലൂടെ ആവശ്യപ്പെട്ടു.