ടെന്നീസ് ഇതിഹാസ താരം കാര്‍ലോസ് അല്‍കാരസ് വൈദികനില്‍ നിന്നു ആശീര്‍വാദം സ്വീകരിക്കുന്ന വീഡിയോ വൈറല്‍
ന്യൂയോര്‍ക്ക്: 2025 യുഎസ് ഓപ്പണ്‍ ടെന്നീസ് മത്സരങ്ങള്‍ നടന്നുക്കൊണ്ടിരിക്കുന്നതിനിടെ ടെന്നീസ് ഇതിഹാസ താരം കാര്‍ലോസ് അല്‍കാരസ് കത്തോലിക്ക വൈദികനില്‍ നിന്നു ആശീര്‍വാദം സ്വീകരിക്കുന്ന ചിത്രം സമൂഹ മാധ്യമങ്ങളില്‍ വൈറലായി.
പ്രൊഫഷണല്‍ ടെന്നീസില്‍ ലോക രണ്ടാം നമ്പര്‍ താരമായ കാര്‍ലോസ്, വൈദികനില്‍ നിന്നു ആശീര്‍വാദം സ്വീകരിക്കുന്ന വീഡിയോ ന്യൂയോര്‍ക്ക് നഗരത്തിലെ സെന്റ് പാട്രിക്‌സ് കത്തീഡ്രല്‍ ദേവാലയമാണ് സമൂഹ മാധ്യമങ്ങളിലൂടെ പങ്കുവെച്ചത്.
ഓഗസ്റ്റ് 23 ശനിയാഴ്ച സെന്റ് പാട്രിക്‌സ് കത്തീഡ്രല്‍ പോസ്റ്റ് ചെയ്ത വീഡിയോയില്‍, ലോട്ടെ ന്യൂയോര്‍ക്ക് പാലസ് ഹോട്ടലിലെ ഒരു ബോള്‍റൂമില്‍ കറുത്ത വൈദിക വേഷം ധരിച്ച ഒരു വൈദികന്‍ അല്‍കാരസിനെ അനുഗ്രഹിച്ചു പ്രാര്‍ത്ഥിക്കുന്ന ദൃശ്യങ്ങളാണുള്ളത്.
കത്തോലിക്ക വൈദികന്‍ അല്‍കാരസിന് വിശുദ്ധ കുരിശിന്റെ അടയാളത്താല്‍ ആശീര്‍വാദം നല്‍കുന്നതും വിശുദ്ധജലം തളിക്കുമ്പോള്‍ ശിരസ് നമിക്കുന്നതും ദൃശ്യങ്ങളില്‍ വ്യക്തമാണ്. ശാന്തമായ സംഭാഷണത്തില്‍ ഏര്‍പ്പെട്ടതിന് ശേഷമാണ് താരം പിന്‍വാങ്ങിയത്.
2023-ലെ വിംബിള്‍ഡണിലും 2024-ലെ ഫ്രഞ്ച് ഓപ്പണിലും ടൂര്‍ണമെന്റ് വിജയങ്ങളോടെ, മൂന്ന് മേഖലകളിലും ഒരു ഗ്രാന്‍ഡ് സ്ലാം ടൂര്‍ണമെന്റ് നേടുന്ന ഏറ്റവും പ്രായം കുറഞ്ഞ കളിക്കാരനായ കാര്‍ലോസ് തന്റെ അടിയുറച്ച കത്തോലിക്ക വിശ്വാസം പല തവണ പരസ്യമായി പ്രകടിപ്പിച്ചിട്ടുണ്ട്.
രണ്ടു വര്‍ഷം മുന്‍പ് കാര്‍ലോസ് ദൈവമാതാവിന്റെ പ്രത്യക്ഷീകരണത്തെ തുടര്‍ന്ന് ലോക പ്രശസ്തമായ മെക്‌സിക്കന്‍ മരിയന്‍ തീര്‍ത്ഥാടന കേന്ദ്രമായ ഗ്വാഡലൂപ്പ സന്ദര്‍ശിക്കുകയും നവംബര്‍ അവസാനം ഈ സന്ദര്‍ശനത്തെക്കുറിച്ച് ഇന്‍സ്റ്റാഗ്രാമില്‍ പോസ്റ്റ് പങ്കുവെയ്ക്കുകയും ചെയ്തിരിന്നു.