വെനിസ്വേലയെ പിടിച്ചുലച്ച ഇരട്ട ഭൂകമ്പത്തിന്റെ അവശിഷ്ടങ്ങൾക്കിടയിൽ നിന്നും എട്ട് ദിവസങ്ങൾക്ക് ശേഷം ഒരു സുരക്ഷാ ജീവനക്കാരനെ അത്ഭുതകരമായി ജീവനോടെ രക്ഷപ്പെടുത്തി. 140 ടണ്ണിലധികം കോൺക്രീറ്റ് അവശിഷ്ടങ്ങൾക്കിടയിൽ കുടുങ്ങിക്കിടന്ന ഹെർനാൻ ഗിൽ (43) എന്നയാളെയാണ് രക്ഷാപ്രവർത്തകർ അതീവ സങ്കീർണ്ണമായ ദൗത്യത്തിലൂടെ പുറത്തെടുത്തത്.

ഇതുവരെ കണ്ടിട്ടുള്ളതിൽ വച്ച് ഏറ്റവും സങ്കീർണ്ണവും സാങ്കേതികമായി വെല്ലുവിളികൾ നിറഞ്ഞതുമായ രക്ഷാപ്രവർത്തനമാണിതെന്ന് ദൗത്യത്തിൽ പങ്കാളിയായ ചിലിയിൽ നിന്നുള്ള ഫയർഫോഴ്സ് ഉദ്യോഗസ്ഥൻ മാധ്യമങ്ങളോട് പറഞ്ഞു. ജൂൺ 24-ന് വെനിസ്വേലയിലുണ്ടായ ഭൂകമ്പത്തിൽ ഇതുവരെ 2,300-ഓളം പേർ മരണപ്പെടുകയും പതിനായിരക്കണക്കിന് ആളുകളെ കാണാതാവുകയും ചെയ്തിട്ടുണ്ട്.

താൻ പൂർണ്ണ ആരോഗ്യവാനാണെന്നും തന്റെ നഖത്തിന് പോലും പരിക്കേറ്റിട്ടില്ലെന്നുമാണ് ഹെർനാൻ രക്ഷാപ്രവർത്തകരോട് പറഞ്ഞത്. കുടുങ്ങിക്കിടന്ന ദിവസങ്ങളിൽ ചെറിയ ദ്വാരത്തിലൂടെ അദ്ദേഹത്തിന് കുടിക്കാനുള്ള വെള്ളവും ഐവി ഡ്രിപ്പും (Intravenous drip) രക്ഷാപ്രവർത്തകർ എത്തിച്ചുനൽകിയിരുന്നു. അവശിഷ്ടങ്ങൾക്കിടയിലേക്ക് കടത്തിവിട്ട ചെറിയ ക്യാമറയിലൂടെ അദ്ദേഹവുമായി രക്ഷാപ്രവർത്തകർ നിരന്തരം സംസാരിച്ചുകൊണ്ടിരുന്നു. പൊടിപടലങ്ങളിൽ നിന്ന് രക്ഷനേടാൻ അദ്ദേഹത്തിന് മാസ്കും കണ്ണടയും നൽകിയിരുന്നു.

“അദ്ദേഹം വളരെ സന്തുഷ്ടനായ ഒരു മനുഷ്യനാണ്. തനിക്ക് ഇഷ്ടപ്പെട്ട പ്രത്യേക ഫ്ലേവറുകളിലുള്ള ഹൈഡ്രേഷൻ ഡ്രിങ്കുകൾ വരെ അദ്ദേഹം ചോദിച്ചു വാങ്ങി. തങ്ങളെ നിരന്തരം പ്രോത്സാഹിപ്പിച്ചുകൊണ്ട് ഹെർനാൻ സംസാരിച്ചുകൊണ്ടേയിരുന്നു” മെക്സിക്കൻ റെഡ് ക്രോസ് അം​ഗമായ
മാർക്കോ അന്റോണിയോ ഫ്രാങ്കോ പറഞ്ഞു.

ഹെർനാനെ കണ്ടെത്തിയ കോസ്റ്റാറിക്കൻ പാരാമെഡിക് അലൻ മാഡ്രിഗൽ തന്റെ ആദ്യ അന്താരാഷ്ട്ര ദൗത്യത്തിന്റെ അനുഭവം പങ്കുവെച്ചുകൊണ്ട് പറഞ്ഞത്, ഈ സംഭവം തന്നെ പൂർണ്ണമായും മാറ്റിമറിച്ചു എന്നാണ്. എട്ട് ദിവസത്തെ അനിശ്ചിതത്വത്തിനൊടുവിൽ ഹെർനാൻ പുറത്തെത്തുമ്പോൾ ലോകമെമ്പാടുമുള്ള രക്ഷാപ്രവർത്തകർ ആഹ്ലാദത്തോടെയാണ് അദ്ദേഹത്തെ സ്വീകരിച്ചത്.