അമേരിക്കയിലേക്കുള്ള കയറ്റുമതിക്ക് ഇന്ത്യക്ക് 25% തീരുവ ഏര്‍പ്പെടുത്തുമെന്ന് ട്രംപ്. ഓഗസ്റ്റ് 1 മുതല്‍ പ്രാബല്യത്തില്‍. നടപടി ഇന്ത്യയുടെ ഉയര്‍ന്ന താരിഫും പണേതര വ്യാപാര തടസ്സങ്ങളും ചൂണ്ടിക്കാട്ടി
വാഷിംഗ്ഡണ്‍: ഓഗസ്റ്റ് 1 മുതല്‍ ഇന്ത്യന്‍ ഇറക്കുമതികള്‍ക്ക് 25% തീരുവ ചുമത്തുമെന്നും കൂടാതെ ഒരു പിഴയും ഏര്‍പ്പെടുത്തുമെന്നും യുഎസ് പ്രസിഡന്റ് ഡൊണാള്‍ഡ് ട്രംപ് പ്രഖ്യാപിച്ചു. ഇന്ത്യയുടെ ഉയര്‍ന്ന താരിഫുകള്‍, പണേതര വ്യാപാര തടസ്സങ്ങള്‍, റഷ്യയുമായുള്ള നിലവിലുള്ള സൈനിക, ഊര്‍ജ്ജ ബന്ധങ്ങള്‍ എന്നിവ ചൂണ്ടിക്കാട്ടിയാണ് നടപടി.
തന്റെ സോഷ്യല്‍ മീഡിയ പ്ലാറ്റ്ഫോമായ ട്രൂത്ത് സോഷ്യലിലെ ഒരു പോസ്റ്റില്‍ ഡൊണാള്‍ഡ് ട്രംപ് എഴുതി, ''ഇന്ത്യ ഞങ്ങളുടെ സുഹൃത്താണ്, പക്ഷേ വര്‍ഷങ്ങളായി, അവരുടെ താരിഫുകള്‍ വളരെ ഉയര്‍ന്നതായതിനാല്‍ ഞങ്ങള്‍ അവരുമായി താരതമ്യേന കുറച്ച് മാത്രമേ ഇടപാടുകള്‍ നടത്തിയിട്ടുള്ളൂ... കൂടാതെ ഏതൊരു രാജ്യത്തെക്കാളും ഏറ്റവും കഠിനവും വൃത്തികെട്ടതുമായ പണേതര വ്യാപാര തടസ്സങ്ങള്‍ അവര്‍ക്കുണ്ട്.''
'ഇന്ത്യ എപ്പോഴും അവരുടെ സൈനിക ഉപകരണങ്ങളില്‍ ഭൂരിഭാഗവും റഷ്യയില്‍ നിന്നാണ് വാങ്ങിയിട്ടുള്ളത്, റഷ്യ ഉക്രെയ്‌നിലെ കൊലപാതകം അവസാനിപ്പിക്കണമെന്ന് എല്ലാവരും ആഗ്രഹിക്കുന്ന ഒരു സമയത്ത്, ചൈനയ്ക്കൊപ്പം റഷ്യയുടെ ഏറ്റവും വലിയ ഊര്‍ജ്ജം വാങ്ങുന്നവരും അവര്‍ തന്നെയാണ്!' - ട്രംപ് പറഞ്ഞു.
'അതിനാല്‍ ഇന്ത്യ ഓഗസ്റ്റ് ആദ്യം മുതല്‍ 25% താരിഫ് നല്‍കും, മുകളിലുള്ളവയ്ക്ക് പിഴയും നല്‍കും' എന്ന് പ്രഖ്യാപിച്ചുകൊണ്ടാണ് ഡൊണാള്‍ഡ് ട്രംപ് തന്റെ പോസ്റ്റ് അവസാനിപ്പിച്ചത്.