ഗര്ഭിണികളായ വനിതാ പൊലീസുകാര്ക്ക് യൂണിഫോം ഇളവ് സ്വാഗതാര്ഹം:പ്രൊ ലൈഫ് ഗ്ലോബല് ഫെലോഷിപ്പ്
കൊച്ചി: ഗര്ഭിണികളായ വനിതാ പൊലീസ് ഉദ്യോഗസ്ഥര്ക്ക് കൂടുതല് സൗകര്യപ്രദമായ യൂണിഫോം ധരിക്കാന് അനുമതി നല്കിയ കേരള പൊലീസ് ആസ്ഥാനത്തിന്റെ തീരുമാനം സ്വാഗതാര്ഹവും മാതൃകാപരവുമാണെന്ന് പ്രൊ ലൈഫ് ഗ്ലോബല് ഫെലോഷിപ്പ് ചെയര്മാന് സാബു ജോസ് പ്രസ്താവിച്ചു.
ഗര്ഭകാലം ഒരു സ്ത്രീയുടെ ജീവിതത്തിലെ പ്രത്യേകമായ ശാരീരികവും മാനസികവുമായ ഘട്ടമാണ്. ഈ കാലയളവില് ഔദ്യോഗിക ചുമതലകള് നിര്വഹിക്കുന്ന വനിതാ പൊലീസ് ഉദ്യോഗസ്ഥരുടെ ആരോഗ്യവും സുരക്ഷയും സൗകര്യവും പരിഗണിച്ച് കാക്കി സല്വാര് കമ്മീസ്, ഷാള്, സാന്ഡല് എന്നിവ ധരിക്കാന് അനുമതി നല്കിയ നടപടി മാനുഷിക പരിഗണനയുടെ മികച്ച മാതൃകയാണ്.
ആഭ്യന്തര മന്ത്രി രമേശ് ചെന്നിത്തലയുടെ നേതൃത്വത്തിലുള്ള ആഭ്യന്തര വകുപ്പും കേരള പൊലീസ് ആസ്ഥാനവും സ്വീകരിച്ച ഈ സ്ത്രീസൗഹൃദ നടപടിയെ പ്രൊ ലൈഫ് ഗ്ലോബല് ഫെലോഷിപ്പ് അഭിനന്ദിക്കുന്നു.
ഗര്ഭിണിയായ വനിതാ പൊലീസ് ഉദ്യോഗസ്ഥയുടെ സംരക്ഷണം എന്നത് ഒരു ജീവനക്കാരിയുടെ സൗകര്യത്തിന്റെ മാത്രം വിഷയമല്ല. അവളുടെ ഉദരത്തില് വളരുന്ന ജനിക്കാനിരിക്കുന്ന കുഞ്ഞിന്റെ സുരക്ഷയും ആരോഗ്യവും സംരക്ഷിക്കുന്നതിന്റെ ഭാഗം കൂടിയാണ്.
അതുകൊണ്ടുതന്നെ ഗര്ഭകാലത്ത് വനിതാ പൊലീസ് ഉദ്യോഗസ്ഥര്ക്ക് കൂടുതല് സുരക്ഷിതവും സൗകര്യപ്രദവുമായ തൊഴില് സാഹചര്യം ഉറപ്പാക്കേണ്ടത് ഭരണകൂടത്തിന്റെ ഉത്തരവാദിത്വമാണ്.
ഉദരത്തില് വളരുന്ന കുഞ്ഞിനെ സുരക്ഷിതമായി സംരക്ഷിച്ചുകൊണ്ട് മാതൃത്വത്തിന്റെ ഉത്തരവാദിത്വം നിര്വഹിക്കുന്ന വനിതാ പൊലീസ് ഉദ്യോഗസ്ഥകള്ക്ക്, അവരുടെ ആരോഗ്യസ്ഥിതിക്ക് ഏറ്റവും അനുയോജ്യമായ ഓഫീസുകളിലോ ചുമതലകളിലോ സേവനം ചെയ്യുന്നതിനുള്ള സാഹചര്യം കൂടി സര്ക്കാര് ഒരുക്കുമെന്ന് പ്രത്യാശിക്കുന്നു.
ഗര്ഭകാലത്ത് അനാവശ്യമായ ശാരീരിക അധ്വാനം, ദീര്ഘനേരം നില്ക്കേണ്ടിവരുന്ന സാഹചര്യങ്ങള്, അമിതമായ യാത്ര, തിരക്കേറിയ ഫീല്ഡ് ഡ്യൂട്ടി തുടങ്ങിയവ ഒഴിവാക്കുകയോ ആവശ്യാനുസരണം നിയന്ത്രിക്കുകയോ ചെയ്യുന്നത് അമ്മയുടെയും ഗര്ഭസ്ഥ ശിശുവിന്റെയും ക്ഷേമത്തിന് സഹായകരമാകും.
സ്ത്രീകളുടെ മാതൃത്വത്തെയും തൊഴില് അവകാശങ്ങളെയും ഒരുപോലെ മാനിക്കുന്ന തൊഴില് അന്തരീക്ഷം ഉറപ്പാക്കേണ്ടത് ആധുനിക സമൂഹത്തിന്റെ ഉത്തരവാദിത്വമാണ്. ഗര്ഭിണിയായതിനാല് ഒരു വനിതയ്ക്കും തന്റെ ഔദ്യോഗിക ഉത്തരവാദിത്വങ്ങള് നിര്വഹിക്കുന്നതില് അനാവശ്യമായ ശാരീരിക ബുദ്ധിമുട്ടുകള് നേരിടേണ്ട സാഹചര്യം ഉണ്ടാകരുത്.
ഗര്ഭിണികളായ വനിതാ പൊലീസുകാര്ക്ക് യൂണിഫോമില് നല്കിയ ഈ ഇളവ് കേരളത്തിലെ മറ്റ് സര്ക്കാര്-സ്വകാര്യ സ്ഥാപനങ്ങള്ക്കും സ്ത്രീസൗഹൃദവും കുടുംബസൗഹൃദവുമായ തൊഴില്നയങ്ങള് രൂപപ്പെടുത്താന് പ്രചോദനമാകട്ടെ.
മാതൃത്വത്തെ സംരക്ഷിക്കുകയും ഗര്ഭസ്ഥ ശിശുവിന്റെ അവകാശത്തെ മാനിക്കുകയും സ്ത്രീകളുടെ തൊഴില് പങ്കാളിത്തത്തെ പ്രോത്സാഹിപ്പിക്കുകയും ചെയ്യുന്ന ഇത്തരം നടപടികള് ജീവനെ ആദരിക്കുന്ന ഒരു സമൂഹത്തിന്റെ അടയാളങ്ങളാണ്.
ഈ സുപ്രധാന തീരുമാനത്തിന് കേരള സര്ക്കാരിനെയും ആഭ്യന്തര മന്ത്രി രമേശ് ചെന്നിത്തലയെയും, കേരള പൊലീസ് ആസ്ഥാനത്തെയും അഭിനന്ദിക്കുന്നതായി സാബു ജോസ് അറിയിച്ചു.
സാബു ജോസ്
9446329343.
ചെയര്മാന്
പ്രൊ ലൈഫ് ഗ്ലോബല് ഫെലോഷിപ്പ്