ദേശീയപാതകളിൽ ഇനി യാത്ര ചിലവേറും! ടോൾ നിരക്കുകൾ വർദ്ധിപ്പിച്ചു

പുതിയ സാമ്പത്തിക വർഷത്തിന്റെ തുടക്കത്തിൽ രാജ്യത്തെ ദേശീയപാതകളിലെ ടോൾ നിരക്കുകൾ പരിഷ്കരിച്ച് നാഷണൽ ഹൈവേ അതോറിറ്റി ഓഫ് ഇന്ത്യ. ഏപ്രിൽ 1 മുതൽ പ്രാബല്യത്തിൽ വന്ന പുതിയ ഉത്തരവ് പ്രകാരം പ്രധാന പാതകളിൽ മൂന്ന് മുതൽ അഞ്ച് ശതമാനം വരെയാണ് വർദ്ധനവ് രേഖപ്പെടുത്തിയിരിക്കുന്നത്.

ദക്ഷിണേന്ത്യയിലെ പ്രധാന പാതകളായ ബെംഗളൂരു-മൈസൂരു എക്സ്പ്രസ് വേ, ബെംഗളൂരു-ചെന്നൈ എക്സ്പ്രസ് വേ, വിമാനത്താവളത്തിലേക്കുള്ള ബല്ലാരി റോഡ് തുടങ്ങിയവയിലെല്ലാം ഇനി യാത്രയ്ക്ക് കൂടുതൽ പണം നൽകേണ്ടി വരും.

ബെംഗളൂരു കെംപഗൗഡ വിമാനത്താവളത്തിലേക്കുള്ള സദഹള്ളി ടോൾ ഗേറ്റിൽ കാറുകളുടെ വൺവേ നിരക്കിൽ മാറ്റമില്ലെങ്കിലും പോയി-വരാനുള്ള യാത്രയ്ക്ക് ഇനി 185 രൂപ നൽകണം. ട്രക്കുകൾക്കും ബസുകൾക്കും 5 മുതൽ 15 രൂപ വരെയാണ് വർദ്ധനവ്. ഇത് ബിഎംടിസി ബസ് സർവീസുകളെയും വായു വജ്ര പോലുള്ള എസി ബസ് നിരക്കുകളെയും പരോക്ഷമായി ബാധിച്ചേക്കാം. സാറ്റലൈറ്റ് ടൗൺ റിങ് റോഡ് ഇടനാഴിയിലും കാറുകളുടെ ടോൾ നിരക്കിൽ അഞ്ച് രൂപയുടെ വർദ്ധനവ് ഉണ്ടായിട്ടുണ്ട്.

ബെംഗളൂരു-മൈസൂരു എക്സ്പ്രസ് വേയിലൂടെയുള്ള യാത്രയ്ക്കും ചിലവേറും.

കണിമിണിക്കി ടോൾ പ്ലാസയിൽ കാറുകളുടെ വൺവേ നിരക്ക് 180 രൂപയായും റിട്ടേൺ നിരക്ക് 265 രൂപയായും ഉയർത്തി. അതുപോലെ ശേഷഗുരി പ്ലാസയിലും അഞ്ച് രൂപയുടെ വർദ്ധനവുണ്ട്.

പുതിയ നിരക്ക് പ്രകാരം ബെംഗളൂരുവിൽ നിന്ന് മൈസൂരുവിലേക്കുള്ള വൺവേ യാത്രയ്ക്ക് മാത്രം ഇനി ആകെ 355 രൂപ ടോൾ ഇനത്തിൽ നൽകണം. യാത്രാ സൗകര്യങ്ങൾ വർദ്ധിക്കുന്നുണ്ടെങ്കിലും അടിക്കടിയുണ്ടാകുന്ന ഈ നിരക്ക് വർദ്ധന യാത്രക്കാരെ ആശങ്കയിലാക്കുന്നുണ്ട്.

ബെംഗളൂരു-ചെന്നൈ എക്സ്പ്രസ് വേയുടെ നിലവിൽ പ്രവർത്തനസജ്ജമായ ഭാഗങ്ങളിലും പുതിയ നിരക്കുകൾ ബാധകമാക്കിയിട്ടുണ്ട്.

പണി പൂർത്തിയാകാത്ത ഭാഗങ്ങൾ പരിഗണിച്ച് 2026 ഫെബ്രുവരിയിൽ അതോറിറ്റി നിരക്കുകൾ കുറച്ചിരുന്നെങ്കിലും പുതിയ സാമ്പത്തിക വർഷത്തെ പരിഷ്കരണം ചെറിയ രീതിയിലുള്ള വർദ്ധനവ് വീണ്ടും കൊണ്ടുവന്നു.

ചരക്ക് നീക്കത്തെയും അന്തർസംസ്ഥാന യാത്രകളെയും ഈ പുതിയ നിരക്കുകൾ ബാധിക്കുമെന്നാണ് വിലയിരുത്തപ്പെടുന്നത്. 50 യാത്രകൾക്കുള്ള മാസ പാസ് നിരക്കുകളിലും ഇതോടൊപ്പം വർദ്ധനവ് വന്നിട്ടുണ്ട്.