ഇറാഖിലേക്ക് മടങ്ങിയെത്തുന്നവർക്ക് വീടും ഭൂമിയും നൽകും; പ്രധാനമന്ത്രിയിൽ നിന്ന് ഉറപ്പ് ലഭിച്ചതായി കൽദായ പാത്രിയാർക്കീസ്

ബാഗ്ദാദ്: ഇസ്ലാമിക തീവ്രവാദികളുടെ ഭീഷണിയെത്തുടർന്ന് പലായനം ചെയ്ത ക്രൈസ്തവർ ഉൾപ്പെടെയുള്ളവർക്ക് സ്വദേശത്തേക്ക് മടങ്ങിയാൽ സംരക്ഷണം നൽകുമെന്നും പുതിയ വീടും ഭൂമിയും നൽകുമെന്നും ഇറാഖ് പ്രധാനമന്ത്രിയിൽ നിന്ന് ഉറപ്പ് ലഭിച്ചതായി കൽദായ പാത്രിയാർക്കീസ് പോൾ മൂന്നാമൻ നോന വ്യക്തമാക്കി. ഇറാഖ് പ്രധാനമന്ത്രി അലി ഫാലിഹ് അൽ സെയ്ദിയുമായി നടത്തിയ കൂടിക്കാഴ്ചയിലാണ് ഈ നിർണായക വാഗ്ദാനം ലഭിച്ചത്.

നല്ലൊരു അന്തരീക്ഷം രൂപപ്പെടുന്നത് മികച്ചൊരു സമ്പദ്‌വ്യവസ്ഥയിൽ നിന്നാണെന്നും, ആളുകൾക്ക് ജോലി ചെയ്യുന്നതിൽ സുരക്ഷിതത്വവും ഭവികാലത്തിൽ വിശ്വാസവും തോന്നിയാൽ അവർ തിരിച്ചുവരുമെന്നും അൽ സെയ്ദി വിശ്വസിക്കുന്നതായി പാത്രിയാർക്കീസ് പറഞ്ഞു. വിദേശത്തു നിന്ന് ഇറാഖിലേക്ക് മടങ്ങാൻ ആഗ്രഹിക്കുന്ന ക്രിസ്ത്യാനികൾ ഉൾപ്പെടെ പത്തു ലക്ഷത്തോളം കുടുംബങ്ങൾക്ക് ഭൂമിയും പുതിയ വീടും ലഭിക്കാൻ അർഹതയുണ്ടായിരിക്കുമെന്ന് പ്രധാനമന്ത്രി വ്യക്തമാക്കിയിട്ടുണ്ട്.

കാൽ നൂറ്റാണ്ട് മുമ്പുണ്ടായിരുന്നതിനേക്കാൾ വളരെ കുറഞ്ഞ എണ്ണത്തിലേക്ക് ചുരുങ്ങിപ്പോയ ഇറാഖിലെ ക്രിസ്ത്യൻ സമൂഹത്തിന് പുതിയ പ്രത്യാശ നൽകുന്നതാണ് ഈ പ്രഖ്യാപനം. 2003 ൽ ഇറാഖിൽ 15 ലക്ഷത്തോളം ക്രിസ്ത്യാനികൾ ഉണ്ടായിരുന്നെങ്കിൽ 2014 ൽ ഐ.എസ് ആക്രമണത്തെത്തുടർന്ന് നിനവേ താഴ്വരയിൽ നിന്ന് പലായനം ചെയ്തതുൾപ്പെടെയുള്ളവർ ചേർന്ന് ഇന്ന് 1,50,000-ത്തിനും 2,50,000-ത്തിനും ഇടയിൽ ആളുകൾ മാത്രമാണ് അവിടെ അവശേഷിക്കുന്നത്.

വിദേശത്തു നിന്ന് മടങ്ങിവരാൻ സന്നദ്ധരായ ഇറാഖി ക്രിസ്ത്യാനികളിൽ നിന്ന് രാജ്യത്തേക്ക് നിക്ഷേപങ്ങൾ വരണമെന്നാണ് പ്രധാനമന്ത്രി ആഗ്രഹിക്കുന്നത്. കൽദായക്കാർ നിക്ഷേപകരായി തിരിച്ചെത്തിയാൽ അത് മറ്റുള്ളവർക്കും വലിയ അവസരങ്ങൾ സൃഷ്ടിക്കുമെന്ന് പാത്രിയാർക്കീസ് ​​പ്രതീക്ഷ പ്രകടിപ്പിച്ചു.