വടക്കേ ഇറ്റലിയിലെ വിവിധ രൂപതകളില്‍ നിന്നും ജൂബിലി തീര്‍ത്ഥാടനത്തിനായി റോമില്‍ എത്തിയവരെ, ലിയോ പതിനാലാമന്‍ പാപ്പാ സ്വീകരിച്ചു
വത്തിക്കാന്‍:വടക്കേ ഇറ്റലിയിലെ വിവിധ രൂപതകളില്‍ നിന്നും ജൂബിലി തീര്‍ത്ഥാടനത്തിനായി റോമില്‍ എത്തിയവരെ, പരിശുദ്ധ പിതാവ് ലിയോ പതിനാലാമന്‍ പാപ്പാ വത്തിക്കാന്‍ ചത്വരത്തില്‍, സദസില്‍ സ്വീകരിച്ചു.
തൊസ്‌ക്കാന പ്രവിശ്യയിലെ രൂപതകളില്‍ നിന്നും, കാമരീനോ-സാന്‍ സെവെറിനോ മാര്‍ക്കെ, ഫാബ്രിയാനോ-മതേലീക്ക, ലഞ്ചാനോ -ഓര്‍ത്തോണ, സാന്‍ സെവെറോ രൂപതകളില്‍ നിന്നുമുള്ളവരായിരുന്നു തീര്‍ത്ഥാടകര്‍.
ക്രൈസ്തവ ശിഷ്യത്വത്തിന്റെയും, കൂട്ടായ്മയുടെയും മാനം പ്രകടമാക്കികൊണ്ട്, ഏവരും ചേര്‍ന്ന് വിശ്വാസം പ്രഘോഷിക്കുവാനുള്ള അവസരമാണ്, ജൂബിലി തീര്‍ത്ഥാടനമെന്നു പാപ്പാ എടുത്തുപറഞ്ഞു.
ക്രിസ്തുവിന്റെ സഭ രൂപതകള്‍ പോലുള്ള യാഥാര്‍ത്ഥ്യങ്ങളിലാണ് വെളിപ്പെടുന്നതെന്നും, എന്നാല്‍ സ്ഥാപിതമായ അതിരുകള്‍ക്കപ്പുറം ദൈവത്തിന്റെ മക്കളുടെ ഏക കുടുംബമാണ് നമ്മള്‍ എന്നുള്ള അനുഭവമാണ്, കത്തോലിക്കാ സഭ എന്നതുകൊണ്ട് അര്‍ത്ഥമാക്കുന്നതെന്നും പാപ്പാ ചൂണ്ടിക്കാട്ടി.
രൂപതകളുടെ അസ്തിത്വപരവും സാമൂഹികവും സഭാംഗവുമായ അനുഭവം വ്യത്യസ്തമാണെന്നതും, ചരിത്രം വൈവിധ്യമാണെന്നതും സുവിശേഷവത്കരണത്തിന്റെ വെല്ലുവിളിയാണെങ്കിലും, സുവിശേഷം പ്രഘോഷിക്കുന്നതിനുപുതിയ അജപാലന വഴികള്‍ തേടേണ്ടത് ആവശ്യമാണെന്നും പാപ്പാ എടുത്തുപറഞ്ഞു.
ഇറ്റലിയില്‍ ദൈവവിളികള്‍ കുറയുന്നതും മറ്റും രൂപതകളുടെ ഏകീകരണ പ്രക്രിയകള്‍ക്ക് വഴി തെളിച്ചിട്ടുള്ളതും പാപ്പാ ചൂണ്ടിക്കാട്ടി. സെമിനാരികളിലെ പ്രാരംഭരൂപീകരണതില്‍ പ്രത്യേകമായ ശ്രദ്ധ പുലര്‍ത്തുവാനും പാപ്പാ ഏവരെയും ക്ഷണിച്ചു. ഇവിടെ ഒരു സിനഡല്‍ ചിന്താഗതിയോടുകൂടി മുന്‍പോട്ടു പോകണമെന്നും പാപ്പാ പറഞ്ഞു.
സമൂഹത്തിലും സഭയിലും ഏറെ സംഭാവനകള്‍ നല്‍കിയ ഒരു പ്രദേശം എന്ന നിലയില്‍, തീര്‍ത്ഥാടകര്‍ വരുന്ന ദേശങ്ങളിലെ പഴയ ചരിത്രം മറന്നുപോകരുതെന്നും, ഈ പൈതൃകത്തിന്റെ സമൃദ്ധി, ക്രിസ്തീയ രൂപീകരണത്തിനും, സുവിശേഷവത്ക്കരണത്തിനും പ്രചോദനം നല്കട്ടെയെന്നും പാപ്പാ ആശംസിച്ചു.
കരകൗശല നൈപുണ്യത്തിന്റെയും ചെറുകിട, ഇടത്തരം വ്യവസായത്തിന്റെയും കേന്ദ്രമെന്ന നിലയില്‍ ഒരുകാലത്ത് അറിയപ്പെട്ടിരുന്ന ഈ ദേശങ്ങളില്‍, എന്നാല്‍ ഇന്ന്, സാമ്പത്തിക പ്രതിസന്ധി നിരവധി തൊഴിലാളികളെ പിരിച്ചുവിടാന്‍ നിര്‍ബന്ധിക്കുന്ന അവസ്ഥ ഏറെ വേദനാജനകമാണെന്നു പാപ്പാ പറഞ്ഞു.
ഇവിടെ, നിശ്ചലമായി തുടരരുതെന്നും ആളുകളുടെ, പ്രത്യേകിച്ച് ദരിദ്രരുടെ ജീവിതത്തെക്കുറിച്ച് ശ്രദ്ധാലുവായ ഒരു സഭയുടെ മുഖം രൂപപ്പെടുത്താന്‍ സഭാ അംഗങ്ങള്‍ക്ക് സാധിക്കട്ടെയെന്നും പാപ്പാ ആശംസിച്ചു.