സത്‌ലജ് നദിയിൽ വെള്ളപ്പൊക്കത്തിന് സാധ്യത. പാകിസ്ഥാന് മുന്നറിയിപ്പുമായി ഇന്ത്യ
ന്യൂഡൽഹി: വടക്കേ ഇന്ത്യൻ സംസ്ഥാനങ്ങളിൽ തുടരുന്ന കനത്ത മഴയെത്തുടർന്ന് സത്‌ലജ് നദിയിൽ വെള്ളപ്പൊക്ക സാധ്യതയുണ്ടെന്ന് ഇന്ത്യ പാകിസ്ഥാന് മുന്നറിയിപ്പ് നൽകി. ഇന്ത്യയിലെ പ്രധാന അണക്കെട്ടുകളിൽ നിന്ന് അധികജലം തുറന്നുവിടുന്ന സാഹചര്യത്തിൽ, ദുരന്തങ്ങൾ ഒഴിവാക്കാൻ വേണ്ട മുൻകരുതലുകൾ എടുക്കുന്നതിനായി നയതന്ത്ര മാർഗങ്ങളിലൂടെയാണ് മുന്നറിയിപ്പ് കൈമാറിയതെന്ന് ഔദ്യോഗിക വൃത്തങ്ങൾ ചൊവ്വാഴ്ച അറിയിച്ചു.
മനുഷ്യജീവനും സ്വത്തിനും നാശനഷ്ടം ഉണ്ടാകുന്നത് ഒഴിവാക്കുക എന്ന മാനുഷിക പരിഗണനയുടെ അടിസ്ഥാനത്തിലാണ് ഈ നടപടി.
കഴിഞ്ഞ ആഴ്ച താവി നദിയിലെ വെള്ളപ്പൊക്ക സാധ്യതയെക്കുറിച്ച് മൂന്ന് തവണ ഇന്ത്യ പാകിസ്ഥാന് മുന്നറിയിപ്പ് നൽകിയിരുന്നു.
സത്‌ലജ്, ബിയാസ്, രവി തുടങ്ങിയ നദികളും പഞ്ചാബിലെ വിവിധ നദികളും കരകവിഞ്ഞൊഴുകുന്നതിനാലാണ് ഇപ്പോഴത്തെ സ്ഥിതി ഗുരുതരമായിരിക്കുന്നത്.
പഹൽഗാം ഭീകരാക്രമണത്തിന് ശേഷം ഇരു രാജ്യങ്ങളും തമ്മിലുള്ള പതിവ് ജലവൈദ്യുത ഡാറ്റ കൈമാറ്റം ഇന്ത്യ നിർത്തിവച്ചിരുന്നു.
എന്നാൽ, ഔപചാരികമായ ഡാറ്റ പങ്കിടൽ നിർത്തിവച്ചെങ്കിലും, സമീപകാല മുന്നറിയിപ്പുകൾ മാനുഷിക കാരണങ്ങളാൽ മാത്രമാണ് നൽകുന്നതെന്ന് ഇന്ത്യൻ അധികൃതർ വ്യക്തമാക്കി.