അടുത്ത 30 വര്‍ഷത്തിനുള്ളില്‍ മധ്യ ജപ്പാനില്‍ ഒരു മെഗാഭൂകമ്പം ഉണ്ടാകാനുള്ള സാധ്യതയെന്ന്
അടുത്ത 30 വര്‍ഷത്തിനുള്ളില്‍ മധ്യ ജപ്പാനില്‍ ഒരു മെഗാഭൂകമ്പം ഉണ്ടാകാനുള്ള സാധ്യത 16 മുതല്‍ 18 ശതമാനം വരെയാണെന്ന പ്രവചനവുമായി ജാപ്പനീസ് ഭരണകൂടം. കിങ്കി പടിഞ്ഞാറന്‍ മേഖലയിലും ഹൊകുരികു മധ്യ മേഖലയിലും 7 അല്ലെങ്കില്‍ അതില്‍ കൂടുതല്‍ തീവ്രതയുള്ള ഭൂകമ്പത്തിന് കാരണമാകുമെന്ന് ഭൂകമ്പ ഗവേഷണ സമിതി ജൂണ്‍ 27ന് പ്രഖ്യാപിച്ചു.
ജപ്പാന്‍ കടലില്‍ കുറഞ്ഞത് 20 കിലോമീറ്റര്‍ വിസ്തൃതിയില്‍ വ്യാപിച്ചുകിടക്കുന്ന 23 സജീവ ഫോള്‍ട്ട് സോണുകളില്‍ ഏതിലും എപ്പോള്‍ വേണമെങ്കിലും മെഗാ ഭൂകമ്പം ഉണ്ടാകാമെന്നാണ് ഇതുമായി ബന്ധപ്പെട്ട് ജപ്പാന്‍ ഭരണകൂടം നിയമിച്ച പാനല്‍ അറിയിച്ചിരിക്കുന്നത്.
കിങ്കി മേഖലയുടെ വടക്കന്‍ തീരത്ത്, പടിഞ്ഞാറന്‍ ഫോള്‍ട്ടുകളിലെ 9 എണ്ണത്തില്‍ 7.0 അല്ലെങ്കില്‍ അതില്‍ കൂടുതല്‍ തീവ്രതയുള്ള ഭൂകമ്പം ഉണ്ടാകാനുള്ള സാധ്യത 4 മുതല്‍ 6 ശതമാനം വരെ ആണെന്ന് കണക്കാക്കപ്പെടുന്നു.
നോട്ടോ പെനിന്‍സുലയ്ക്ക് പുറത്തുള്ളവ ഉള്‍പ്പെടെ കിഴക്കന്‍ സോണിലെ 14 ഫോള്‍ട്ടുകളില്‍ 12 മുതല്‍ 14 ശതമാനം വരെ വന്‍ ഭൂകമ്പം ഉണ്ടാകാമെന്നാണ് കണ്ടെത്തിയിരിക്കുന്നത്. അടുത്ത 30 വര്‍ഷത്തിനുള്ളില്‍ ഇത് സംഭവിക്കാമെന്ന് പാനല്‍ അംഗങ്ങള്‍ വെളിപ്പെടുത്തുന്നു.
നമ്മള്‍ ജീവിച്ചിരിക്കുമ്പോള്‍ തന്നെ ഒരു വലിയ ഭൂകമ്പം സംഭവിക്കാമെന്നതിന്റെ സൂചനയാണിതെന്ന് കമ്മിറ്റിയുടെ തലവനായ ടോക്കിയോ സര്‍വകലാശാല പ്രൊഫസര്‍ എമെറിറ്റസ് നവോഷി ഹിരാത പറഞ്ഞതായി ജപ്പാന്‍ ടൈംസ് റിപ്പോര്‍ട്ട് ചെയ്തു.
വീടുകളെ ഭൂകമ്പ പ്രതിരോധശേഷിയുള്ളതാക്കുക, ഫര്‍ണിച്ചറുകള്‍ സുരക്ഷിതമാക്കുക തുടങ്ങിയ നടപടികള്‍ ജനങ്ങള്‍ സ്വീകരിക്കുമെന്ന് പ്രതീക്ഷിക്കുന്നതായും നവോഷി വ്യക്തമാക്കുന്നു.
എന്നാല്‍, 2024-ലെ ഭൂകമ്പത്തിന്റെ പ്രഭവകേന്ദ്രമായ നോട്ടോ പെനിന്‍സുലയുടെ വടക്കുള്ള ഫോള്‍ട്ട് സോണില്‍, അടുത്ത 30 വര്‍ഷത്തിനുള്ളില്‍ ഒരു വലിയ ഭൂകമ്പത്തിന് കാരണമാകാനുള്ള സാധ്യത പൂജ്യം ശതമാനത്തോടടുത്താണെന്നും നവോഷി ചൂണ്ടിക്കാണിക്കുന്നു.
നേരെമറിച്ച്, ഉപദ്വീപിന്റെ പടിഞ്ഞാറുള്ള 23 സ്ഥലങ്ങളില്‍ ഒരു ഫോള്‍ട്ടും ഫോള്‍ട്ട് സോണിന്റെ ഭാഗങ്ങളും ഒരു മെഗാ ഭൂകമ്പത്തിന് കാരണമാകാന്‍ ഏറ്റവും സാധ്യതയുള്ളതായി കണക്കാക്കപ്പെടുന്നു.
കഴിഞ്ഞ വര്‍ഷത്തേതുപോലുള്ള ഒരു ഭൂകമ്പം നോട്ടോ പെനിന്‍സുലയുടെ വടക്കന്‍ തീരത്തുള്ള ഒരു ഫോള്‍ട്ട് സോണില്‍ കുറച്ചു കാലത്തേക്ക് ഉണ്ടാകണമെന്നില്ല. പക്ഷേ മറ്റൊരു പ്രദേശത്ത് അത്തരമൊരു ഭൂകമ്പം ഉണ്ടാകാനുള്ള സാധ്യത വളരെ കൂടുതലാണെന്നും നവോഷി വ്യക്തമാക്കി.
കഴിഞ്ഞ വര്‍ഷം ജനുവരി 1 ന് ലോകം പുതുവത്സരാഘോഷത്തിനിടെ ജപ്പാനിലെ നോട്ടോ പെനിന്‍സുലയില്‍ 7.5 തീവ്രത രേഖപ്പെടുത്തിയ ഭൂകമ്പം ഉണ്ടായത് ശ്രദ്ധേയമാണ്. ഭൂകമ്പങ്ങള്‍ക്കും സുനാമികള്‍ക്കും രാജ്യവും ജനങ്ങളും തയ്യാറാകണമെന്ന് നവോഷി സര്‍ക്കാരിനോട് ആവശ്യപ്പെട്ടു.
23 ഫോള്‍ട്ടുകളിലുടനീളമുള്ള ഭൂകമ്പങ്ങളുടെ പ്രതീക്ഷിക്കുന്ന ഭൂകമ്പ തീവ്രതയെക്കുറിച്ചുള്ള ദീര്‍ഘകാല വിലയിരുത്തലുകളും ഡാറ്റയും പാനല്‍ നല്‍കി. ഫുകുയി പ്രിഫെക്ചറിന്റെ തീരത്ത് ഒരു ഭൂകമ്പം ഉണ്ടാകുമെന്ന് പ്രവചിക്കപ്പെടുന്നു, ഇത് ജാപ്പനീസ് ഭൂകമ്പ സ്‌കെയിലില്‍ 6 ല്‍ താഴെയാകുമെന്നും ജിയോളജിസ്റ്റ് വിലയിരുത്തുന്നു.