മഴപ്പെയ്ത്ത് തുടരുന്നു. കെ.എസ്.ഇ.ബി.ക്ക് നഷ്ടം 25 കോടി. തകരാര് ബാധിച്ചത് കണ്ണൂര്, പത്തനംതിട്ട ജില്ലകളെ. വൈദ്യുതി തകരാറുകള് പരിഹരിക്കാനുള്ള ഊര്ജ്ജിതശ്രമം നടക്കുന്നുണ്ടെന്നും കെ.എസ്.ഇ.ബി
തിരുവനന്തപുരം: പലജില്ലകളിലും കനത്തമഴ തുടരുന്നു. അതിതീവ്ര മഴയില് സംസ്ഥാനത്ത് വൈദ്യുതിവിതരണ ശൃംഖലയ്ക്ക് 25.43 കോടി രൂപയുടെ നാശനഷ്ടമുണ്ടായതായി കെ.എസ്.ഇ.ബി.യുടെ കണക്ക്.
വൈദ്യുതി വിതരണ ശൃംഖലയ്ക്ക് വന്നാശനഷ്ടമാണ് ഉണ്ടായിട്ടുള്ളത്. 03.08.2026 വൈകിട്ട് 4 വരെയുള്ള കണക്കനുസരിച്ച് 2892 ട്രാന്സ്ഫോര്മറുകളെ മഴക്കെടുതി ബാധിച്ചു.
6,56,770 ഉപഭോക്താക്കള്ക്ക് വൈദ്യുതി വിതരണം തടസ്സപ്പെട്ടു. 349 ഹൈ ടെന്ഷന് പോസ്റ്റുകളും 2599 ലോ ടെന്ഷന് പോസ്റ്റുകളും തകര്ന്നു.
248 ഇടങ്ങളില് ഹൈ ടെന്ഷന് ലൈനും 7212 ഇടങ്ങളില് ലോ ടെന്ഷന് ലൈനും പൊട്ടിവീണു. 233 ട്രാന്സ്ഫോര്മറുകള് പൂര്ണ്ണമായും വെള്ളത്തിനടിയിലായി.
വൈദ്യുതി തകരാറുകള് പരിഹരിക്കാനുള്ള ഊര്ജ്ജിതശ്രമം സംസ്ഥാന വ്യാപകമായി നടന്നുവരുന്നുണ്ടെന്നും കെ.എസ്.ഇ.ബി അറിയിച്ചു.
കണ്ണൂര്, പത്തനംതിട്ട ജില്ലകളിലെ ഉപഭോക്താക്കളെയാണ് വൈദ്യുതി തകരാര് ഏറ്റവും കൂടുതല് ബാധിച്ചത്. വൈദ്യുതി തടസ്സങ്ങള് പ്രധാനമായും വെള്ളപ്പൊക്ക ബാധിത പ്രദേശങ്ങളിലാണ് നിലനില്ക്കുന്നത്.
വെള്ളം പൂര്ണ്ണമായും മാറിയതിനുശേഷം സുരക്ഷാമാനദണ്ഡങ്ങള് പൂര്ണ്ണമായും പാലിച്ച് മാത്രമേ അവിടങ്ങളിലെ വൈദ്യുതി പുന:സ്ഥാപന പ്രവര്ത്തനങ്ങള് നടത്തുവാന് കഴിയുകയുള്ളൂവെന്നും കെ.എസ്.ഇ.ബി അറിയിച്ചു.
വൈദ്യുതി പുന:സ്ഥാപന പ്രവര്ത്തനങ്ങള് കൂടുതല് ഫലപ്രദമായും കാര്യക്ഷമമായും ഏകോപിപ്പിക്കുന്നതിനായി സര്ക്കിള് തലത്തില് കണ്ട്രോള് റൂമുകള് പ്രവര്ത്തനം ആരംഭിച്ചിട്ടുണ്ട്.