സംസ്ഥാനത്ത് താപനില ഉയരുന്ന സാഹചര്യത്തില് 11 ജില്ലകളില് കേന്ദ്ര കാലാവസ്ഥാ വകുപ്പ് യെല്ലോ അലര്ട്ട് പ്രഖ്യാപിച്ചു
തിരുവനന്തപുരം: സംസ്ഥാനത്ത് താപനില ഉയരുന്ന സാഹചര്യത്തില് 11 ജില്ലകളില് കേന്ദ്ര കാലാവസ്ഥാ വകുപ്പ് യെല്ലോ അലര്ട്ട് പ്രഖ്യാപിച്ചു.
കൊല്ലം, കോട്ടയം, പാലക്കാട് ജില്ലകളില് താപനില 37ത്ഥഇ വരെയും തിരുവനന്തപുരം, ആലപ്പുഴ, പത്തനംതിട്ട, എറണാകുളം, തൃശ്ശൂര്, മലപ്പുറം, കോഴിക്കോട്, കണ്ണൂര് ജില്ലകളില് 36ത്ഥഇ വരെയും ചൂട് കൂടാന് സാധ്യതയുണ്ടെന്നാണ് മുന്നറിയിപ്പ്.
സാധാരണ ലഭിക്കേണ്ടതിനേക്കാള് രണ്ട് മുതല് മൂന്ന് ഡിഗ്രി സെല്ഷ്യസ് വരെ അധികം ചൂട് വരും ദിവസങ്ങളിലും തുടരാന് സാധ്യതയുള്ളതിനാല് പൊതുജനങ്ങള് ജാഗ്രത പാലിക്കണമെന്ന് അധികൃതര് അറിയിച്ചു.
രാവിലെ 10 മണി മുതല് ഉച്ചയ്ക്ക് 3 മണി വരെയുള്ള സമയങ്ങളില് അന്തരീക്ഷത്തില് അള്ട്രാവയലറ്റ് രശ്മികളുടെ സാന്നിധ്യം കൂടുതലായിരിക്കുമെന്ന് റിപ്പോര്ട്ടുകള് സൂചിപ്പിക്കുന്നു.
ഈ സമയങ്ങളില് നേരിട്ട് സൂര്യപ്രകാശം ഏല്ക്കുന്നത് പരമാവധി ഒഴിവാക്കേണ്ടതാണ്.
സൂര്യരശ്മികള് തുടര്ച്ചയായി ശരീരത്തില് ഏല്ക്കുന്നത് സൂര്യാതപം, വിവിധതരം ത്വക്ക് രോഗങ്ങള്, നേത്രരോഗങ്ങള് എന്നിവയ്ക്ക് കാരണമായേക്കാം. അതിനാല് പുറത്തിറങ്ങുന്നവര് കുടയോ മറ്റ് സുരക്ഷാ മാര്ഗങ്ങളോ ഉപയോഗിക്കണമെന്നും നിര്ദ്ദേശമുണ്ട്.
പുറംജോലികളില് ഏര്പ്പെടുന്നവര്, മത്സ്യത്തൊഴിലാളികള്, ബൈക്ക് യാത്രക്കാര്, വിനോദസഞ്ചാരികള് എന്നിവര് പ്രത്യേക മുന്കരുതലുകള് സ്വീകരിക്കണം. കൂടാതെ ചര്മ്മരോഗങ്ങളുള്ളവര്, ക്യാന്സര് രോഗികള്, രോഗപ്രതിരോധ ശേഷി കുറഞ്ഞവര് എന്നിവര് ഈ സമയങ്ങളില് കൂടുതല് ജാഗ്രത പുലര്ത്തേണ്ടതുണ്ട്.
ധാരാളം വെള്ളം കുടിക്കാനും നിര്ജ്ജലീകരണം തടയാനുള്ള മാര്ഗങ്ങള് സ്വീകരിക്കാനും ആരോഗ്യ വകുപ്പും കാലാവസ്ഥാ നിരീക്ഷണ കേന്ദ്രവും അഭ്യര്ത്ഥിച്ചു.