അസാധാരണ കണ്സിസ്റ്ററിയില് ഒത്തുചേര്ന്ന് പരിശുദ്ധ പിതാവും കര്ദ്ദിനാള് സംഘവും
വത്തിക്കാന്സിറ്റി:പ്രാര്ത്ഥനയ്ക്കും വിചിന്തനങ്ങള്ക്കുമായി പരിശുദ്ധ പിതാവ് ലിയോ പതിനാലാമന് പാപ്പായും കര്ദ്ദിനാള് സംഘവും അസാധാരണ കണ്സിസ്റ്ററിയില്.
ജനുവരി ഏഴ്, എട്ട് തീയതികളിലായി വത്തിക്കാനില് നടക്കുന്ന വിവിധ സമ്മേളനങ്ങളില്, സഭാപരമായ രേഖകള്, സഭയുടെ മിഷനറി സ്വഭാവം, കൂരിയയുടെ പ്രാധാന്യം, പ്രാദേശികസഭകളുമായുള്ള ബന്ധം, സിനഡാത്മകത, ആരാധനക്രമം തുടങ്ങിയ വിവിധ വിഷയങ്ങള് വിചിന്തനം ചെയ്യപ്പെടും.
പ്രത്യേകമായി, 'എവഞ്ചേലി ഗൗദിയും' , 'പ്രെദിക്കാത്തെ എവഞ്ചേലിയും' എന്നീ പ്രമുഖ രേഖകള് വിചിന്തനങ്ങളില് പ്രത്യേക സ്ഥാനം പിടിക്കും.
ലിയോ പതിനാലാമന് പാപ്പാ വിളിച്ചുകൂട്ടുന്ന ആദ്യ അസാധാരണ കണ്സിസ്റ്ററിയാണ് ഇതെന്ന പ്രത്യേകതയും ഈ സംഗമത്തെ സവിശേഷമാക്കി മാറ്റുന്നുണ്ട്.
മാര്പാപ്പാമാരിലൂടെ തുടരുന്ന സഭയിലെ ഉദ്ബോധങ്ങളുടെ തുടര്ച്ചാസ്വഭാവവും ഈ കണ്സിസ്റ്ററി വിളിച്ചോതുന്നുണ്ട്.
രണ്ടു ദിവസങ്ങള് നീളുന്ന പ്രാര്ത്ഥനയുടെയും വിചിന്തനത്തിന്റെയും ഈ കണ്സിസ്റ്ററിയുടെ ഭാഗമായി, ജനുവരി 8 വ്യാഴാഴ്ച രാവിലെ 7.30-ന് വത്തിക്കാനില് പരിശുദ്ധ പിതാവ് ലിയോ പതിനാലാമന്റെ മുഖ്യ കാര്മ്മികത്വത്തില് വിശുദ്ധ ബലിയര്പ്പണവും നടക്കും.
പരിശുദ്ധ പിതാവിന് പിന്തുണയും ഉപദേശങ്ങളും നല്കാനും, ആഗോളസഭയുടെ ഭരണമെന്ന ഗൗരവമേറിയ പാപ്പായുടെ നിയോഗത്തില് അദ്ദേഹത്തെ സഹായിക്കാനുമാണ് കര്ദ്ദിനാള് സംഘം ഈ സമ്മേളനത്തിലൂടെയും പരിശ്രമിക്കുക.
വത്തിക്കാനിലെ സിനഡ് ഹാളില് ബുധനാഴ്ച വൈകുന്നേരം നാലുമണിക്കാണ് കണ്സിസ്റ്ററി ഔദ്യോഗികമായി ആരംഭിച്ചത്. അടച്ചിട്ട ഹാളില് നടക്കുന്ന സമ്മേളനങ്ങളില് പാപ്പായും കര്ദ്ദിനാള് സംഘവും സംബന്ധിക്കും.
കഴിഞ്ഞ ദിവസം നടന്ന ജൂബിലി സമാപന ചടങ്ങുകളിലും എപ്പിഫനി ആഘോഷത്തിലും നിരവധി കര്ദ്ദിനാള്മാര് പങ്കെടുത്തിരുന്നു.
വ്യാഴാഴ്ച രാവിലെ 9.30-നായിരിക്കും രണ്ടാം ദിനത്തിലെ പ്രഥമ സമ്മേളനം. ഇത് ഉച്ചയ്ക്ക് 12.45 വരെ നീളും. സിനഡ് ഹാളില്ത്തന്നെ നടക്കുന്ന ഈ സമ്മേളനത്തിന് ശേഷം ഉച്ചകഴിഞ്ഞ് 3.15 മുതല് 7 വരെയും ഇതേ ഹാളില് വച്ച് അവസാന സമ്മേളനവും നടക്കും.
നിലവില്, 245 പേരാണ് കര്ദ്ദിനാള് സംഘത്തിലുള്ളത്. ഇവരില് 122 പേര് വോട്ടവകാശമുള്ളവരും 123 പേര് വോട്ടവകാശമില്ലാത്തവരുമാണ്.
സഭയുടെ ചരിത്രത്തില് ഇതാദ്യമായാണ് വോട്ടവകാശമില്ലാത്ത കര്ദ്ദിനാള്മാരുടെ എണ്ണം വോട്ടവകാശമുള്ളവരുടെ എണ്ണത്തേക്കാള് കൂടുതലാകുന്നത് എന്ന ഒരു പ്രത്യേകതയും ഇത്തവണയുണ്ട്.