ബ്രസ്സൽസിൽ സ്ഥിതി ചെയ്യുന്ന കത്തീഡ്രലിന്റെ എണ്ണൂറാം വാർഷികാഘോഷങ്ങൾ ജനുവരി 11ന്

ബ്രസ്സൽസ്: ബെൽജിയൻ തലസ്ഥാനമായ ബ്രസ്സൽസിൽ സ്ഥിതി ചെയ്യുന്ന കത്തീഡ്രലിന്റെ എണ്ണൂറാം വാർഷികാഘോഷങ്ങൾ ജനുവരി 11നു നടക്കും. 

ലെയോ പതിനാലാമൻ പാപ്പയുടെ പ്രത്യേക പ്രതിനിധിയായി കർദ്ദിനാൾ പിയട്രോ പരോളിൻ ചടങ്ങിൽ പങ്കെടുക്കും. 1226-ലാണ് എൻറിക്കോ രണ്ടാമൻ രാജാവിന്റെ തീരുമാനപ്രകാരം, ബ്രസ്സൽസ് കത്തീഡ്രൽ ദേവാലയം നിർമ്മിക്കുന്നത്.

മലിനെസ്-ബ്രസ്സൽസ് അതിരൂപതാദ്ധ്യക്ഷൻ ആർച്ച് ബിഷപ്പ് ല്യൂക്ക് തേർലിൻഡന്റെ മുഖ്യ കാർമ്മികത്വത്തിൽ അർപ്പിക്കപ്പെടുന്ന എണ്ണൂറാം വർഷത്തെ വാർഷിക വിശുദ്ധ ബലിയിൽ നിരവധി കർദ്ദിനാളുമാരും മെത്രാന്മാരും വിശ്വാസികളും വൈദികരും പങ്കെടുക്കും. ബെൽജിയത്തെ രാജകുടുംബവും ചടങ്ങുകളിൽ സംബന്ധിക്കുമെന്നാണ് കരുതപ്പെടുന്നത്.

ജനുവരി 11ന് നടക്കുന്ന ചടങ്ങുകൾക്ക് പുറമേ, കത്തീഡ്രലിന്റെ ചരിത്രം വ്യക്തമാക്കുന്ന പ്രദർശനം, വർഷം മുഴുവൻ, സംഗീതക്കച്ചേരികൾ, കോൺഫറൻസുകൾ, നിരവധി സാംസ്‌കാരിക, ആധ്യാത്മിക ചടങ്ങുകൾ എന്നിവയും ഒരുക്കിയിട്ടുണ്ട്.

 പാരീസിലെ പ്രസിദ്ധമായ നോട്രഡാം ദേവാലയത്തിന് സമാനമായി ബ്രബാന്റൈൻ ഗോതിക് ശൈലിയിലാണ് വിശുദ്ധ മിഖായേൽ മാലാഖയുടെ നാമത്തിൽ ദേവാലയം നിർമ്മിച്ചിരിക്കുന്നത്. ഓരോ വർഷവും പതിനായിരങ്ങളാണ് ദേവാലയം സന്ദർശിക്കുന്നത്.