നിയമസഭാ സമ്മേളനം നാളെ മുതല്‍. പൊലീസിനെതിരെ ഉയര്‍ന്ന പരാതികള്‍ ഉയര്‍ത്തിക്കാട്ടാന്‍ പ്രതിപക്ഷം. രാഹുല്‍. വിഷയം ചര്‍ച്ചയാക്കാന്‍ ഭരണപക്ഷം
കൊച്ചി:നാളെ ആരംഭിക്കുന്ന നിയമസഭാ സമ്മേളനം രാഷ്ട്രീയ വിവാദങ്ങള്‍ കൊണ്ട് സജീവമാകും. പൊലീസ് അതിക്രമങ്ങള്‍ക്ക് മുഖ്യമന്ത്രിയെക്കൊണ്ട് നിയമസഭയില്‍ മറുപടി പറയിക്കുമെന്ന് പ്രതിപക്ഷ നേതാവ് വി.ഡി സതീശന്‍ പറഞ്ഞു.
അക്രമകാരികളായ വന്യജീവികളെ വെടിവെച്ചു കൊല്ലുന്ന ഭേദഗതി ബില്‍ ഈ സഭാ സമ്മേളനത്തില്‍ ചര്‍ച്ചയാകും.
സാധാരണ ഗതിയില്‍ നിയമസഭാ സമ്മേളനം തുടങ്ങുമ്പോള്‍ പ്രതിപക്ഷത്തിന്റെ കയ്യിലാണ് വിഷയങ്ങള്‍ കൂടുതലായി ഉണ്ടാവുക. ഇത്തവണ പക്ഷേ അങ്ങനെയല്ല.
ഭരണപക്ഷത്തിനും പ്രതിപക്ഷത്തിനും അങ്ങോട്ടും ഇങ്ങോട്ടുമടിക്കാന്‍ വടികളുണ്ട്. രാഹുല്‍ മാങ്കൂട്ടത്തിലാണ് ഭരണപക്ഷത്തിന് തുറുപ്പ് ചീട്ട്. പോലീസിനെതിരെ ഉയര്‍ന്ന പരാതികള്‍ ഉയര്‍ത്തിക്കാട്ടി നിയമസഭയില്‍ സര്‍ക്കാരിനെ പ്രതിപക്ഷം കടന്നാക്രമിക്കും.
പൊലീസ് അതിക്രമങ്ങളെ ന്യായീകരിക്കില്ലെന്നു സ്പീക്കര്‍ എ.എന്‍ ഷംസീര്‍ പ്രതികരിച്ചു. തദ്ദേശ,നിയമസഭ തിരഞ്ഞെടുപ്പുകള്‍ നടക്കാനിരിക്കെ ആഭ്യന്തര വകുപ്പിന്റെ വീഴ്ചകള്‍ എണ്ണിപറഞ്ഞു സര്‍ക്കാരിനെ പ്രതിരോധത്തിലാക്കാനാണ് പ്രതിപക്ഷത്തിന്റെ തീരുമാനം.
അയ്യപ്പ സംഗമവും,തൃശൂരിലെ ശബ്ദരേഖ വിവാദവും സഭയില്‍ ചര്‍ച്ചയാകും.അക്രമകാരികളായ വന്യജീവികളെ വെടിവെച്ചു കൊല്ലാന്‍ ഉത്തരവിടുന്ന നിയമഭേദഗതി ബില്ലടക്കം പ്രധാനപ്പെട്ട നിയമനിര്‍മ്മാണങ്ങള്‍ സഭയില്‍ എത്തുന്നുണ്ട്.
മനുഷ്യന് സംരക്ഷണം ഉറപ്പാക്കാനാണ് പുതിയ നിയമഭേദഗതി വനം മന്ത്രി എ.കെ ശശീന്ദ്രനും പ്രതികരിച്ചു. ഒക്ടോബര്‍ 10 വരെ മൂന്ന് സെഷനുകളിലായി 12 ദിവസമാണ് സഭ ചേരുക.