ആര്‍ട്ടെമിസ് II ദൗത്യം; നിങ്ങളുടെ പേരും ചന്ദ്രനെ വലംവെയ്ക്കും. അപൂര്‍വ്വ അവസരമൊരുക്കി നാസ
യുഎസ്:ചന്ദ്രനിലേക്കുള്ള ചരിത്രപരമായ യാത്രയില്‍ പൊതുജനങ്ങള്‍ക്കും പ്രതീകാത്മകമായി പങ്കുചേരാനുള്ള അവസരം ഒരുക്കുകയാണ് അമേരിക്കന്‍ ബഹിരാകാശ ഏജന്‍സിയായ നാസ. 2026-ന്റെ തുടക്കത്തില്‍ വിക്ഷേപിക്കാന്‍ ഒരുങ്ങുന്ന ആര്‍ട്ടെമിസ് II ദൗത്യത്തിന്റെ ഭാഗമായി ലോകമെമ്പാടുമുള്ളവര്‍ക്ക് പേരുകള്‍ സമര്‍പ്പിക്കാം. ദൗത്യത്തിന്റെ ഭാഗമായി ഓറിയോണ്‍ ബഹിരാകാശ പേടകത്തില്‍ നിങ്ങളുടെ പേരും ചന്ദ്രനെ വലംവെക്കും. സമര്‍പ്പിച്ച പേരുകള്‍ പ്രത്യേക ഡിജിറ്റല്‍ മെമ്മറി കാര്‍ഡില്‍ സൂക്ഷിച്ച് ദൗത്യസമയത്ത് ഓറിയോണ്‍ ബഹിരാകാശ പേടകത്തില്‍ ഉള്‍പ്പെടുത്തും. ആര്‍ട്ടെമിസിലെ അന്താരാഷ്ട്ര പങ്കാളിത്തത്തിന്റെ ഡിജിറ്റല്‍ രേഖയായി ഈ പേരുകള്‍ സൂക്ഷിക്കപ്പെടും.
നാസയുടെ ചരിത്രപരമായ ദൗത്യങ്ങളില്‍ പൊതുജനങ്ങളെയും പങ്കാളികളാക്കുന്നത്തിന്റെ ഭാഗമായാണ് ഈ പദ്ധതി. ചന്ദ്രയാത്രയുടെ പ്രതീകാത്മക അനുഭവം ലോകമെമ്പാടുമുള്ള പൗരന്മാര്‍ക്ക് ലഭിക്കുമെന്നതാണ് പ്രത്യേകത. ''ആര്‍ട്ടെമിസ് II ചന്ദ്രനിലേക്ക് പോകുന്നു, നിങ്ങളുടെ പേരിനും പോകാം'' എന്നാണ് നാസയുടെ സന്ദേശം.
ആര്‍ട്ടെമിസ് ദൗത്യങ്ങളിലെ മനുഷ്യരെ ഉള്‍പ്പെടുത്തി നടത്തുന്ന ആദ്യത്തെ യാത്രയാണിത്. നാസയുടെ ബഹിരാകാശയാത്രികരായ റീഡ് വൈസ്മാന്‍, വിക്ടര്‍ ഗ്ലോവര്‍, ക്രിസ്റ്റീന കോക്ക് എന്നിവരും കനേഡിയന്‍ സ്പേസ് ഏജന്‍സിയുടെ ജെറമി ഹാന്‍സനും ഉള്‍പ്പെടെ നാല് ബഹിരാകാശയാത്രികര്‍, ശക്തമായ സ്പേസ് ലോഞ്ച് സിസ്റ്റം (SLS) റോക്കറ്റില്‍ യാത്ര ചെയ്യുന്ന ആദ്യത്തെ മനുഷ്യരാകും. ചന്ദ്രനെ ചുറ്റി തിരികെ വരുന്ന ഈ യാത്രയില്‍ ഓറിയോണിന്റെ ഏറ്റവും പുതിയ ലൈഫ് സപ്പോര്‍ട്ട് സംവിധാനങ്ങള്‍ അവര്‍ പരീക്ഷിക്കും. അരനൂറ്റാണ്ടിനിടയില്‍ മനുഷ്യന്‍ സഞ്ചരിച്ചതിനേക്കാള്‍ ദൂരത്തേക്ക് എത്തിക്കുന്ന യാത്രയായിരിക്കും ഇത്.
ബഹിരാകാശയാത്രികര്‍ ചന്ദ്രോപരിതലത്തില്‍ ഇറങ്ങാതെ ഓറിയോണ്‍ പേടകത്തില്‍ തുടരുമെങ്കിലും, നാസയുടെ ദീര്‍ഘകാല പദ്ധതികളിലേക്കുള്ള നിര്‍ണ്ണായകമായ ഒരു ചുവടുവെയ്പാണ് ആര്‍ട്ടെമിസ് II. ഈ ദശാബ്ദത്തിന്റെ അവസാനം ചന്ദ്രന്റെ ദക്ഷിണധ്രുവത്തില്‍ മനുഷ്യരെ ഇറക്കാനുള്ള ആര്‍ട്ടെമിസ് III ദൗത്യത്തിന് ആവശ്യമായ കഴിവുകള്‍ വികസിപ്പിക്കാനാണ് ഇതിലൂടെ ശ്രമിക്കുന്നത്. കൂടാതെ, ഭാവിയില്‍ ചൊവ്വയിലേക്കുള്ള ദൗത്യങ്ങള്‍ പോലുള്ള വലിയ വെല്ലുവിളികള്‍ നേരിടുന്നതിനും, ഈ ശ്രമങ്ങള്‍ നിര്‍ണായകമായ അറിവുകളും അനുഭവങ്ങളും നല്‍കി സഹായകരമാവും.