മരിയൻ തീർത്ഥാടന കേന്ദ്രമായ ഐൻസീഡലിലേക്ക് സിറോ മലബാർ വിശ്വാസികൾ നടത്തുന്ന വാർഷിക തീർത്ഥാടനംമെയ് 30 ശനിയാഴ്ച

സ്വിറ്റ്‌സർലൻഡിലെ വിശ്വപ്രസിദ്ധ മരിയൻ തീർത്ഥാടന കേന്ദ്രമായ ഐൻസീഡലിലേക്ക് സിറോ മലബാർ വിശ്വാസികൾ നടത്തുന്ന വാർഷിക തീർത്ഥാടനം 2026 മെയ് 30 ശനിയാഴ്ച നടക്കും.

സ്വിറ്റ്‌സർലൻഡിന്റെ വിവിധ ഭാഗങ്ങളിൽ നിന്നുള്ള നൂറുകണക്കിന് മലയാളികൾ ഒത്തുചേരുന്ന ഈ വർഷത്തെ തീർത്ഥാടനത്തിന് സിറോ മലബാർ സഭയുടെ മേജർ ആർച്ച് ബിഷപ്പ് മാർ റാഫേൽ തട്ടിൽ ആത്മീയ നേതൃത്വം നൽകും.

മെയ് 30 ശനിയാഴ്ച ഉച്ചയ്ക്ക് ഒരു മണിക്ക് ഭക്തിസാന്ദ്രമായ ജപമാല സമർപ്പണത്തോടെ തീർത്ഥാടന പരിപാടികൾക്ക് തുടക്കമാകും.

തുടർന്ന് നടക്കുന്ന ആഘോഷമായ വിശുദ്ധ കുർബാനയിൽ മേജർ ആർച്ച് ബിഷപ്പ് മാർ റാഫേൽ തട്ടിൽ മുഖ്യകാർമ്മികത്വം വഹിക്കും.

യൂറോപ്പിലെ സിറോ മലബാർ വിശ്വാസികളുടെ അപ്പോസ്തോലിക് വിസിറ്റേറ്റർ ബിഷപ്പ് മാർ സ്റ്റീഫൻ ചിറപ്പണത്ത് ചടങ്ങുകളിൽ സഹകാർമ്മികനായിരിക്കും.

സ്വിറ്റ്‌സർലൻഡിലെ വിവിധ മിഷനുകളിൽ സേവനമനുഷ്ഠിക്കുന്ന വൈദികരും സന്യാസിനികളും തിരുക്കർമ്മങ്ങളിൽ പങ്കുചേരും.

മധ്യയൂറോപ്പിലെ പ്രമുഖ തീർത്ഥാടന കേന്ദ്രമായ ഐൻസീഡലിലെ 'ബ്ലാക്ക് മഡോണ' പ്രതിഷ്ഠിച്ചിരിക്കുന്ന കപ്പേളയിൽ പ്രത്യേക പ്രാർത്ഥനകൾ ഉണ്ടായിരിക്കും.

പ്രവാസ ജീവിതത്തിലെ തിരക്കുകൾക്കിടയിൽ വിശ്വാസികൾക്ക് ആത്മീയ നവീകരണത്തിനും പരസ്പര സൗഹൃദം പുതുക്കാനുമുള്ള സുവർണാവസരമായാണ് ഈ സംഗമം കണക്കാക്കപ്പെടുന്നത്.

ഓരോ വർഷവും വിശ്വാസികളുടെ പങ്കാളിത്തം വർദ്ധിച്ചുവരുന്ന സാഹചര്യത്തിൽ ഇത്തവണ വിപുലമായ ക്രമീകരണങ്ങളാണ് സംഘാടക സമിതി ഒരുക്കിയിരിക്കുന്നത്.

തിരുക്കർമ്മങ്ങൾ വൈകുന്നേരം നാലു മണിയോടെ സമാപിക്കും.

സ്വിറ്റ്‌സർലൻഡിലെ വിവിധ കാന്റണുകളിൽ നിന്നുള്ള എല്ലാ വിശ്വാസികളെയും ഈ പുണ്യയാത്രയിലേക്ക് സ്നേഹപൂർവ്വം സ്വാഗതം ചെയ്യുന്നതായി സംഘാടകർ അറിയിച്ചു.

മേജർ ആർച്ച് ബിഷപ്പിന്റെ സാന്നിധ്യം പ്രവാസി സമൂഹത്തിന് വലിയ ആത്മീയ ഉണർവ്വേകുമെന്നാണ് പ്രതീക്ഷിക്കപ്പെടുന്നത്.